熱情、意志、理性

-陳柏壽 牧師-

目nih久，「台文通訊」四歲ah！一份無固定財源ê文化運動雜誌會tàng維持四冬，實在值得咱為伊來歡喜。洛杉磯ê讀者聯誼會tī八月初六beh用吟詩、唱歌kap演台語劇「厝邊隔壁」來慶祝「台文通訊」四歲ê生日。Tī台北ê台灣聯絡處也有計劃beh辦活動來慶祝，通過各種無仝形式ê活動，hō͘ koh khah chē人投入台灣語文運動。

四冬前「台文通訊」發刊ê時，有提起beh扮演「點火」、「橋樑」、「舞台」、「園地」ê角色，這四項任務內面可能是「點火」這項做了上成功。這四冬來有真chēm̄ -bat見過面ê朋友，讀著「台文通訊」了後tī世界ta̍k 所在，恬恬teh為這份刊物付出時間kap金錢，阮無法度隨個kā恁說謝，只有koh khah拍拚堅守阮ê岡位，kā「台文通訊」辦hō͘ koh khah好，來回應大家ê支持。

「點火」會成功並是「台文通訊」ê功勞，事實上是台灣人ê社會有to̍h火ê條件。台灣語文運動ê原動力出tī台灣人甘願本土文化被外來統治者消滅，對這點「甘願」ê心，產生運動ê熱情。這種熱情ê台灣魂是健康ê，是必要ê，若無台灣魂就無台灣語文運動。這種熱情ê台灣魂是台灣人ê根，未來台灣新國家ê希望。

M̄-koh，台灣語文運動m̄是kan-na有熱情就會成功，有熱情無意志，做代誌往往會虎頭鳥鼠尾，運動猶未成功就家己先倒落去。「台文通訊」北美kap台灣各地自主性ê讀者聯誼會，上chē ê時攏總有二十個，但是到chit-má kan-na chhun四、五個聯誼會有照起工ta̍k個月teh聚會。意志若無堅定，tú著困難就絕望，放棄起初ê理想。意志力ê培養需要自我要求、自我訓練，也需要用團體ê力量來互相扶持、互相要求。

除了熱情kap意志，咱也需要理性。理性hō͘咱會曉冷靜思考，將咱有限ê力量用tī上有需要ê所在，發揮最大ê效果。無理性ê熱情有時會對整個運動產生破壞性ê力量。真chē有心beh學台文ê人加減攏有一個疑問，台語音標chiah chē套，是beh學叨一套? Che確實是一個問題，台文運動beh koh進一步，對這個困境ài有突破。真chē對台語有熱情、有意志力ê前輩，已經替咱發明三十幾套以上ê台語音標記號，而且新ê方案猶有人繼續teh發明。台語ê存亡tī這個緊急ê時刻，咱需要理性。

台語ê救護m̄是喝口號，發表聲明，開研討會就有法度解決。台語(廣義ê台語) 文化長期受外來政權「國語政策」thún踏，需要長期ê復健才有法度起死回生。台灣語文運動者ài有長期作戰ê心理準備，咱除了ài面對「中國文化在台灣」ê競爭，koh khah頭殼痛ê是咱也tio̍h-ài面對一kóa思想已經「國語化」去ê台灣人ê反對。面對這種ká-ná絕望ê情勢，台灣語文運動beh會成功，咱m̄-nātio̍h-ài有犧牲奉獻ê熱情，也ài不時鍛鍊咱ê意志，koh khah ài有理性，tī ta̍k方面充實咱家己，thang裝備咱來從事這場民族文化存亡ê保衛戰。台灣語文運動m̄-nā是一個「脫中入台」ê台灣白話文運動，伊也是一場台灣主體v.s.中原法統、新文化v.s.舊文化、進步v.s.傳統包袱、民主v.s.權威、台灣多元文化v.s.國語文化沙文主義、理想v.s.既得利益ê文化總体戰，這場總体戰若戰贏，用台灣社會多元文化做主体ê「新」koh「獨立」ê台灣國才會出世。

(本文刊載tī「台文通訊」第41期ê社論，Aug., 1995)