本末顛倒ê運動觀

December 1, 2002
kap 朋友分享

本末顛倒ê運動觀

-陳柏壽 牧師-

最近聯合國ê風吹砂吹到eng phōng-phōng,hō͘人目睭peh bē金,亦親像入秋以後ê紐約,黃葉一直落,規街路攏是聯合國,電視報紙街頭巷尾攏是聯合國,在野ê專心beh入聯合國,執政ê mā teh喝燒,那準入聯合國就是台灣獨立台灣人出頭天一樣。

古早以前,國民黨禁聲無愛講聯合國,所以大家火力集中對付國民黨,chit-má國民黨逼到無poah聯合國這棋子bē通,雖然猶teh偷食驚歹勢,用手巾á遮面,m̄敢叫「台灣」,發動民間kap反對陣營人士去,國民黨bih tī後壁暗爽。因為伊心內第一清楚,無論是用「台灣」或是用伊ê啥物歪哥名,只要會入聯合國,伊就是贏,伊在世界社會內ê統治地位,一定增長。入聯合國第一爽ê,是國民黨。

但是入聯合國對拍倒國民黨這款大事業,可能是一步衰棋:全台灣以及全世界ê台灣人,人人ê目睭若攏tī聯合國,國民黨tī台灣就會tàng坐teh食、倒teh放,出在伊去作惡作毒,無人去攻、無人監督,社會力源移轉去聯合國是國民黨行棋ê高段。

至少tī海外ê台灣人智識份子,面臨著這個中國統治勢力ê增強ê壓迫ê今日,咱應該再次深思台灣獨立ê真正意義。台獨ê進路beh重振雄風揮兵再起,或是兵敗下坡漸趕哀微,在tī這個關鍵ê時刻。

台灣ê父老用單純ê善意,認為進入聯合國台灣問題就會解決,古早以來台灣人ê直性kap善良,tī「進入聯國」這面就表現到真清楚。但是這個單純ê發想,並bē解決台灣問題。台灣問題ê解決有khah嚴重ê客觀條件ê要求,只有在國家成立ê客觀條件整備之後,所有國際問題自然解決,聯合國根本m̄是問題,透半暝mā有人來弄門,beh kap你作厝邊ê朋友。

台灣ê國家建立ê客觀條件,不但kap用啥物名加入聯合國無關係,kap所有外表ê統治構造mā無一定有關係。意思就是講,m̄是政府由民進黨來hōaⁿ,台灣就是獨立。Che m̄是台灣獨立ê客觀條件。

台灣ê獨立建國ê客觀條件,mā不在寄望李登輝beh改國號亦無,亦不在美國日本beh承認亦無,亦不在中國beh接受亦無,亦不在一個中國、二個中國幾個中國ê口號。Che對台灣ê國家成立,無啥物直接ê客觀條件。

一個國家形成獨立ê客觀條件mā不在伊有teh喊民主喊自由亦無。兩旁ê中國人mā攏teh喊自由民主,喊比民進黨比全國ê人民khah久khah大聲,但是有中國統治者ê所在,民主自由攏死了了。所以民主自由ê口號mā無一定是一個新國家形成ê有力ê客觀條件。
經濟進步物質豐富mā m̄是獨立國家ê客觀條件。包括台灣在內ê各地殖民地,有真chē心靈腐敗ê有錢人,攏無國家觀念。台灣ê經濟優勢mā m̄是永遠無變ê情勢,中國靠大量便宜勞工,近年世界各地成長率不過4% ê時代,中國有11%。咱teh對付中國惡霸mā m̄是靠咱ê錢財。

新台灣ê新koh獨立ê國家ê形成,上重要亦絕對無bē使ê客觀條件只有二項:第一條件是台灣人自己beh作主人ê意識,叫作「民族意識」; 第二ê條件是台灣人ê文化風土、風俗習慣、生活方式,tio̍h-ài有一個獨立國家ê條件。

這二項是第一艱難ê工程,這二項工程若無下手去做、若無繼續去做、若無mī-nōaⁿ去做,中國人統治者一定bih tī門框後teh偷笑,笑咱台灣人hō͘惡質ê中國醬缸文化,染到烏甘烏甘,簡單會tòe人喝口號,無用頭腦去想,準備beh「安樂死」。Beh真正達到實質ê獨立目標,咱台灣人需要具備三種ê訓練:

第一、建立冷靜、觀察、深思、分析ê文化氣質。人若冷靜,看代誌就會清,想路會khah深。「在台灣的中國文化」ê膚淺,就是政治家teh演講ê時陣,講三句話就期待聽眾拍二擺手;話講還bē了,思路猶無消楚ê時,聽眾ê手已經開始teh拍手,演講tùi頭到尾就是teh拍手kap喝爽中經過,莫怪台灣人ê政治氣質猶維持tī真原始幼稚ê層次。咱若無用冷靜ê頭腦來對付政治問題,中國人就m̄驚台灣人會獨立。

第二、培養台灣蕃薯ê韌命。無論按怎摧殘,台灣蕃薯藤會愈湠(thòaⁿŽ)愈闊愈深,台灣蕃薯ê精神是犧牲、受苦、為別人活,同時台灣蕃薯是樂天ê精神:咱ài用笑、用歌聲、用giâ鬧熱、用大拜拜ê精神,來「笑倒」國民黨,hō͘國民黨親像廟口ê死豬,四腳朝天。拍倒國民黨ê統治就用蕃薯ê樂天性。

第三、培養台灣人ê土直、正直、良善、樸實、純全ê文化。中國ê醬缸文化是教人虛假、笑面虎、陰險、奸詐、鄉愿、順民ê惡質文化,咱tio̍h一點一點洗清氣。台灣獨立是一種反抗意識kap反抗精神,但是反抗行為m̄是建立在個人ê英雄主義,是建立tī群体形成ê反抗文化作基礎。台灣人ê土直正直是培養反抗文化ê最好土壤,等到反抗文化普遍成熟ê時,國民黨倒台ê日就近啦。

講來到chia,台灣獨立建國聯盟今後ê去路,是千千萬萬有台灣心ê人最關心ê問題,亦是最應該認真去思考ê課題。聯盟在台獨運動ê歷史有建立真深真大ê貢獻,但是在今日最大ê危機ê時代,阮認為聯盟ài警醒起來,koh倒轉過去ê革命ê原點,重新復起革命、教育民眾、草根運動、文化工作等等基本ê使命kap功夫,這款使命kap功夫才是台灣獨立最有力最根本ê所在。「十年樹木,百年樹人」,栽培一個真正有台灣心,有台灣血、有台灣魂,有台灣文化ê台灣人,才是真正台獨聯盟最重要ê使命,有這款ê台灣人,台獨ê理想早一日就會實現。

(本文刊載tī「台灣公論報」)

kap 朋友分享

No Comments

Leave a Reply

Your email address will not be published. Required fields are marked *

Translate »
Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致