【小啟】- 答覆讀者ê來批

– 陳柏壽牧師 –

台灣獨立聯盟莊秋雄先生有來批說明「台獨聯盟根本無反對公論報用台文寫社論」，並說明聯盟內ê「電話會議」也m̄-bat正式決定或宣佈不准使用台文寫社論ê事情。另外聯盟陳重信先生亦有來批說明伊並無攻擊或反對蔡正隆主席所推動ê公論報台文社論運動等。

阮感謝秋雄兄kap重信兄ê澄清。阮深知阮所針對ê 「反對ê聲音」，不過是一小部分ê盟員nā-tiāⁿ，m̄是針對聯盟ê全體（參閱本通訊第42期社論）。作一種草根良心運動ê教育雜誌，客觀事實ê報導是阮繼續努力ê原則kap目標，本通訊無意參與任何政治鬥爭，亦同時肯定來批讀者諸君ê善意回應以及in對台灣文化kap政治獨立ê貢獻kap關心。本通訊今後會繼續一貫推動台灣語文運動ê精神，認同任何支持台文ê個人kap團體做阮ê友軍(參閱44期第八頁kap十六頁)；同時對待任何阻擋台文發展ê個人或團體，本通訊會堅持運動ê理念kap良心，採取嚴格ê批判ê態度。謹以本文作對獨立聯盟兄姊最友善ê答覆。

（本小啟刊載tī「台文通訊」第45期，Feb., 1996）