重新認識台灣草根文化

– 陳柏壽牧師 –

一九九四年十二月廿一日陳水扁kap趙少康tī競選台北市長期間，台北計程車司機自發ê組織「全民計程」來支援陳水扁，另外一面趙少康電台呼籲tio̍h將「全民司機統統抓起來！」當日tī趙少康ê小弟趙少華所開台北市德惠街統一飯店樓腳香檳夜總會，將全民司機戴正昌拖入去，新黨腳siàu手下用海軍刀破腹刮死，兇犯至今未明。這個明顯ê政治事件演變到今á日，國民黨ê法庭，經過四審定刑將在場為戴正昌司機作安魂儀式ê萬佛會釋宗聖法師判八個月。

在中國勢力統治下ê政治受害者，往往是囚犯自由逍遙，反轉受害者遭受判刑。宗聖法師是一例，為王康陸先生駕駛計程車ê司機，koh是另外一例。Tī謀害王康陸先生ê事件中，司機本人身受重傷，但亦受判八個月ê無緣無故ê重刑。

一般海內外對台灣獨立建國聯盟ê一個通常ê誤解，就是認為台獨聯盟不過是一群海外受西方教育，特別是受基督教思想影響ê人所組成ê團体，亦因為這種淺見kap誤解，將聯盟ê所有運動走向kap行動模式，攏定型作充足ê「西方」ê牛油butter味真重ê異化怪物，無法度充份融入台灣人草根大眾ê心靈內面。海外回鄉運動，聯盟回台參選運動，受著島內鄉親ê「拒絕反應」，攏kap這點既成ê淺見kap誤解有真深ê關係。

Beh破解這種既成ê偏見，是非常沈重ê工程，但是一般來講可以分二條路去下手：第一條路是對咱自已ê体質做深刻ê反省；第二條路就是chhōe出台灣本土文化kap宗教ê正面力量，承認伊ê價值，伊ê哲學思想，進一步向伊學習。

對第一條路來看，代先tio̍h先拍破一般海外台灣人「崇洋」ê先見，代先拍破西方教育所產生ê博士教授等等頭銜ê權威，代先用客觀ê目睭來分析評估台灣人自救運動今日ê現狀，承認西方ê學術kap宗教機構不過是一項真有限ê貢獻。

咱若用平實客觀ê角度去看台灣人自救運動史，隨時就會看出西方ê文化、學術、宗教ê領域，時常陷落入去一種自我中心主義，絕對化ê自我主張kap自益觀念，培養出一批用西洋作「看板」ê政冶、社會、宗教ê勢力，對台灣人草根ê自救運動ê直接貢獻，非常有限。今日在台灣ê西洋教育ê最大ê特質，就是停留tī理論發表ê才能，在外表頭銜kap權威ê建立，在自益自利ê勢力形成ê手段。In看輕「在地」土生ê文化、宗教、生活型態kap人主觀。伊講話攏beh「教示」人ê「老師」。李登輝ê所謂 「技術官僚」群，新黨ê現代政客群，民進黨ê自我膨脹ê政治權勢分贓群，蔣介石帶來ê天主、浸信、信義、小群聚會所、真耶穌，甚至真大部份ê所謂台灣人心聲ê代言人ê台灣基督長老教會ê都市教會信徒kap牧師，攏是屬tī這種型態ê西洋產物。台獨聯盟不幸去染著這群人ê味，致使台灣民間對聯盟ê純情kap理想產生真大ê誤解。

對第二條路來看，咱代先tio̍h肯定並認同台灣草根文化對台灣人自救建國運動ê主体性kap領導性。用語言運動作例來講，普通人真容易將保存台語ê功勞攏歸hō͘台灣基督長老教會ê白話字聖經kap台語主日禮拜，這部份咱雖然會使肯定長老教會有真大ê貢獻，但是究竟在人口構成ê分析上，長老教會ê信徒不過是佔全台ê 2%，是絕對ê少數，同時最近長老教會傳統ê主日學學童教育，惡化作中國語教育ê傾向已經是非常嚴重ê現實。今á日tī台灣真正teh保存流傳母語ê主流力量，應該公認是像萬佛會、佛堂、節會、戲劇等土生ê草根文化kap宗教組織。

長老教會受台灣人民ê擁護支持，主要ê原因tī長老教會一百三十年間認同台灣文化。認同台灣文化是一種超越宗教ê境界。所以凡若認同延續文化香火ê團体，最終一定會得著人民ê支持，得著歷史ê肯定。長老教會以及所有外來ê中國教會最近因為淪落tī中產階級kap統治階級ê意識型態，無koh將弱小團体kap個人當作最終ê關懷對象，同時tī意識上亦漸漸脫離台灣ê草根文化，去附合「中國文化在台灣」ê政冶意識，或是去附合 「西洋正統」ê文化，霸權意識，來壓制台灣ê草根文化，che攏是眼前最大ê危機，亦是台獨聯盟所碰著最基本ê難題。

對全民計程車司機tī新黨暴徒手下受害，只有一位草根ê法師出現tī受害ê地點去示威，抗議，去個攏是「外來」ê異物，che是台灣社會普遍ê觀念。迫切解決ê方策，是咱在海內外ê獨立聯盟盟員、盟友，人人開始注重地方文化ê角色，注重地方宗教ê功能，注重地方教育ê價值，放下自己西方主體ê價值觀，來努力追求台灣人民ê認同kap諒解。咱欠台灣人民ê，比台灣人民欠咱ê khah chē。

台灣人民不是gōng人，伊mā是知影孤立西方ê影響，對台灣絕對m̄是幸福，tī潛意識內面台灣人民對西方文明猶有真大ê欣慕kap期待，目前ê要務並m̄是tī完全否定咱自己ê價值觀，是在如何取得民眾ê認同，如何切身進入台灣文化，隨時隨刻khiā在 「土生」ê台灣人這旁，再有弱小ê個人或團体受中國人迫害ê時，咱tio̍h踏落地kap in作伙鬥爭，按呢hō͘台灣人來接納咱，進一步提昇強化台灣文化ê体質，che才是獨立聯盟眾兄弟姊妹tio̍h深深覺悟ê使命。

(本文刊載台灣公論報社論，2-17-96)