正隆兄無死…追思蔡正隆主席

-陳柏壽 牧師-

正隆兄無死，伊kan-na睏去。伊戰鬥到最後一刻，去上帝hia歇睏，無久伊會koh活起來，kap咱作伙繼續行建設台文母語ê遠路，伊ê精神、理想漸漸會tī咱大家ê靈眼內發根，生長大叢，有一日beh生成作一叢台灣文化ê大樹，無論風颱落雪攏拍伊bē倒。

這三年來，伊透底m̄-bat現出伊ê病狀ê痛苦，雖然每禮拜ài洗幾偌遍腰子，但是伊hit款真正台灣兒ê風骨，絕對無顯出一點á軟弱悲觀。去到ta̍k位伊是親像一pha teh to̍h ê燭火，有熱氣、有意志、無妥協、無投降。

李登輝來Cornell ê時，伊無顧慮家己破病ê身軀，按Houston mo̍͘h七百領T-shirt來義賣，koh發動三百外位北美ê台僑去示威，發揚台獨ê意願，tī各媒体ê面前，kan-na伊用標準ê台語發表伊ê理念。

為著台獨聯盟美國本部長遠ê基礎，這幾年來伊認真推廣台文運動。台灣公論報ê社論用台文書寫是伊任內ê突破，但是為著按呢伊受著聯盟內幾位人物真大ê攻擊，包括林又新、陳重信、李界木等等，極力反對正隆兄。認為伊對台文社論ê堅持，必需tùi台獨聯盟主席ê地位下台，並要求伊辭去台灣公論報代理發行人ê職務。陳重信甚至自薦beh做台灣公論報發行人ê地位，企圖回覆「中文」体ê完全正統化。對這個內部來ê打擊，正隆兄一直到伊人生最後ê一刻亦無妥協，伊堅持台文是beh訓練作台灣人ê第一步，台文是重建台灣文化ê第一步，koh khah堅持台文是台獨聯盟必需進行ê第一重要ê任務。文化是政治ê延續，有啥款ê文化就有啥款ê政治，政治不過是文化ê外皮，文化是整個社會ê實質。有人認為若政治改革，文化就會改造。這個想法kap事實是顛倒péng。寄望改革只有一條路，就是日日用耐心kap犧牲勇敢來面對文化戰場ê挑戰。台灣若hō͘中國文化koh繼續污染落去，koh一千年台灣ê政治mā bē變好。

阮認為台灣公論報ê體質今後若m̄知通用台文寫社論，就無台灣根，早慢會死；台獨聯盟若無beh堅持台灣語文kap文化ê重建，mā早慢會死。但是正隆兄永遠bē死，伊ê精神kap意志永遠活tī所有堅持用台灣文化做主体ê台灣語文運動者ê心內。

今年熱天「台文通訊」tī Houston舉行第四週年紀念會，正隆兄發動Houston聯盟ê朋友以及台灣同鄉，來歡迎招待來自全球各地ê台文工作者，伊雖然是必須ài定時走去病院洗腰子，mā是猶用親切ê笑容，誠懇ê態度來teh服務，一直到大會成功結束。伊ê心內有一pha意志kap理想ê火teh to̍h，咱tī伊ê身邊感覺會出來。

死是人生ê大限(ultimate reality)，死hō͘咱ê肉身隔離分開到兩個世界，但是死以後ê靈魂永活。照基督教ê講法，靈魂是轉去上帝ê所在。上帝既然是活tī天堂 (transcendent)亦活tī人間(imminent) ê上帝，人ê靈魂離開肉体以後，mā應該是活tī「超越」kap「同在」ê兩種境界。古早以來ê成見大家認為天堂是金光閃閃ê另外ê世界，但是現代人認為靈魂kap上帝ê特質仝款，不但活tī頂面，亦繼續不斷kap地面上伊所懷念ê人、所懷念ê事溝通。

日本ê童話描寫所疼ê人死以後，攏變作一粒一粒星，掛tī天頂teh看地面上ê親人朋友。天愈暗，夜愈深；聲愈靜ê暗暝，星愈明。基督教teh講主耶穌去天頂先為人準備房間。Tī hia親人朋友會仝款tī厝內，享受疼kap安慰ê家庭生活。靈魂會常常轉來，來眷顧懷念伊所疼ê人kap土地。

阮相信正隆兄會常常轉來，因為伊帶著地上未完成ê心願，所以一定會常常轉來看咱。正隆兄一世人tī世間無求出名，伊kap牽手明霞姊是行動ê草根人物，m̄是靠一支嘴，是用手teh做工實踐ê人。In teh為著台灣人ê真正ê獨立出頭天流目屎艱苦ê時，真少人知影；伊正需要人獻腰子ê時，無人支援同情，但是忍著意志kap樂觀ê精神堅持到今á日。所以照基督教ê講法，正隆兄不過是去歇睏 (帖撒羅尼迦前書4:13-18)。伊ta̍k日beh tùi天頂看落來，繼績關懷伊未完成ê事業，甚至伊ê靈魂會轉來伊ê土地，幫助為台語運動受苦ê人。正隆兄一世人無享受著世間ê名聲、地位、錢財，但是伊純全ê人格，已經變作全世界追求台灣獨立出頭天ê台灣人ê最偉大最好ê模樣。

正隆兄無死，伊永遠會活tī疼伊ê人ê心內。

(本文是「台文通訊」第43期ê社論，Oct.,1995)