展望台語文運動愛行ê方向

時間過了真緊，目躡（nih）á 久「台文通訊」已經發行三年loh。Tī beh進入第四年ê時，阮想beh kap大家相kap來展望台語文運動ài行ê方向。

值得咱thang安慰ê，通過真chē同志tī無仝岡位、無仝管道ê拍拚，這三年來台語文運動有淡薄ê成果 :

1.    寫台文kap讀台文ê人口增加；過去討論台語問題文章大部分是用中國話寫ê，chit-má用台文寫ê文章愈來愈chē。

2.    台文刊物kap出版物增加；這三年來有九份台文雜誌創刊，其中有八份猶繼續teh發行。出版台語字典、諺語、會話讀本等，已經是成做會thàn錢ê生理，市面上已經有bē少營利性ê台文出版物。

3.    這三年來出現bē少ê台語文學作品，m̄-nā tī詩作方面，tī散文、小說、話劇方面也有。

4.    雖然國民黨教育部對台語教育ê態度猶真保留，民間ê台語文運動tī教育系統mā有淡薄ê成果；全台已經有十縣市編台語教材。Ti大學校園內面台語社團已經真普遍，連有升學壓力ê高中校園mā有台語文社團出現。

5.    有chē-chē自發性、草根性ê語文運動團體tī台灣各所在成立。

以上ê進展雖罔hō͘咱thang歡喜，但是chia ê成果對扭轉整個台語tī台灣滅種ê趨勢並無決定性ê效果。外來政權所掌握ê國家機器，利用咱繳ê稅金，透過教育機關kap大眾傳播媒体，猶繼續teh用「國語文化」kā台灣人洗腦；台語文化hō͘國語文化一步一步逼人去死角。有真chē台灣人已經放棄用in ê父母話來教in ê kiáⁿ兒。上可怕ê是台灣人對這種慢性民族自殺ê症頭並無自覺，連主張用「文化獨立建國」ê台灣文化理論大師，也認賊做父，鼓吹統治者用來壓迫台灣人民ê工具…「國語」，m̄是台灣gín-á ê母語。堅持使用台語，肯向「國語文化」投降ê人，soah顛倒磕（kha̍p）bē著就一kóa台灣人中文台灣政論家戴「大福佬沙文主義」ê帽á。有bē少人將台灣語言滅種ê問題寄望tī in認為是萬能ê民進黨，想講政治問題若解決，語言問題就解決;但是，民進黨一直teh無閒選舉，到taⁿ咱猶看bē出伊對台語滅種ê症頭有啥物處方。也有bē少人將台語ê問題寄望tī國民黨外來政權ê本土化，國民黨為著選票也開始有淡薄ê回應，講1995年開始beh tī國民學校實施母語教育，但是根據內幕ê消息，教育部所委託ê「母語教育委員會」ê召集人是一位bē曉講台灣話 ê「外省籍」師大中文系教授，開會攏用中國話進行。Koh khah好笑ê是聽講以推廣台語文為宗旨ê民間學者組織「中華民國台灣語文學會」對外公開開研討會ê時也是大部分用中國話進行。四十外年來台灣教育系統一直是執行外來政權「國語政策」ê幫兇，雖罔已經有一kóa已經有自覺，但是猶是絕對ê少數。目前tī台灣有權參與語文政策ê學閥[hoa̍t]，攏是靠中文建立in ê社會地位kap聲望。向望tī體制內無換朝代來換國語是in中國有史以來猶m̄-bat發生ê代誌。國民黨外來政權本土化ê目的是beh維持政權，並無開創台灣民族ê決心，這種政黨推廣台語是會kan-na kā台語教育限制tī「保存中國漢語方言」ê層次，結局是in愈推行，會顛倒愈阻礙台灣語言文化獨立ê發展。

面對chia ê無奈ê情勢kap咱努力已經得著ê成果，阮展望台灣語文運動未來幾年ài行ê方向:

理念上
a．    台語是台灣原住民kap移民來台灣ê各種語言族群幾百年來經過通婚、貿易、共同生活，所自然形成ê台灣社會通用語。國民黨ê「國語政策」用政治力壓制台語，是beh消滅台灣人ê台灣意識，達成in殖民統治ê目的。台語是培養台灣本土意識、對抗外來中華帝國主義文化ê侵略，上有效ê武器。

b．    台灣語文運動是一個咱beh做台灣人m̄做中國人ê運動；伊也是一個台灣人自覺了後beh自救ê新文化運動，這個運動最高ê目標是beh建立一個「新」koh「獨立」ê台灣民族國家。

c．語言ê傳承需要有文字來記錄，但是文字本身m̄是目的，主體性ê台灣文化才是目的；台語文字ê標準化、規格化會tàng幫贊台語文字ê普及化，提昇台灣文化ê主體性；台灣語文運動ê過程中bē-tàng 避免「文字化」抑是「統一化」ê問題，但是「文字化」是過程m̄是目標。台灣語文運動無應當浪費siuⁿ-chē心神tī文字使用上ê爭論。

戰略上
a．    堅持台語ài成做台灣ê「國語」。將母語運動提昇做「台灣國國語」抑是「台灣通用語」ê運動。

b．關懷台灣本土弱勢語言，建立互相尊重、互相欣賞ê多語/多元文化社會。

（本文是kap鄭良光先生合寫，刊tī「台文通訊」第34期ê社論， Oct.1994）