選舉公投政策ê再考

– 陳柏壽牧師 –

台獨運動諸君子近年來所有ê資源、人力、時間完全投入公投運動，講公民投票就是代表民意，會tàng引導國家進入獨立建國ê方向。這款想法，愈潦愈深，tùi所謂國大代表立法委員，一直選到鄉鎮里長，一直到一旁喝反「省」制一旁又參選 「省」長，選到家己知khiā tī啥物立場；開始ê時本來是信心十足，親像beh潦溪水，褲腳pih起來就潦落去，潦到溪中央，才知影bē收山。結果是「四百年來第一戰」去hō͘製造遊戲規則ê國民黨poah一個倒khiàu-khiàu。國民黨烏天暗地teh買票、作票、綁票，Computer猶在in teh操縱，選局常在in ê如來佛掌中，結果是愈公投，台灣人獨立ê信心愈減，民進黨「台獨黨綱」ê力量愈弱，候選人選舉中m̄敢講台獨，甚至黨內一kóa無路用腳siàu已經teh喝廢除台獨黨綱。這款情勢soah落去，後年ê總統大選，中國人講in是「十拿九穩」，beh來頭前ê四年幾乎猶是國民黨ê天下。

現在若是猶有人teh喝公投來決定「獨立」或是「統一」，「台灣國」或「中華民國」，看亦是一種真無意義ê政治遊戲。「公投法」ê成立，亦是對台灣人獨立運動全無助益，主要ê資源猶原在國民黨ê手內，公投法ê內容，公投時間ê決定，公投ê效力，公投產生ê國際效率，完全處在一種冒險不定ê狀態。

幾十年來ê台獨運動，絕對m̄是公投運動，台獨聯盟絕對m̄是選舉ê聯盟。Kap新潮流、美麗島全然無仝款ê所在，就是台獨聯盟絕對m̄是民進黨內ê一個選舉ê派系。台獨聯盟是海外幾十年中間台灣人良心ê結晶，不但代表堅持台灣獨立ê意識形態ê鬥爭力量，更加是台灣人島外島內共同ê最高ê道德力量，是台灣社會ê光kap鹽。台獨聯盟並無靠選舉運動來生存。

公投運動本來ê立足是民主精神，但是民主精神m̄是一項簡單ê觀念，是一個整体ê Contextualized ê觀念，就是須要整個ê社會文化、教育、意識形態、人生觀kap世界觀ê長遠ê整体ê訓練、配合，才有法度培養出真正ê民主精神，才有法度形成真正ê民主力量。

這一群無訓練、無教育、無民主風土、無內外ê民主文化ê交流ê人民，來推行公投制度，是一種真無責任ê公共政策，會使用中國話講是the̍h民眾來「開玩笑」，利用競選ê口號來喝爽來kap民眾「開玩笑」。民眾ê心本來是單純，但是單純ê良心並無法度在公投行動中實現，單純ê良心並無法度在公投中產生，因為公投除了良心之外，khah chē是受制tī經濟利益、地方勢力、派閥、柱á腳、名聲、恐怖心理等等ê因素。這個種種因素，在公投行為中會遮蓋 (khàm)單純ê良心。「四百年第一戰」失敗tī中國人手下，繼續選中國人繼續騎tī台灣人頭殼頂soân尿，理由tī chia。

公投運動，尤其tī台灣ê文化風土來看，絕對無法度代表民主精神，無法度代表公民ê良心。台灣基督長老教會選前十一月廿八發表ê對外聲明，主要mā是針對中國人諸黨派用「中國犯台」恐嚇人民ê劣等行為，要求台灣人tio̍h「良心發現」。但是這個良心beh「發現」，非常困難。

公投運動在台灣目前ê社會風土來講，極加是代表一種功利主義(utilitarianism)。功利主義ê意思，就是若會tàng代表大部份人ê最高利益就是最高ê倫理標準。問題是這種「最高利益」，在良心以外ê種種因素ê主宰之下，絕對無法度代表最高ê倫理標準；這個「最高利益」soah變作真無良心、真無標準ê倫理。民眾ê公投行為在功利主義ê引導下，為著beh達成「最高利益」，就是beh達成比良心更加現實ê即時利益，會使pôaⁿŽ過良心，會使歪chhoa̍h良心，會使橫心，會使講白賊。執政ê國民黨執政者更加利用功利作主導，不擇手段，恐嚇加o͘-se（買收、賄賂），用盡所謂中國人ê「吃奶的力量」，來達到in ê目的。Che是目前tī台灣ê社會現象。

台獨聯盟並無否定選舉運動會產生多種正面ê社會教育功能。但是tī這個時刻台獨聯盟重申台獨運動是一項整体ê良心運動，亦是一項全面ê革命運動。公投不過是整個台獨ê大交響樂ê一個小旋律，絕對m̄是主題。台獨交響樂ê主題，在追求一個完全ê健康ê政治、文化、道德ê共同体，這個共同体只有在代先培養並建設人民ê良心kap良知作基礎，廢除中國人所培殖ê無實ê功力主義價值觀，才有實現ê可能。

寄望台獨諸君子，面對這時膚淺ê公投空氣，臨崖勒馬，m̄-thang koh盲目向前，tio̍h再次下決心慢走行遠路，下決心繼續流汗流血流目屎，下決心深深建基在良心kap道德ê實体，看重咱自己，充實咱ê精神，看輕公投人物kap政壇「英雄」ê虛假，採取各種可能ê途徑kap手段，早日形成集体ê反抗行動，將中國人國民黨ê外來政權推翻。

(本文刊載tī台灣公論報社論，12-21-94)