淺談台文通訊ê運動性

– 陳柏壽牧師 –

「台文通訊」報紙頂頭ê廣告有出「運動性」三字，阮想ài tī chia kap大家做伙三思伊ê意思。

人若到中年，受著事業家庭ê重擔，漸漸身軀衰弱，去醫生hia一定勸你tio̍h運動、運動、運動，無，一定會短命。人需要運動，愈運動愈長命。

世界上ê人群分兩款，愈gâu tín動，愈有活動ê空間，愈有獨立行動ê交通設備kap工具ê所在，hiah-ê人一般愈文明；愈封閉偏僻ê所在，出門專靠11號車(兩支腳) teh行路ê所在，hiah-ê人一世人束拘tī有限ê空間teh生存，結果不但愈無文明，是愈短命。

有人會講這世間是事事teh運動，有動有靜。樹á無teh運動，咱ê厝mā無teh運動，這是十六世紀以前ê想法。科學發達ê今á日，有讀冊ê人攏知影地球頂面ê物件，不但生物細胞內面不斷有生長、消滅ê運動，連非生物ê石頭海水ta̍k項物件ê原子內也不斷有中子、電子ê變化ê運動；厝、石頭、海水、生物攏隨著地球自轉時刻teh運動，地球時刻teh se̍h太陽做運動，太陽也不斷teh se̍h另外koh khah大環ê運動，整個ê宇宙時時刻刻teh運動，永遠teh運動。

人生出來無做工無飯好食，時時刻刻tio̍h出去討thàn，才會過日，表示人ê社會生活更加是受制tī運動ê定律，人是社會性ê動物，表示人生無法度脫離運動。

歇睏（休息）mā是運動節奏ê一部分，世間無完全歇睏ê代誌，運動達到一個平衡點ê時，有歇睏ê現象，其實mā是繼續teh運動，所以俗語講：「退一步是為著beh進兩步；歇睏是為著beh行khah長ê路」就是這個意思。人若是死去，肉体ê外表現象是teh歇睏，其實伊ê生物要素是teh轉化ê運動，伊e靈魂mā teh轉化改變，做進入他界ê運動。

總講一句，就是天公創世以來，項項teh運動，處處teh運動，永遠teh運動，無一時停；有「運動」ê所在，才有「上帝」，無「運動」，上帝是死ê！

「台文通訊」ê出世kap長大就是beh繼承這款不休不止ê運動律，繼承天公ê創世觀，才有法度生存落去。這是第一個觀念。

第二項咱對「台文通訊」ê運動性所應該知影ê就是：「台文」是按咱頭殼內ê思想，按咱tī頭殼內對物件ê印像，才產生出來ê表達ê形式，「思想」、「物件」是代先有ê，是「本質」，文字是對hia間接表現出來ê「形式」nā-tiāⁿ。形式當然真重要，因為形式是對本質產生出來ê物件，但是思想ê本質koh khah重要。有時一字字會使表示各種無仝ê意思抑是物件有時種種無仝ê字不過是teh表示一項仝款ê物件抑是思想，所以文字kap物件、思想ê本質，無一定有直接ê牽連；物件思想ê本質無變，但是文字不時teh進展改變。所以台文運動tio̍h認清啥物是咱ê本質無變，咱ê根本，tio̍h將咱ê根本掠（lia̍h）hō͘ tiâu。

有運動就一定會產生kap其他物件摩擦矛盾對立，但是摩擦矛盾對立ê產生對運動不但有必要，實在是運動beh活落去力量ê泉源，有in運動才會健康。台文運動力量ê源頭，在tī「本質」kap表示ê「形式」無法度一致，頭殼內想ê kap寫出來ê字無法度一致，所以產生矛盾對立。另外台文運動也抵(tú)著兩大阻力，第一個阻力是中國話文體ê橫霸ê阻礙；第二大個阻力是種種台文標音記號團体ê自我中心主義。前者是咱第一大ê敵人，因為伊不但形式kap咱無仝，伊根本ê本質kap咱bē合；後者是咱ê友軍，因為伊ê本質是台灣人ê本質，只是外表ê形式無仝。雖然是按呢講，「台文通訊」對付前者ê外部矛盾khah有信心，因為中國人ê國民黨倒台ê日子已經算便便啦，in ê氣勢已經漸漸teh衰ah；若是對待後者ê內部矛盾咱m̄-thang放鬆，因為世間所有ê問題主要攏是對內部矛盾發生ê，內部矛盾mā有惡化變做主要矛盾ê可能。總講一句，「台文通訊」ê運動觀有真強真勇ê戰鬥性。這是第三點。

第四項咱ài了解ê就是台文ê運動性是對簡單進入複雜、對量變進入質變、對地方進入普世ê過程。台文運動ê起頭是粗腳粗手，kui叢樹á攏是oe，無葉也無花，按呢講應該是初步ê台文。漸漸咱發現講愈chē，想愈chē，代誌會愈複雜，咱ê文字會愈寫愈深，愈幼秀，日久月深咱ê文字就會tī樹叢ê枝頂生滿大葉小葉kap大蕾細蕾ê香花。咱「台文通訊」 ê運動性tio̍h知咱ê形式是已經達到完全ê地步，咱mā有缺點需要改進，所以咱ài用幼秀細心ê頭腦，用感性同情ê心懷，來一點一滴培養咱ê花葉；咱m̄免驚量chē、理論chē、作品chē，m̄免驚眼前台文世界ê局部性，咱第一ài警誡ê就是m̄-thang講大聲話，m̄-thang bē記得咱優秀純全ê「本質」，tio̍h用謙卑ê心去耕作、去評判、去研究、去選擇、去創造，按呢咱台文一流ê風格就會緊緊遍滿tī各種文學kap學術文獻ê中間。進步ê意義在tī不斷ê運動，台文ê運動性就是台文更甦ê過程。咱對粗枝進入幼葉以後，絕對mā無beh停步，咱tio̍h-ài koh khah深、koh khah闊去繼續發展（Spiral Movement)，hō͘後代ê台灣人用咱ê成果去進一步再評判、再選擇、再創造更新，hō͘台文變做kap日文英文中文仝款，是一個世界公認ê普世性ê文字形式。

結論就是咱台文運動是建立tī對運動ê內涵kap價值ê認識；運動tio̍h把握咱ê本質，用本質做中心；運動tú著矛盾對立阻擋是必然ê現象，有這個對立發生才是考驗台語文化ê深度ê機會，最後就是咱tī運動中，tio̍h不斷追求台文koh khah深、koh khah闊ê發展，早日建立台文tī世界ê文化地位。

（本文是「台文通訊」第32期ê社論，July 1994）