鬥陣來推廣台文通訊
– 陳柏壽 牧師 –
聰美是一位醫生,伊也是一位平凡ê台灣婦女,但是伊過了偉大ê一生。伊kap伊ê夫君伊藤邦幸醫生結婚了後,相牽去偏僻ê NEPAL做醫療服務七冬,轉去日本後,伊用井上魯頓ê名,每個月奉獻日票五萬kho͘ hō͘「台灣青年」雜誌做台灣獨立運動ê路用,按呢繼續20冬無停,一直到伊過身六冬後,伊ê故事才tùi日文翻譯過來hō͘大家知影。這個故事已經tī台灣教會公報、台灣公論報,以及美國台灣同鄉聯合鄉訊等報導,引起海內外台灣人真大ê共鳴,大家踴躍獻金,所獻ê金額也攏有經過台灣教會公報社、衛鄉台灣教會、波士頓台灣教會等,直接寄去hō͘ tī哈佛大學進修中得中風ê夫君伊藤先生。不幸伊藤醫生已經tī今年(1993)八月初八腦充血別世。
1993年一月初三聰美姊ê家屬提議今後所有ê獻款,最好來設立「聰美姊紀念基金」(CHHONG-BI MEMORIAL FUND),主要ê理由是beh繼承聰美姊ê心願kap精神。聰美姊ê精神就是一世人無愛出名,一世人tī人生(生六子女)ê重擔下,無kap人計較,靜靜teh獻心祈禱,pēng實踐奉獻ê精神,所以這個基金會ê宗旨,就是beh喚起台灣人做草根運動者,無beh出名,無人知,但是熱愛台灣,為著前途獻身ê文化教育、地方ê工作者;chia ê人ê精神就是kap聰美姊ê精神仝款。
Taⁿ tùi這期開始,聰美基金會beh開始承擔北美「台文通訊」發行ê責任,阮大家一方面謹慎,一方面感謝。謹慎,因為阮知影che是一個拓荒ê工作,「台文通訊」今後會繼續成長抑是退步,阮攏負一部分ê責任;感謝,因為阮是teh收成一個田園,幾年來「台文通訊」經過國內外chē-chē有志有心ê兄妹ê開墾灌沃,雖然是一份小型ê雜誌,但已經看會出是一片真súi ê田園,阮無流汗(kōaⁿ),kan-na收成,實在不配。
總講一句:阮一定beh繼續拍拚盡力,用祈禱來iā種、來經營,用一個傳道人ê心,只有認真工作,收成ê代誌交hō͘上帝去做。相信有一日咱ê後代會因為咱這代ê犧牲kap努力,會tàng大聲歡呼感謝去收成。
讀者兄姊今後請繼續支持這份雜誌。有關稿件、編輯、印刷ê工作請繼續kap洛杉磯ê「台文通訊」社聯絡。但是有關「通訊」ê訂費、獻款以及其他財務方面ê事務,請攏kap阮聯絡,捐款會tàng抵稅(No.12485535)支票請寫hō͘:
CHHONG-BI MEMORIAL FUND
C/O WESTCHESTER TAIWANESE CHURCH,#1,
THE HIGH ROAD,BRONXVILLE,N.Y.10708
編註:「台文通訊」ê財務北美kap台灣分開,北美負責編輯、製版kap北美發行ê費用。台灣負擔tī台灣印刷、郵寄、辦公等費用,今年台灣ê財務由『台語傳播公司』負責,頂年台灣版ê「台文通訊」因為免費寄送ê分數真chē,財務有嚴重ê赤字,請台灣讀者特別來關心,hō͘「台文通訊」會tàng維持目前ê發行量。
捐款繼續郵撥到16530211陳豐惠。
投稿抑是針對編輯內容ê意見請直接聯絡編輯部:
Taiwanese Writing Forum,
22115 So, Vermont Ave.
Torrance, CA 90502
Fax: 0021-310-618-1580.
No Comments