離開故鄉愈遠，心愈近故鄉
＜維也納牧會筆記＞

-陳柏壽 牧師-

全歐洲ê台灣同鄉會（chit-má改做台灣協會）kap奧國ê奧地利台灣協會tī維也納舉行二二八紀念大會ê時，交代我主講，我看著外交部交流處ê處長mā坐tī hia，tùi頭聽到尾。我用舒伯特ê Lindenbaum（菩提樹）hit條gín-á歌作引言，講二二八是咱台灣人心靈寄託ê所在，會後有幾偌（jōa）位讀音樂ê台灣學生走來kā我講，in真愛hit條歌。

我tiāⁿ-tiaⁿŽ teh想，來到遠遠天邊ê維也納teh討thàn ê台灣人實在偉大。Tī chia in無依無倚，只有靠家己ê雙手，語言bē通，路頭青疏，種族無仝，hō͘人岐視。總是真chē tī歐洲ê台灣人，離開台灣故鄉愈(lú)遠，心愈近台灣。台灣人ê民主獨立運動，tī歐洲bē輸tī日本kap美國。In大部分tòa tī chia二、三十年，mā有人tòa四十年，tī chia生根立業。雖然離開台灣真久，卻是繼續關心故鄉台灣ê政治，亦繼續ûi-lúi（包圍）tī十字架下ê教會，大家相親，互相鼓勵奮發。

維也納是全歐洲台灣人khah集中ê所在，大約有一千位，全奧國大約有二千個台灣人。其他所在ê台灣人攏分散，無集中。這間「維也納台灣基督教會」是歐洲唯一ê一間台灣教會，是登記tī奧國政府正式ê國家教會（奧國政府只有承認路德宗kap長老宗作國家教會）。Tī美國加州ê台灣福音教會（台福），透過各種管道，想辦法說服維也納台灣基督長老教會加入台福，包括應允免掛「台福」名稱，牧師薪水全部負責等奇奇怪怪ê提案，攏無hō͘本會同工接納，最後台福派一位in ê牧師，駐在tī本城講北京話ê「中華教會」準備繼續進擊。

生活tī這個物質上不如英法發達，但是精神思想方面thang講是中世紀以來歐洲ê泰斗ê維也納，thang講是全球知識人kap藝術家心中仰望ê聖地，一世人最少tio̍h朝聖一擺。可惜tī chia teh討thàn生活ê台灣人，一般攏為著顧三頓，完全無liōng-siōng ê時間kap精神去進入hit ê khah高(koân) ê境界。In人人kan-na有一個心願，就是犧牲in家己，期待in第二代以後ê kiáⁿ兒孫會tàng有一日tī奧國這個寶貴ê國家生根出頭天。請咱兄弟姊妹迫切為流浪tī奧國ê台灣人祈禱，願主憐憫看顧帶領in ê前程。

（本文刊載tī台灣教會公報，「鄉土心情」，04/14/2002）