語言「聖域」者ê拍手

-陳柏壽 牧師-

頂禮拜羅王明珠女士用日語請安ê風波，僑務委員長張富美向國會議員道歉，引起民間稱呼張女土為「道歉委員長」ê諷刺，因為民間對伊就任以來，khap-bōe-tio̍h (動不動)就道歉ê行為，真bē-tàng認同。道歉應該是非常ê行為，m̄是正常ê行為。世界各民主國家ê政治家，任何道歉行為應該牽連著伊ê政冶責任。

但是這項代誌無應該道歉。張女士ê道歉已經加添語言聖域主義者ê勢力，in已經有法度一步一步將所謂「國語」ê地位神聖化；有一日凡若tī公開場合無用北京話發言，攏會親像張女土同款，受in ê包圍kap譴責。Hit日若到，所有母語，包括台語、客語、各原住民語，就永無回天之日，台灣文化就完全變色啦。

用社會文化學來分析，任何語言使用者tī人囗百分之三十以下ê時，就會快速絕滅。眼前台灣ê社會，就是tī這種狀態。經過最近語言ê調查，公開場合使用「國語」ê比例，尤其是tī都市，幾乎佔百分之八十八，青少年tī學校差不多有百分之九十八用北京話交談。不但客語、原住民語已經瀕臨死境，連佔人口絕大多數ê台語，亦面臨絕種危機。

雖然是按呢，主宰台灣社會教育ê主流媒体還繼續趕殺僅存ê年長ê台語人囗。In時常推出訪問年輩ê台灣人ê節目，問答攏用無標準ê北京話，誤導整個台灣社會，hō͘人認為連這老ê阿公阿婆mā攏講「國語」，hō͘ in變作國語語言統戰ê「樣板」，來達成斬草除根，寸草不留ê最後目的。

對美國轉來長榮了後，我攏用台語教冊。Tú開始學生接受ê能力有困難，但是慢慢á講，好好á講，漸漸學生攏會接受。不但tī課堂，就是學校正式ê會議，長榮mā有真chē先生用台語發言，大家mā攏會接受，因為凡若tī台灣大漢ê人，無論in ê父母對tóž位出身，tī in心內最深ê所在攏有蘊藏著對台灣語言文化ê疼心kap根本。

頂拜六長榮大學有邀請林金莖博士來參加應用日語系創設慶祝酒會並演講。林先生是長年駐tī日本ê資深外交官，有幾十年代表本國主宰日本外交ê經驗。伊演講ê主旨除了強調bē使用「台灣」名稱來申請加入聯合國；無必要將蔣介石ê銅像推翻；「中華民國」ê存在是證明「中華人民共和國」不過是一個叛亂團體等非常無合台灣社會現實ê言論以外，引起學生最大爭議討論ê問題是伊對台語ê評斷kap獨斷ê態度。林先生雖然是台灣人，但是伊公開宣佈台灣話不過是中國沿海ê一個「方言」，為著kap中國接軌，咱攏來講國語就好。相信這種論斷式ê言論不但繼續會tī本大學燃燒淨化，社會上台灣人睿智mā會真緊分辨是非。

咱絕對m̄-thang hō͘語言基要派贏過，咱絕對m̄-thang hō͘「捍衛北京話正統主義者」繼續tī台灣逞兇。Tī咱ê台灣無應該有語言ê「聖域」。要建立一個新koh獨立ê國家，亦需要建立咱家己ê文化kap風格，咱ê文化最大ê因素tī咱ê母語。起造tī母語文化基礎ê國家，才是堅實ê國家。

（本文刊載tī自由時報，2002年10月15日）