無母奶文化ê台灣心靈
-陳柏壽 牧師-
根據台大教授黃宣範tī「語言、族群、社會」hit本冊內面ê資料，日本統治台灣五十冬了後，台北市內祖孫之間有teh講台語ê有30%，經過國民黨外來政權統治50冬以後，祖孫á中間有teh講台語ê剩無3%。
這兩個外來政權來攏徹底實行「國語政策」，che m̄是偶然，是in刁工設計ê語言屠殺政策，beh來消滅台灣人ê民族意識，hō͘殖民者會tàng達成少數統治ê目的。到taⁿ原住民語已經hō͘ in消滅kah強beh無去ah。客話、福佬話若無趕緊立法保護，免koh幾冬mā是脫bē出去hō͘「國語」滅種去ê命運。
母語喪失，天倫之樂、民族自尊心mā喪失，看輕家己父母ê文化，顛倒去認同用白色恐怖ê手段來壓迫咱ê外來語言kap文化。殖民者ê法統蔣中正死幾偌冬ah，mā猶koh有一kóa認賊作父ê孝子三不五時就去慈湖拜祖來維持政權ê「正統性」。
台灣人ê心靈經過這種外來政權「國語政策」長期ê洗腦，產生嚴重ê扭曲。Tī外來「國語文化」高壓ê統治下，台灣人m̄敢使用家己ê母語，m̄敢照心內ê意思講話。Taⁿ chit-má政治上有形ê壓制無去ah，m̄-koh長期白色恐怖ê驚惶，潛入去咱心靈上深ê部分，不知不覺teh監視咱、限制咱，致使台灣文化猶行bē出中國殖民「國民文化」ê陰影。咱台灣人ê心靈帶著長期性ê「中國病」，三不五時就走出來teh作怪。咱ê作家平時台語講著嘴笑目笑，giâ筆beh kā in ê感情kap思想寫出來ê時，hit個bih tī心靈內底ê中國陰影就走出來控制in ê思想，結局是台語變中文。咱ê政治家競選ê時，用台語kā咱giú票，當選了後去到「在台灣ê中華民國」，hit個bih tī心靈底層ê中國陰影mā是koh走出來，舌就開始捲起來，bē記得in是啥人kā選ê。Koh khah可憐ê是一kóa台灣籍ê中國文人，in m̄-nā無承認家己是母語ê文盲，顛倒去幫忙中國文化殖民主義來打壓家己父母話文化ê發展。
現代文明ê進步第一明顯ê所在，是人類心靈ê空前發達，差不多作一個人ê理性kap良心所會瞭解ê真善美，人人攏有一致ê共識，che叫做成熟ê現代心靈（spirit-come-of-age）。台灣tī中國文化kap政治口號ê教育下，一般人，尤其是掌權ê政治家，連最基本ê基本人權mā m̄ 知，beh按怎作一個現代人呢 ?
最近台南縣文化中心1996年出版ê＜陳雷台語文學選集＞tī＜李石頭ê古怪病＞hit篇小說內，雖然經過原作者親自三、四遍ê校對，但是最後出版ê時，冊內所有影射蔣介石ê人名kap地名，攏經過編輯ê烏手kā in亂改，改kah不tah不七，面貌全非(詳細請讀＜李石頭ê古怪病＞hit篇文章)。Che敢是咱台灣人ê「中國病」猶bē完全醫好，hit個bih tī咱心靈底層ê中國陰影tī台灣人beh出頭天ê時，koh走出來teh作怪？減採編輯出版ê人認為in出錢，就有權利kā人亂改內容，m̄知che是侵犯著最基本ê作者人權，in hia ê人ê心猶hō͘蔣家統治時代白色恐怖ê陰影佔領著，非常可憐。Che反應出台灣人包括智識份子，甚至所謂「台灣文化ê工作者」，in ê心靈離開現代文明ê標準真遠。
台灣政府最近因為連續凶惡案件攏無法度破案，造成社會民心不滿，結局宣佈兩種方案：一是喊出「治亂世用重典」，意思是講「若hō͘我掠著，你就隨死 !」第二是講beh設立所謂「指紋銀行」，講beh hō͘全國每人ê手紋攏留tī電腦作資料。敢講這款話ê政府，不但無將民意司法機構當作存在，根本就是一種非常幼稚膚淺ê橫霸ê權威，是另外一種心靈落伍ê病症。
現代文明國家，無一國ê政府會強迫人民蓋手紋作記號。蓋手紋是限定對付罪犯、新移民人士、文盲而已。手紋是一個人最基本ê隱私權，一個人ê指紋是伊最基本ê人權，只有伊kap上帝才有知影ê權利，絕對m̄是m̄知啥物是基本人權ê台灣政客所體會會到ê境界，指紋m̄是政客一句話就會tàng侵犯ê作一個人ê最後ê尊嚴。
台灣人ê心靈因為無母胎文化ê保護，所以變到非常脆弱、非常無安定。台灣人ê心靈本來是世間眾族非常豐富、敏感、優秀ê一種，但是受中國ê「法統」、「道統」破壞五十冬了後，淪落做世間ê三等國民。這點大部分受國民黨教育ê人差不多攏bē自覺。
好佳哉，台灣民族有真強ê蕃薯m̄驚落土爛ê精神，每一次受thún踏，每一次就koh puh芽發íⁿ，親像火燒山過ê台灣百合花，繼續beh開花，將純真ê海島文化kap語言kā in傳落去、湠（thòaⁿ）落去。
Beh救台灣人ê心靈，beh叫醒台灣人ê靈魂，beh hō͘台灣心現代化，絕對m̄-thang聽政客teh喝囗號。只有一條路：咱人人khiā起來，用清氣ê心，重新作台灣人，言行舉止攏用最光明、最善良、最尊貴ê台灣母胎文化作基礎，來重建台灣心靈ê現代化。
（本文是「台文通訊」第51期 ê 社論，Feb.,1998）
No Comments