台灣需要啥款ê教育改革？
-陳柏壽 牧師-
由「台灣國民黨」主導ê「中華民國在台灣」有一個真奇怪ê現象。你若問in講台灣ê主權敢有獨立? In會kā你應講台灣是一個主權獨立ê「政治實體」，有ê人甚至會kā你講臺灣已經獨立beh五十冬啊! 你若繼續kap in講話，你會定定聽in講「我們中國人」按怎抵按怎，koh khah 慘ê是in若是用台語講，in 攏講「咱」中國人按怎按怎，連咱mā kā算入起in hit國內底，你若聽了bē爽kā伊抗議講你m̄是中國人，in馬上會kā你應講台灣人就是中國人無需要分kah hiah清楚，你若koh kap in hoe落去，好朋友好厝邊mā會為按呢來無爽快。
Che問題出tī tó位?明明tō是食台灣米大漢ê台灣gín-á，規世人mā m̄ -bat去過中國，明明tō是中國¡飛彈一粒一粒teh kā咱tōaⁿ，是按怎對中國攏bē死心? 講來講去問題攏出tī 教育。
台灣有公學校以來，攏是外來政權teh決定台灣gín-á tī學校ài學啥款語文、ài學啥款課程。外來政權按照in統治者ê利益來決定課程ê內容。日本時代台灣ê公學校教台灣gín-á講in是日本人，tio̍h-ài效忠日本天皇。國民黨時代ê國民學校教台灣gín-á「我們大家都是中國人」，強迫台灣gín-á bē使講台灣話，捲舌學做中國人，愈gâu捲舌愈sêng中國人，tī外來政權ê體制內面升學升官ê機會就愈大，tī日本時代beh食官廳ê頭路一定tio̍h-ài做「國語家庭」，改日本姓。
Tī這種殖民地語言屠殺集體洗腦ê教育制度之下，台灣人國家、文化認同混亂，是無法度避免ê。這種認同ê混亂造成社會ê不安，是台灣國防安全上大ê弱點。若無趕緊徹底改正外來政權ê殖民教育，建立台灣人ê台灣國民意識，不管外交形勢按怎變，台灣中國化是緊早慢ê代誌。
李登輝上台了後，真chē台灣人對伊有真大ê期待，當伊對日本記者司馬遼太郎講出「台灣人ê悲哀」ê時，m̄知有外chē台灣人暗中teh祝福伊會tàng真正做台灣人ê摩西，通過「脫中入台」ê本土化教育，來完成「寧靜ê革命」，引chhōa台灣人起造一個台灣人ê台灣國。所以，伊請李遠哲出來組一個體制外ê「教育改革委員會」ê時，真chē台灣人對「雙李」體制有一kóa幻想。
一冬外前「教育改革委員會」提出五項教育改革ê大方針：人本化、國際化、科技化、現代化…咱詳細kā想起來，這五項方針雖然是無m̄-tio̍h，但是伊並無講著台灣beh行出殖民地教育陰影上要緊ê重點–本土化。代先阮為著考慮集中力量對付中國保守派ê反對，對這項缺失mā m̄ 敢siuⁿ kā遣責。M̄-koh經過一冬外來ê觀察，阮發現「教育改革」主要討論ê內容攏是tī「承認中國大陸學制」、「kap大陸學術交流」、「研究所ê招生方式」等等kap台灣社會無要緊ê教育議題teh se̍h玲瓏，對台灣上迫切ê母語教育ê問題顛倒完全無teh要緊。阮實在看bē出目前「教育改革委員會」對培養台灣國民意識這項迫切ê工作有啥物對策。Che hō͘阮真懷疑「台灣國民黨」有台灣化ê誠意，繼續中國殖民地體制減採是in階級利益上好ê選擇。「教育改革」只不過是一個延續in政權ê生命ê一項政治騙術nā-tiāⁿ。
Tī chia阮beh koh再強調，台灣國民意識ê培養關係著將來台灣是是會tàng tī 國際社會成做一個現代化ê國家，mā關係著台灣ê國防安全、經濟永續ê經營kap主體文化ê發展。目前台灣ê教育是殖民地奴化台灣人ê教育，「教育改革委員會」上大ê功課在tī 廢除殖民地ê教育体制，hō͘台灣人來決定beh按怎照台灣社會ê利益來教育咱ê kiáⁿ兒。
（本文是「台文通訊」第48期ê社論， Nov.,1996）
No Comments