對奧國亡國講起

-陳柏壽 牧師-

奧國人變作真正ê奧國人是二次大戰戰後ê代誌。這其中有一段真悽慘ê歷史，值得現在ê台灣借鏡警誡。

第一次大戰後，奧匈帝國領土四分五裂，捷克、波蘭、Hungary、Yugoslavia各地宣佈獨立，奧國週邊土地受列國侵占割分。Habsburg王朝末代皇帝Kaiser Karl財產受查封，放逐到瑞士山區。Che kap戰後蔣介石集團ê運命有對稱。

1918年Karl Renner任戰後第一任首相，這時奧國ê去路有三個選擇：(a)建立多瑙河流域聯邦； (b) kap德國合併； (c)恢復Habsburg王朝。第一kap第三種ê構想代先反對ê就是捷克、Hungary、羅馬尼亞、Yugoslavia，連波蘭mā反對。In攏無願意koh屈服tī大體制之下。尤其是捷克首都 Prague，一但多瑙河聯邦出現，維也納自然形成聯邦中心，對伊發展大不利。

最後一項選擇就是德奧聯合(Anschluss)。這種構想hō͘奧國國內各黨各派攏存有幻想kap美夢：「天主教徒」認為in有法度連合南德天主教勢力，來對抗北部路德宗新教勢力，「自由派」人士認為連合會tàng對抗奧國傳統ê皇家貴族遺臣kap天主教勢力，「社會民主黨」認為結合德國會tàng廢除立場搖擺不定ê弱小ê奧國政府；「泛德主義者」認為建立普魯士帝國ê時機已經到啦！奧國國內ê「納粹主義」者koh-khah免講啦！各人有各人ê拍算，各黨派各有陰謀kap計畫，真自然大方向就向hit方面。今á日台灣面臨ê，是仝款ê危機。

1920年代基督教社會黨由克己嚴律ê Ignaz Seipel神父 (屬Dominican Convent)主政，大局猶算安定。Seipel神父住家只有簡單書房kap祈禱室，每日三餐亦真單純，伊坐火車去上班。十年執政中間為勞工起六萬間公寓，用最低ê價數租hō͘勞工使用。我有去市郊Heiligenstadt貝多芬住家附近，有看著連綿一公里以上ê紅色ê勞工住宅，非常壯觀。

但是到1927年奧國國內產生二派ê政治勢力，一派是右派ê Heimwehr，另外是左派ê Schutzbund。1928年二派發生暴動，前者因為有義大利Mussolini ê支持，取勝以後，隨時建立奧義聯盟。但是無想到1930年希特勒tī德國已經纂(chhoàn) 升，開始對奧施展壓力，1932年Seipel過身，Engelbert Dollfuss接任，當時經濟相當困難，政治上國內ê親納粹秘密結社亦大量產生。Che mā是咱台灣今á日可能產生ê危機。

當時Heimwehr黨以及Dollfuss首相ê構想是：連意抵制德國。義大利mā認為若是會tàng控制Heimwehr就有法度控制奧國。但是Heimwehr黨內ê人物，雖然政治上kap義大利連合心理上因為語言文化ê因素，傾向德國。
義人利tī 1933年tī經濟上對奧貸款支援，但是希特勒當年就宣佈對奧觀光簽證費每人1,000馬克(合約50英鎊)，用按呢斷絕奧國最大ê經濟來源，同時tī奧製造暴亂、火災，tī奧邊境附近設置重砲重兵，hit年奧國國內納粹黨員就超過40,000人，納粹黨人暗殺Dollfuss首相無成，國內左右兩派鬥爭激烈，1934年左派發動全國總罷工，右派tī維也納市長Emil Frey支援下，消滅左派，建立奧國法西斯政權。

左派受滅以後Dollfuss首相頒佈新憲法，號召『祖國聯合戰線』(V.F)，用愛國主義來號召各派人馬。伊雖然是一位獨裁主義者，但是一心一意希望kap義大利連合來建立奧國國家主義，維持國家獨立。但是當時ê歐洲世界，英國對hn̄g-hn̄g（遠遠）奧國無心情去關心；義大利ê勢力意見衰退；法國是tiàm tih無政府狀態，所有外援幾乎攏斷絕，最後ê一條可行ê路就是祭出愛國主義，但是已經bē赴了。

納粹ê勢力愈來愈強，對München來ê廣播24點鐘煽動奧國人起來推翻家己ê政府，散播不實謠言，人民對這種無骨氣ê政府已經喪失信心，對方漸伸出魔手，1934年7月25日納粹派人謀殺Dollfuss。Kurt Schuschnigg任新總理。

新總理上任，新憲法只實施三個月，國家主義祖國戰線已經無力，新總理本人亦努力beh將奧國維持作一個同屬德語系ê德國之外ê另外一個獨立國家，但是國內bē-tàng一致團結對外。希特勒看準準，伊ê眼光m̄-niāⁿ是tī六千五百萬德國國民，亦beh吞食這個六百五十萬人民ê小國才會滿足。希特勒真知奧國地頭雖然小，但是國際戰略地位真重要。當時ê西方世界，無瞭解這點。

1936年7月希特勒特使Franz Von Papen kap Schuschnigg簽約：(1)德國承認奧國ê「安全獨立」； (2)兩國內政互不干涉；(3)奧國了解並支持『德國國家主義』ê理想。仝年奧國內閣接納二位納粹黨員，大赦國內所有納粹政治犯，公私場合會使實施納粹禮。這種大妥協得著ê代賞，只有德國取消入境奧國簽證費每人1,000馬克ê規定。

到1937年，奧國內閣閣員已經有四位納粹黨員，1938年2月奧國總理tī Berchtesgaden會見Hitler，滿心期待一個「關愛ê眼神」，但是希特勒率領三軍將領參會，當面hō͘伊歹看。後來總理tī日記中寫講 ：「Tī仝款講德語系ê人種中，我一世人猶m̄-bat想到這世間猶有這種橫霸、野蠻、不信、不義ê人物。」

這位「領袖」(Führer)對奧國總理提出ê條件是：(1)所有奧國內閣官員必須是納粹黨員；(2)奧國必進行反捷克運動；(3)奧國脫離國際聯盟；(4)奧德貨幣統一化。以上條件奧國若接受，德國就會「接受並尊重奧國ê獨立地位。」

Schuschnigg講che是伊人生中第一孤單ê時刻。但是伊轉來維也納向國會演講ê時，伊猶是強調奧國必須燭立，亦「已經」獨立。伊講奧國無需要德國ê支援，亦有法度獨立。伊ê演講hō͘全城ê人攏出來大路Ringstrasse向伊歡呼，社會黨宣佈全力支持，哈佈斯堡就王朝亦對比利時khà電報來支持。

接落去首相想出第二項怪戰略：宣佈三日內舉行全國全民投票，決定國家前途。這招真厲害，連Hitler mā想bē到。如果真正實施公民投票，至少75% ê奧國人會支持Schuschnigg。

3月13日是預定公民投票日，3月12日奧國內閣中兩位閣員提議停止公民投票，並要求首相下台。奧國軍隊這時已經無力出來維持大局，而且武器kap飛機破舊，首相要求大家避免抵抗，避免流血，只有懇求「上帝拯救奧國」按呢nā-tiāⁿ。

3月12日德國陸軍tùi  Linz直接開入奧國。隔日，3月13日，希特勒就tī維也納市中心ê「英雄廣場」用德語向全國人民演講，接受人民歡呼。奧國就按呢淪陷入仝款講德語ê德國手內，變作大德意志帝國中一個卑微ê「東方省」(Ostmark)。古早以來ê奧地利東方帝國（Österreich)就tùi歷史ê舞台消失。

Tī奧國牧會，讀著奧國亡國ê歷史，想著台灣故鄉ê政冶現狀，感覺需要再次將伊ê歷史掀開開tī眾兄姊面前，作咱ê警誡。願上帝引導咱行獨立建國ê路。

(作者是駐維也納台灣基督教會牧師)
（本文刊載tī「台灣公論報」kap「台灣教會公報」7/Feb/2002）