奧國，m̄是“Àu-kok”

– 陳柏壽 牧師 –

奧國（Austria，德文叫做Österreich，Ost東部，Reich帝國，是tī東方ê帝國ê意思）人口只有約七百萬。雖然奧國人講德語，但是歷史以來，奧國人攏身以奧國為榮，無人認為in是德國人。古早有一段真長ê歷史中，奧國不但管轄德國，甚至管轄全歐洲大陸，一直到荷蘭ê海邊。到德國希特勒興起，反轉受德國吞併，二次戰後，才宣佈獨立。「奧國」kap「德國」ê關係，會使用「加利利」kap「猶太」，抑是「台灣」kap「中國」ê對比，就khah容易理解。

奧國ê經濟無真好，討thàn生活無簡單。奧國ê政府用「工作證」來控制外國來ê移民，所以tī維也納生活ê台灣人，除了學音樂ê學生以外，thang講清一色是開餐廳，其他政治、教育、商業等機構，真少有台灣人參與ê空間。

雖然經濟無好，但是奧國是一個文化水準高（koân）ê所在，尤其是尊重人道kap人權ê精神，值得人欣慕。會友kā我講兩個故事，kap大家分享：

有一個台灣人，奧國話聽無，暗時beh坐火車轉去維也納，一個人gông-gông khiā tī月台頂等車，車頭ê站長走來kā伊講，尾班車已經過啦，m̄-thang koh tī chia等。天寒地凍ê暗暝，站長kā伊講koh講，但是看伊ê眼神，就知影伊一句tō聽無，伊猶是gông-gông khiā tī hia。站長想著有一班快車會經過這個車站，這個小站快車無停，但是站長緊用電話kā快車司機拜託，拜託伊到這個小站小停一下，hō͘這位m̄-bat德語ê老人上車轉去維也納。

另外一個故事mā是仝款。教會內有一位蔡太太，有一日坐m̄-tio̍h車，後來發現ê時，火車已經beh到匈牙利ê邊界。若是入去到別國beh轉（choán）車轉(tńg)來就真困難，蔡太太就去kā火車司機講：我厝內有âng-eⁿ-á teh等我轉去飼奶。司機聽著âng-eⁿ-á tī厝裡等飼奶，是天大地大ê代誌，就緊緊khà電話，通知對方開過來ê火車，tī兩台火車beh sio-siám車ê時，停一下。結果，tī田野ê山邊，火車司機手牽蔡太太行過鐵枝路，送伊到對面ê火車，hō͘伊坐oa̍t頭轉去維也納。

這兩個故事是實在發生tī維也納台灣教會內ê代誌，講出奧國，m̄是“Àu-kok”（二流ê國家），真正是一流ê國家。

 (本文刊載tī「台灣教會公報」，03/17/2002)