Mele Kalikimaka Tī Hawaii 過聖誕

– 陳柏壽牧師 –

「Mele Kalikimaka！」就是本地話ê「聖誕快樂！」ê意思。你若會曉用這句kā人恭喜聖誕，表示你是在地人，物件賣你半價。另外，你若將阮ê Hawaii唸作Ha-wa-ií，人tō知你是外口來ê。Tio̍h-ài唸作Ha-va-ii才tio̍h。

阮搬來Hawaii今年是過第三個聖誕節。聖誕若到，阮hit位New York生ê第四kiáⁿ就kāu-kāu唸講：「無成聖誕節！樹葉á是青青sìm-sìms，天空亦無落半片雪！」我知影伊心內第一懷念ê，是白色世界ê White Christmas。講he才是「真正」ê聖誕。會記得有一年聖誕ê中晝，氣溫koân到攝氏30度。

想著古早tī孔子廟邊大龍峒（tōa-lông-pōng）教會ê聖誕節，無論透骨ê北風按怎厲害，阮TKC青年團契有人踏li-á-kah（三輪車ê “rear-car”），有人騎鐵馬，去一間一間會友ê厝報佳音，兼收pháiⁿ銅舊錫簿á紙，來變賣作團契ê費用。每年ê報佳音，人人唱「平安暝，聖誕暝」唱chiâⁿ百遍，嚨喉唱到sau聲，但是青年人ê心肝火熱。我流浪全世界去到tó位，若想著hit陣ê聖誕節，攏感覺著是我人生上幸福ê一段。阮hit水（仝期）ê青年，親像仝期ê櫻花，作伙到，同齊離開；但是花開到eng-phōng-phōng，開到真燦爛美麗。我hit期有真chē人去作牧師。

台灣來ê「蕃薯仔」tī Hawaii大概有6,000粒，大部份攏tòa tī阮這粒「芋仔 」（Oahu）島。有人tòa三十外冬，tòa到面形攏變作芋仔蕃薯，m̄知伊是芋仔，抑是蕃薯！？In會tàng tī chia tòa落去，適應落去，有一種蕃薯仔ê潛能kap智慧：將芋仔kā變作蕃薯。譬如講，阮兜門口往東去ê主幹公路叫Kalanianaole，蕃薯仔千記萬記to記bē tiâu，攏唸作「腳那會hiah-nih烏leh ！」；Waikiki Beach叫作「歪koh khi-khi！」；人teh海中看魚á游水ê Hanauma Bay，因為去tio̍h爬koân爬低，叫作「阿媽，un-ná爬！」；人人買貴sam-sam ê高級市場 Ala Moana，叫作「啊那無欲啊那！」；教會頭前ê hit條路叫作「你好！你好！路」（Liholiho Road）。

Tùi上東ê「阿媽un-ná爬」駛向上西ê陳執事種蘭花ê Waianae，若無tòng車，免一點鐘tō會到。「芋仔」是一粒真小ê島，但是全州將近70% ê人口攏集中tī這小島，是全州ê政治、教育、文化ê中心。阮有三條值得誇口ê「州際高速公路」（Interstate），mā攏用美國本土ê皇冠作記號，大大字寫H-I，伊不過30哩（H-2，有7哩外長，H-3是新起ê，mā不過chiâⁿ十哩），koh駛tō駛落去太平洋啦！人客若來，阮攏kā人講阮ê高速駛公路是「世界一」ê。

阮對外宣傳「世界一」ê，猶有阮ê海水。阮四周圍ê太平洋攏是深海，海面佔地球全體ê三分之一，親像地球ê腹肚。有一日，上帝忽然hō͘太平洋ê正中心火山爆發，阮這個Hawaii島才浮出來，親像是地球ê腹肚中心ê肚臍。肚臍是生命的源頭，地球ê營養攏是tùi阮chia灌入去ê，所以阮代表人類生命ê中心。海水青ssìm-sìm。

六個島ê四周圍不管時有tùi墨西哥沿赤道向西行ê黑潮，黑潮內有tùi台灣西岸、日本生卵出產ê海龜，in過Aleutian群島、Alaska、加拿大、美西、墨西哥，才s˜h到阮Hawaii。TĪ Hawaii歇睏六個月，看觀光客，遊覽各地，in才koh se̍h去Philippines，轉去台灣。按呢se̍h一 lèng（圈），差不多六、七冬。In一世人活六、七十歲，所以in一世人來訪問Hawaii十擺。來到Hawaii，看著chiah-nih súi ê海，迷人ê海，一日有36種ê色彩，tùi淺綠到深藍，koh有親像細粒珍珠ê白砂ê海灘。

每年十一月tī阮四周圍海邊，有另外一個遠路來ê人客，就是tùi Alaska來ê海翁（鯨）。In一對一對來阮chia生kiáⁿŽ，就是阮厝ê鑽石山（Diamond Head）對面ê海面，時常有海翁雙親kap新生kiáⁿŽ噴水thit-thô ê風景，一直等到明年三月in才會轉去Alaska。

Hawaii天氣chiah-nih好另外一個原因是貿易風（trade-wind）。一年365日，一日24小時，貿易風tī地球ê肚臍四圍teh吹，hō͘阮冬夏ê溫差只有二度，亦hō͘阮ê寒天無成寒天，koh有雨水。鑽石山開始變綠色ê時，人就知聖誕節beh到啦。阮ê隔壁島Kauai一年落雨12,344mm，是世界落雨上chē ê所在。

因為有「貿易風」，阮ê祖先差不多一萬年前tō已經tī南太平洋ê大島小島中間，用帆船自由來往，所以人叫阮作南島民族(Oceanic／Polynesian People)，是「世界第一」ê海洋民族。恁若來Hawaii，看著阮ê面，kap恁tī台灣生作仝款仝款，免奇怪，因為阮本來kap恁就是仝種族ê祖先。有科學家已經發現阮ê祖先ê起源地原來就是台灣，因為台灣是南太平洋中ê大島，物產豐富，自給自足，幾萬年前就是南島民族文化ê中心，kap漢民族黃河作中心ê文化完全無關係。一直到今á日阮kap亞洲大陸民族第一無仝ê所在，就是阮ê海洋性格、阮冒險ê海洋精神。一隻獨木舟，khah遠ê海島阮to去！

古早阮掠著第一尾親像炸彈ê大尾魚，阮阿爸真歡喜，叫講：「啊！魚á！」；掠著另外一尾，mā真大尾，就講：「這尾，mā魚á！」；第三尾掠著是青綠色ê扁扁，mā叫講：「Mā魚á！mā魚á！」所以今á日你若來阮Hawaii ê魚市場，阮土產ê三種有名ê魚，就是：「Ahi，Mahi，Mahimahi！」你講阮ê話kap台灣話有仝款抑無？

阮這「世界一」ê物件，講mā講bē了：無風颱，無地動，水清氣，無毒蛇。講著水，恁一定bē相信，阮無溪，無湖，beh按怎有淡水？原來阮攏是積落雨水來lim ê。台灣人講：「好天toh積雨來糧！」；阮是「落雨天toh積好天水！」阮ê水雖然是無像NewYork水冷sǹg-sǹg，是lah-lun-siô，溫溫a，但是阮tī觀光手冊內，攏寫阮ê水是全美第一，恁去全島se̍h透透，水道頭開開就會tàng lim。

今年已經第三年ê聖誕，漸漸我會感覺著我ê肉體kap生理上有進入本地ê自然條件。親像門口hit欉雞卵花（plumeria）kap鳳凰花（flamboyant）到十一月，雖然氣溫猶真kôaⁿ，伊ê葉á自然會落了了。仝款，我到十二月暗時睏tio̍h加蓋一領棉被。我ê肉體已經去hō͘ Hawaii同化去了。

但是另外一旁ê我，精神意識ê我，猶未。我時常kā我ê會友講，任何時陣你若產生「世界一」ê滿足ê時，就是已經家己設定界限ê時。Hawaii ê自然條件和諧美麗，並無相對表示咱ê人文思想意識型態亦仝款行tī人ê頭前。人畢竟是生活tī逆境中才會奮進ê動物。人將毒蛇tī島上thâi kah光光，表示自然生態另外一面ê不平衡。生態平衡，是一種戰鬥競爭中ê平衡。無蛇ê所在，kap人ê心理仝款，缺少一種對立ê力量，精神kap意識ê奮進kap抗疫ê能力亦減少，自然容易滿足，容易變作「古井水雞」，認為家己是「世界一」。

這三年中hō͘我感觸第一深ê代誌，就是Hawaii ê「Aloha」。人人嘴唇邊攏掛一個Aloha。Aloha本來是人人平等友善互待ê意思，但是我世界se̍h透透，看著階級意識第一深ê所在，就是Hawaii這個所在。Tī本地居民ê深層意識ê內面，潛伏著一種無限ê階級封建觀念：種族階級、經濟階級、語言階級、職業階級、學歷階級，kap真chē普通人想bē到ê階級隔閡。這個階級心理，攏蓋(khàm) tī Aloha ê魔術口語ê下面，活跳跳teh存在。有意無意ê中間，我看著大部份ê在地人，對khah koân階級人物ê崇拜、敬畏、屈服，kap神聖不可侵犯、百依百順ê態度，自然產生一種陰溼、自私、自滿、自大ê典型ê「島國根性」ê心理。

Tī攝氏30度ê Hawaii過聖誕節是一種人生中真大ê挑戰，一種對精神意識真大ê挑戰，一種對沈重ê靈魂ê真大ê挑戰，一種對我整個人生ê進路ê挑戰。

（本文刊載tī「台文通訊」第83期，Jan.,2001）