海外台僑ê時代責任

-陳柏壽 牧師-

板橋有一間嘉隆成衣廠，舊年熱天「台灣中國人」ê朱老板宣佈關店，kā廠房移去印尼生產，留一百外位女工bo̍k bo̍k泅（siû）無位好去，無遣送費、無退休金、無頭路。一、二十冬所tòa ê工寮，一聲斷水斷電，頭家變做生分人。佳哉有勞工陣線ê好兄弟出面，chhōa in抗爭。看著抗爭ê錄影帶hō͘海外ê台灣人兩大感想： 第一、tī台灣ê社會，愈無讀冊ê人，教育愈少ê人，soah愈bē曉講父母話。Hia ê女工teh開會、唱歌、kap記者講話，差不多攏用中國話；第二、台灣ê勞工抗爭ê過程中，潛在著對資本家ê權威ê尊敬、妥協、屈服ê意識。當嘉隆老板最後受壓力，答應發一部分遣送費ê時，女工規群kā「董事長」抱teh哭，目屎流目屎滴，感謝頭家ê「恩德」。

抗爭是人類歷史進步ê動源，但是「抗爭」這款天賦人權需要「抗爭文化」來培養。台灣人hō͘國民黨威嚇統治半世紀以後，soah變做世界第一無抗爭意識ê民族。下層ê勞工，只求增加幾仙錢ê收入來顧三頓；中層ê人逃避現實，環境bái、政治bái、教育bái，in ê本能就是錢存去外國銀行，送gín-á去外國讀冊，逃閃主義ê精神氾濫；頂層ê人，古早猶有teh喝台獨出頭天，chit-má差不多清一色加入選舉，人人tio̍h「官病」，人人爭做黨主席、國會議員、省長、縣長，陷落tī体制內ê深淵，無法度自拔。

Koh Khah嚴重ê是tī文化意識ê層次，全台灣無論國民黨抑是民進黨，無論總統抑是thakhusi (taxi) ê ùn-chiàng (司機)，差不多攏喪失in ê文化ê自主性，淪落做中國文化ê奴隸。中國文化本來是一個奴隸性真重ê文化，看外囗人khah重，看家己bē起。In不但做世界文化ê奴隸，soah mā beh培養台灣人kap in仝款，hō͘台灣人變做一個無根、無靈魂、無理想ê奴隸文化ê奴隸。

幾十年來，台灣ê反對運動有產生一個真誤導ê觀念，講「台獨ê第一戰線tī島內」。Chit-má台灣人才發現：反對運動teh分島內島外是中著統治者ê計。Tī思想kap文化ê戰場，統治者真正驚ê，m̄是島內，真正驚ê是海外ê台灣人。海外ê台灣人生活tī自由ê世界，思想意識良心攏khah客觀純情，受著中國文化污染ê環境真少，所以幾十年以來，海外ê台灣人一直有法度維持真強ê台灣意識，用純粹ê良心、客觀ê眼光，來推動台灣獨立運動。Che kap海外ê猶太人teh款待以色列國仝款，不但kā伊全力支援、鼓勵、加油，mā teh kā伊監督、促進、指責。猶太人ê民族國家運動絕對是世界性ê運動。

咱台灣人國家民族ê獨立建國運動，koh khah是仝款：不但無應該分島內島外，島內ê人民kap統治階層，koh khah應該用謙卑好意ê態度，來接納海外傳轉來ê良心、道德，kap智慧ê聲音。實在講起來，島內看bē著ê世界，看bē著ê純全ê台灣文化，看bē著ê純全ê台灣家庭，看bē著ê台灣人最高ê靈魂kap理想，只有靠海外來供給。海外純全ê台灣文化實在是台灣新文化ê光源kap希望。

再過一年，咱就beh紀念台灣脫離中國一百週年ê紀念年 (centennial)。Tī這個世紀ê中間，咱台灣人用血用目屎teh反抗兩個外來政權–日本仔kap中國仔。經過一百年ê訓練，台灣人漸漸有結出台灣精神kap台灣民族主義ê果子。但是，今á日咱面臨ê是台灣人奮鬥史中，第一大ê危機ê時代，因為抗爭ê文化失迷消沉，反体制ê精神喪失，咱漸漸teh bē記得一百年ê苦難ê歷史。「忘」記，就是「心亡」，心死去ê意思。一個bē記得歷史ê民族，就是靈魂kap理想死去ê民族。

海外ê台灣人kap所有島內ê台灣人攏m̄通陷落tī這個不幸ê結局，因為咱台灣人是一個真優秀ê民族。咱beh繼承反抗ê香火，咱beh活tī歷史記憶ê內面；咱台灣人是一個有活力、有理想、有歷史（Anamnesis) ê 民族。

俗語講：「一枝草，一點露」，無論生活tī島內或是海外，每一個台灣人攏有伊真高天賦ê定點、地位kap價值。這枝草tī海外tú著ê強風暴雨kap無情ê社會ê打擊，可能比島內khah大；這枝草，去到全世界ê天涯海角，kíⁿ nā面對著中國人以及中國文化ê挑戰ê所在，就是一枝勇敢韌命ê草，不但無beh屈服斷根，反轉每一日beh結出珍珠ê露水，tī遙遠海外ê天邊，發出光明koh美麗ê希望，送轉（tńg）去hō͘故鄉受苦ê父老鄉親做禮物。

(本文刊載tī「台文通訊」第29期，April 1994)