紀念二二八挽回台灣文化

-陳柏壽 牧師-

我 ê gín-á啊！原諒我一直無出聲，

因為我ê嘴已經m̄是我 ê。

（但是恐驚你對m̄ bat見面ê老爸無瞭解，

我beh偷偷á講hō͘你知…

伊一切攏是為著你

Beh替你追求一個khah好ê將來

Tī hia，

腐敗kap不義kan-taⁿ tī台灣人ê記池內底有存在。）

二二八哀歌三部曲（第三部）

by Henry Tân- Tēⁿ, 1994

這首詩，這首台灣二二八ê哀歌，tī李登輝代表中華民國接見為二二八伸冤ê受難家屬，替過去外來殖民政權ê暴行teh拭kha-chhng ê時，恬恬出現tī台灣留學生ê電腦網路「Taiwan  Future Discussion Group, 台灣前途討論群」。Kap大部份ê台灣留學生仝款，這首詩ê作者來美國讀冊了後才知影有二二八這項代誌，離開故鄉來到美國才知影家己台灣人ê身世，開始研究台灣文化、勤學強beh失落ê台語…

這首由咱台灣少年一代寫ê詩，「…原諒我一直無出聲，因為我ê嘴已經是我ê」講出台灣民族ê痛疼，二二八對台灣人ê傷害是kan-taⁿŽ 兩萬條台灣人精英ê性命，koh khah大ê傷害是伊封殺二千萬台灣人ê嘴，屠殺台灣人ê心靈，hō͘台灣人m̄敢、也無法度教家己ê子弟是台灣人。中國外來政權掌握台灣所有ê傳播媒體kap教育機關，主宰台灣歷史ê解說權，屠殺者到今猶用台灣人ê血汗teh享受榮華富貴。真chē台灣gín-á自按呢soah認為做台灣人是見笑代，甘願去做中國人ê奴才，世間敢有比認賊做父koh khah凄慘ê代誌?

一百冬前中國拍輸日本，將台灣割hō͘日本。日本人來接收台灣，台灣各地民眾組織志願軍拚命抵抗。五十冬前日本戰敗，koh將台灣交hō͘中國，中國戰敗軍蔣介石集團來接收台灣。不幸有一kža讀漢冊中著中國毒素，祖國意識認同錯誤ê台灣人排隊tī基隆港囗迎接「祖國ê王師」。這陣「王師」手gia̍h雨傘、腳穿草鞋、腳脊phiaⁿŽ 揹（phāiⁿŽ）鼎鍋á，佔領學校做營地、強姦婦女、買物件m̄付錢、禁講台語，hit時真chē台灣人第一句學會曉ê中國話是按中國兵á學來ê「我開槍打死你」。台灣米、台灣糖一包一包送去中國，造成金融混亂，台幣眨值四萬倍「四千箍換一角」。無外久台灣人覺醒in進前所寄望ê祖國其實是土匪。兩冬後，二二八抗暴事件爆發，結局二萬外名台灣人精英受「王師」屠殺。

台灣人敢有按這段悲慘ê歷史學著教訓？

今年，馬關條約超過一百年，一陣有覺醒ê台灣人期待伊是台灣國ê建國年。今年，一九九五年閨八月，也有一陣食台灣米、lim台灣水大漢，卻自認是中國人ê台灣人，反轉teh期待今年是in祖國ê王師進攻台灣ê解放年。假使中國真正出兵拍台灣，台灣兵á是會kap in決死戰，抑是馬上gia̍h白旗á投降?

五十冬前漢化真深ê台灣人，因為資訊不足，kā隔壁ê「土匪」認做祖公，減採咱猶會tàng理解。但是到今á日，thài會猶有chiah chē台灣人認同in是中國人？咱有必要嚴肅來思考這個問題，因為這種錯誤ê文化認同已經破壞台灣社會ê族群和諧，引起錯誤ê國家認同，造成台灣心理國防嚴重ê危機。是按怎生tī台灣、成長tī台灣ê台灣人無認同台灣文化?上大ê問題出tī「嘴已經m̄是咱ê」，台灣心已經受屠殺。

親像頂頭hit首「哀歌三部曲」所啟示ê，二二八事件m̄-nā屠殺兩萬外人ê性命，koh khah恐怖ê是伊仝時也屠殺兩千萬台灣人ê心靈。二二八事件kap軍事戒嚴所帶來ê白色恐佈，扭曲台灣ê歷史，消滅台灣ê文化kap語言。台灣文化tī這個生死ê關頭，咱敢會堪得koh繼續將紀念二二八ê活動限制tī「請願」、起紀念碑、「平安禮拜」、道歉、賠償這款無意志beh推翻中國殖民統治ê層次？

紀念二二八最高ê層次在tī發揚二二八先烈志士反抗中國外來殖民統治ê精神，完全否認中華民國外來政權tī台灣ê合法性，用台灣本土文化做主體來建造新ê台灣國。只要台灣ê學校猶無teh教用台灣做主體ê歷史、語文，只要台灣ê國會猶teh用屠殺者ê語言teh進行，只要台灣ê媒体猶用中國話、中文teh扭曲台語文化，只要中華民國繼續tī台灣teh統治，二二八慘死ê冤魂bē-tàng得著安歇，台灣人死去ê心靈bē-tàng得著重頭生。

Beh紀念二二八，回復台灣心，咱tio̍h-ài台灣人ê嘴討轉來，台灣人ài有家己ê電視台，用家己ê觀點、家己ê話來教育咱ê細kiáⁿ。

Beh紀念二二八，救贖台灣魂，咱ài拍開咱心內ê門窗，將咱心肝內hit個白色恐佈ê陰影化除。

Beh紀念二二八，挽回台灣文化，咱ài用台灣ê話來清除五十年來「國語教育」灌tī咱頭殼內ê中國毒素，做一個清氣、四正ê台灣人。

(本文是「台文通訊」第38期ê社論，March 1995)