理想kap實現ê對決

-陳柏壽 牧師-

台灣ê情勢愈來愈歹，目前會使講是台灣人獨立建國運動史以來，第一嚴重危險ê關鍵時刻，無論是島內ê社會政治狀況以及台灣tī國際社會ê地位，真正是台獨大方向ê挫折，理由分五點來說明：

第一、中國在北京政府koh khah瘋狂併台ê痟話。In用這種痟話在國際社會處處企圖封鎖台灣ê生存空間。In知影「台灣牌」用來對付國內國外攏真好用，雖然不過是一個空夢ê痟話，但是看準國民黨統治ê盲點，北京儘考放心sńg「台灣牌」。一月中旬羅馬教皇訪問馬尼拉，有空前四百幾萬位世界各地青年來參加歡迎式，其中只有十一位來自北京ê代表，這幾位代表在遊行ê行列中發現著只有一面台灣來ê旗á，就宣佈離席抗議退場。這種橫霸野蠻ê態度若是繼續落去，中國tī台灣人ê歷史中間，得確變作世界中台灣人第一號ê敵人，che是一個不可避免ê局勢。

第二危機是台灣人對李登輝ê幻想。到目前為止李登輝ê作為對台灣獨立無有正面ê貢獻，伊ê所有ê作為目的只有在強化伊ê統治地盤；台灣人對伊所有ê幻想來源只有伊ê嘴唇皮所講伊是「台灣人」這句話；這句話是無本生理，但是一本萬利。現在冷靜來看李登輝、連戰kap in所代表ê中國國民黨。對所有有熱情、抱負、忠誠ê台灣人ê打壓kap威脅，看in在所謂「省」長ê選舉運動中，所做操縱、分化ê陰險ê言行，hō͘咱發現in不過是一群在宮庭權勢中浮沈掙扎ê政客，台灣人對半世紀以來欺侮蹧踏台灣人ê國民黨無有任何寄望，對李連政客仝款m̄-thang存有任何寄望。就是中國國民黨換面作台灣國民黨，台灣人mā千萬m̄-thang半路認賊作老父。台灣人ê命運只有一條：hō͘國民黨倒台。

第三危機在tī新黨ê篡升。新黨是國民黨惡魔ê化身，是kap北京teh對唱ê台灣內神通外鬼。In人數雖少，但是靠國民黨半世紀ê祖公仔屎來興旺，就是khiā tī中國文化語言作本位，來迷惑受國民黨教育ê青年智識份子。同時in亦變身作所謂「小市民心聲」ê代言人，in真正是豹狼掛羊皮ê一群既得利益者，是變色狡詐ê惡魔，是代表「中國文化在台灣」ê權威代表。新黨一日在台灣興旺，真實ê台灣文化kap台灣人ê自尊kap意志，就一日被消滅。

第四大危機是民進黨ê國民黨化。民進黨僅存ê小數理想主義者，面對多數投機性真強ê實用功利主義者ê時，不但無法度發揮扳回局勢ê作用，反轉(tńg)一個一個變作自滿自得ê官僚，人人愛人稱「老大」，人人愛作官出名出風頭，甚至台北市民進黨作市長以後，反轉民進黨ê在野黨色彩大大降低，美名是實用主義，實際是陷入中國人腐化ê封建保守心態，古早ê反衝力、無顧犧牲ê反抗精神已經無koh再出現。

第五項，亦是最大ê危機，在tī台灣民眾ê精神kap道德理想ê崩潰。半世紀ê中國教育產生一批虛華不實、道德破壞，物質掛帥、金錢第一ê可憐ê台灣人;台灣人漸漸喪失作一位獨立國家主人ê尊嚴kap人格，對社會不義無反抗ê勇氣，對弱小ê個人kap團體無保護ê勇氣，對生存ê環境污染完全無關心。

以上五點危機最大ê癥結在tī台灣人缺乏理想主義。台灣獨立運動tùi古早以來就是理想主義kap現實主義ê對立kap決戰；將來無論什麼黨執政，這種對立kap決戰，一定會繼續進行。

最近本報ê社論一再探討台獨聯盟執政ê路標， 歸結講起來所有ê路標攏是指向一個方向；恢復台灣人抗暴ê反体制精神。國民黨kap新黨上 m̄驚ê是体制內ê運作，因為in ê体制比人khah強，in控制体制。「体制」是一個真大ê勢力、真大ê力量，但是一種頑固、封建、朽爛ê力量；絕對ê体制，造成絕對ê腐敗。萬一反對勢力勇敢koh踏入反体制ê理想主義ê路，國民黨倒台ê日子就近啦！國民黨近年來恢復in ê勢頭，另外加上新黨ê作亂，只有一個原因，就是反對勢力走入体制內運作。

這幾年所有ê失敗，無論在選舉運動ê失敗，打破媒体獨專ê失敗，打破公營事業貪污ê失敗，攏會使歸罪tī体制主義。民進黨猶未執政，就已經陷入國民黨体制主義ê猴齊天，開始m̄敢講台獨，m̄敢講暴力，m̄敢講体制外運作，che攏是喪失理想ê失敗主義。

一年一度ê二二八國殤紀念日又在目前。每年這個時陣總是有人出來講啥物 「可以原諒，不可以忘記」，或是「愛與非暴力」，或是「平安和平日」等等ê痟話。講這款話ê人若小khža摸家己ê良心，隨時會發現in無講這款話ê資格；亦無就是in m̄知天地幾斤重。有資格講原諒、非暴力、和平ê人，只有受害犧牲者，其他任何活人攏無講話ê權利。Chia ê犧牲ê殉道者本人攏是真慈善愛心ê和平主義者，但是面對強暴ê体制，in放捨和平ê原則，親像飛蛾入火，本身就是代表捨身犧牲ê決志，完全m̄是代表暴力。所有tī暴力体制內犧牲ê生命，本身是代表最高ê和平主義kap犧牲ê精神；in ê行動kap in ê生命ê選擇攏是in ê良心kap上帝兩旁ê直接關係kap契約，任何其他ê人攏無評論注解ê權利。所有二二八起義犧牲ê台灣青年，以及鄭南榕、詹益樺先生，就是這種台灣人最高、最上善良ê良心ê代表。

阮ài呼籲所有海外ê台灣人重新負起創造新國家ê理想，今後m̄-thang tòe國民黨以及新黨ê音樂跳舞，m̄-thang行in ê棋。阮同時呼籲所有真正關愛台灣獨立ê人士，罷選一九九六年ê總統大選ê猴戲。咱台灣獨立出頭天，古早現在將來，只有一條活路，就是無行中國人統治者所排設ê体制，he是一條無望kap絕望ê路。

在美國冰寒地凍白雪封鎖ê冬日大地頂面，所有其他ê鳥隻攏逃閃離開，只有烏鴉tī hia自由散步，tī樹技中飛舞。台獨聯盟在台灣建國ê歷史中，永遠tio̍h扮演一隻烏鴉ê角色，尤其是多年旅居日、歐、美ê忠實ê海外台灣人，in永遠是一隻一隻不屈忠實ê冬日烏鴉，值得人人敬愛，in beh繼續將理想主義反体制ê火把傳落去，用這把火來拯救咱ê國家，復興咱ê民族。

(本文刊載tī台灣公論報社論，Mar.,1995)