無限光彩ê台灣文化
-陳柏壽 牧師-
Tī日本teh開業ê蔣中山醫師，bat tī伊ê講道集講起一個故事：二次世界大戰ê時，美軍有一位真有名ê「日本科」專家，叫作Donald King，專門研究日本人ê行為科學，用來做準備戰後統治日本ê路用。伊tī南洋各地戰場，發現第一趣味koh有路用ê研究資料，就是日本戰俘抑是戰死ê日本兵所留落來ê日記。伊講日本人可能是全世界上gâu寫日記ê民族；日常生活ê細節，甚至khai一分一厘攏記kah清清楚楚。伊發現一般ê日本兵，平時tī後線內陸生活，所寫ê日記，攏寫一ka平凡ê記事，親像小學生ê記錄簿，無啥物特色；但是仝hit個日本兵，若是hō͘人調去前線ê戰場，進入隨時有性命危險ê境界ê時陣，這個兵仔ê日記就完全變無仝款，每一字攏充滿著無限ê熱情，每一頁攏充滿著無限ê光彩，每一篇攏是美麗、有深度、感動人ê世界名作。
是按怎人ê思想kap生命ê光輝，kan-na tī實際戰鬥kap危險中才會產生呢?是按怎人總是受年齡kap環境ê限制，致使到ta̍k日bô-lám-bô-nē、無熱無冷、無味無素teh消磨人生呢？是按怎總是有人beh逆風逆勢khiā起來提倡hia ê無人注重ê「台語白話文運動」呢？人生何必hiah-nih艱苦呢？這個疑問想起來攏kap頂頭所講ê日本兵ê故事有仝性質：有ê人是活tī後方生命不過是一日過一日ê循環，但是有ê人是活tī前線ê戰場，生活tī非常ê時代，ta̍k日tī戰鬥中經過。Che mā印證另外一項真根本ê人生逆理：「若是beh顧性命ê，一定會失去性命；若是m̄驚失去性命ê人，顛倒beh有活命」，不但一定會有活命，而且koh一定會活出無限ê光彩，無限ê熱情，kap無限ê力量。
世界各民族存在ê基礎是在tī各民族有特別ê自負、自驕ê文化特質。咱台灣民族雖然有伊ê弱點，但是咱台灣民族生存ê一項真優秀特出ê本質，就是理想性真高，性格真純情直爽。評論家苦苓仔叫he作「鱸鰻豬哥」(Romantic)性，因為過頭純真甜哥，所以常常落網，親像二二八事件chē-chē犧牲ê台灣精英。世界優秀ê民族差不多攏是理想主義真強ê民族。咱台灣民族是海洋民族，台灣文化是海洋文化，所以咱ê本質就是少年純真，有義有情，有強烈ê理想主義。
最近，詩人阿仁仔寫一篇「池袋常在咧落雨」ê詩，來him-siān (欣慕讚美) hit位將近八十歲ê史明先生，真正是一世人落網甜哥ê生涯，伊不時穿一領牛仔褲，套一領運動衫，流浪tī日本久久，一面tēⁿ水餃，一面bú台獨。最近伊轉去台灣hō͘人掠去tī法官ê面前受審，伊是用kha-chiah-phiaⁿ向法官，m̄承認法官ê權威；法官用北京話問ê每一句話，攏著翻譯做台語hō͘伊聽，伊才用台灣母話應，叫人翻譯做北京話hō͘法官聽，當場tī hia侮辱所謂「中華民國」ê公權力。史先生ê生涯所代表ê就是台灣民族kap台灣文化最高ê品質，也是kap in中華民族ê老人政治kap老人文化(Gerontocracy)最強烈ê對比。
台灣文化tùi taⁿ開始，tùi「台文通訊」開始，每一篇文章，每一句話，攏beh展現出一片滿開燦爛ê田園，充滿著無限ê光彩，無限ê希望kap無限ê力量，親像聰美姊ê台灣心肝：美麗純情，專一勇敢，直直向前行，期待台灣早日出頭天。
(本文是「台文通訊」第27期ê社論，Jan.,1994)
No Comments