台灣草根，萬歲！

-陳柏壽 牧師-

聰美紀念基金收著ê「台文通訊」訂費kap捐款，有真大部分是tùi tòa tī「Room No. ?」抑是「Apt. No.」 ê人寄來ê，意思就是講，真chē人是tòa tī公寓，經濟上是中下階級ê人ê心血錢，m̄是大好額人用chhun ê錢。真chē人寄錢來ê時，koh附批來鼓勵阮，言詞攏真純情溫暖，有ê叫阮：「M̄免驚，tio̍h向前行」；有ê是teh祈禱：「台灣文化萬歲！台灣文化政治出頭天萬歲！」真正攏是有血有目屎ê心聲。但是，hia ê大好額人、大生理人、大學教授，攏走去tóž位？

咱若有去爬山就知影，山壁石頭ê頂面吸一têng青苔（chheⁿ-thî），khah按怎無水ê石頭lok-kho̍k ê所在，攏發滿青苔。有時暫時無落雨，青苔會ta去，但是一定bē死，照常吸tī hia，等到一陣雨來，就koh青起來，真正韌命。咱ê厝前厝後有野草，無人種家己生，生kah滿滿是，用手去kā草葉á挽（bán）起來，根一定斷tī土內，日頭若koh出，雨koh落一陣，草葉就koh puh芽。這款遍滿全地，無beh投降ê韌命精神，叫做草根精神。Hia ê中下階層ê大眾，就是咱台灣文化ê草根，不但活tī故鄉台灣ê大地，mā已經遍滿tī日本、美國、歐洲，全世界有台灣人ê所在。

台灣人ê草根階層tī過去三、四十年ê台灣政治kap文化ê獨立運動中，所khiā ê立場真清楚。In ê立場就是：第一，in是一群有良心ê純全ê台灣gín-á、台灣人ê兄弟姊妺，無論是流浪tī海外抑是tī台灣社會teh受壓迫ê階層，日日teh討thàn、飼家、拍拚，日日經過孤單流目屎烏暗ê山嶺kap山崁，m̄-koh疼故鄉土地ê心，親像草根，釘根真深，遍滿全世界，日頭若出就koh青起來，永遠無投降退步ê一日。

第二，in m̄是tī議會、國會、XX院teh出面ê大粒人物。台灣政治文化到今á日猶是親像幼稚園ê程度，上大ê問題就是「菁英主義」(elitism) 做工具ê反對運動。Chia ê tī政府部門、議會、國會teh講大聲話，日日出新聞ê人物，結果是個人ê權利、名聲kap慾望贏過in建立台灣政治、文化出頭天ê本願。台灣人ê將來，絕對無應該倚靠菁英主義。台灣ê草根大眾、草根良心，無人beh去kah hia ê政治菁英爭權爭財，也就是因為無這款權勢財勢ê包袱kap負擔，台灣ê草根有最大ê自由，最大ê力量去進行台灣人建國kap文化出頭天ê運動。

台灣人內心最大ê心願kap最深ê力量，活tī台灣草根ê最深ê土內，日頭若出來，落一陣雨，風一個吹，就滿山、滿野又青起來。台灣文化一定bē死，無論統治者按怎踳踏（thún-ta̍h）惡毒，純全ê台灣草根，一日koh一日會發新芽，釘新根tī台灣kap全世界ta̍k所在。

(本文刊載tī「台文通訊」第28期，Feb.1, 1994)