死mā beh死tī hia
＜大紐約區王康陸先生追思會致詞＞

-陳柏壽 牧師-

列位兄弟姊妺，tī這個嚴肅ê場合，講話實在無啥物必要，但是作康陸嫂Martha ê牧師，我ê責任不得不tio̍h khiā起來，利用這個機會勸免鼓勵大家。其實我今á日beh講ê，m̄是beh講hō͘康陸兄ê朋友弟兄聽，我猶未講恁已經知影我ê心是kap恁作伙teh留目屎。

今á日我實在是beh講hō͘恁中間KMT ê ka-choah-á (蟑螂) kap jiàu-pê-á聽ê。恁來參加台灣人ê兄弟ê追思會有啥物目的? 我想若是來beh看鬧熱，抑無就是beh看有啥物khang-phāng hō͘恁thang掠著尾?但是請你放心，台灣人ê獨立建國運動啥物khang-phāng to m̄ 驚恁知。台灣人kap中國人統治者ê鬥爭攏無啥物thang am-khám ê。

恁今á日tī chia，若是聽bē入耳、聽bē同感，你猶原是康陸兄ê敵人，你mā是我ê敵人，koh khah是千千萬萬beh做台灣人ê人ê敵人。但是今á日你若聽我講會入耳、良心會發現、beh做台灣人，我今á日beh稱你做兄弟，我甘願做你ê奴隸，你也是千千萬萬台灣人ê朋友、台灣人ê同志。

中國文化tī台灣培養出來ê中國人，是一個無清氣、驚死、無骨氣、m̄知廉恥ê民族。前年 KUWAIT發生戰爭，KMT派一個大官chhōa一陣中華工程公司ê員工tī hia。敵人猶未攻入城，這個 KMT ê大官一個人就偷偷走去韓國大使館kap韓國人作伙走路，放in hia ê幾十位兄弟bo̍k-bo̍k-siû，變做「棄民」。最後hia ê幾十位員工soah bih入去幾十年kap KMT不共戴天，勢不兩立ê中國人ê大使館。KMT佔台灣四十幾冬，所培養出來ê中國人ê文化，就是這款世間第一軟骨頭、第一lah-sâm、第一無廉恥ê文化。可惜咱中間大部分人攏有受著這款教育ê影響。

咱ê兄弟王康陸博士tú來美國讀冊ê時，兩個翁某mā攏真小心，「政治m̄-thang siuⁿchhap；台獨會使想bē使講。」但是康陸兄kap你kap我，有一點無仝ê所在，就是伊漸漸soah良心發現，伊ê良心soah贏過伊對KMT ê恐怖，甚至贏過物質生活ê要求。你我大部分ê人良心是有，但是thàn錢khah重要、飼某kiáⁿŽ khah重要，gín-á教育khah重要，咱差不多ta̍k日是用嘴唇teh講台獨nā-tiāⁿ。但是康陸兄ê良心贏過世間ê榮華、富貴、名聲、地位、親情；無論風吹tóž 一旁，伊ê方向攏掠準準，handoulu（方向盤) bē lián來lián去，彎彎khiau-khiau。伊向前行，啥物攏m̄驚。

康陸兄kap你kap我第一無仝款ê所在，就是伊是一位「真正ê台灣人」。「真正ê台灣人」是啥物意思? 就是一位有清氣ê良心，勇敢向前，啥物攏m̄驚ê hit款人。真正ê台灣人kap中國人無仝款ê所在：一個是一隻tī藍天千里萬里向前ê鷹鳥；另外一個是灶腳壁角teh sô來sô去ê ka-choah。

耀勳兄tú-chiah所讀ê一段聖經，路加福音十三章31-35節，是講起古早耶穌去hō͘人欺負，四界走路，最後來到耶路撒冷城外。祂ê敵人kā伊講：「你若入城，統治者會掠你來刣！」但是耶穌無teh驚in，祂講：我死mā tio̍h死tī hit個惡賊ê首府ê城內！」m̄-taⁿ-kín，耶穌koh kā hia ê人講 :「恁去kā hit隻狐狸講，我今á日、明á再，我趕鬼醫病，到第三日我就完工。雖然按呢，我今á日向前行，明á再向前行，後日我mā beh向前行–向你這個惡賊ê首府進前，無人擋我會tiâu ! 」

咱ê康陸兄一生ê行踏，tú-tú kap耶穌仝款。人kā伊háⁿ Ž[嚇]講，「你轉去會去hō͘統治者掠去煎掠去煮！」但是伊ê心內teh kā hia ê人講：「恁去kā hit隻狐狸精講，m̄免恐嚇我，無論風透tóž一旁，我攏beh向前，行入去你這個惡魔政權ê首府，我若會死，我mā beh死tī hia！」咱這位講話輕聲細說、掛一副目鏡、身驅sán koh薄板ê康陸兄，伊ê台灣人ê精神kap台灣人ê意志，就是tī chia表現。康陸兄m̄是中國文化培養出來ê中國人，伊是真正ê台灣人。

今á日咱開追思會ê目的tī tóž位? 是m̄是beh hō͘咱艱苦留目屎nā-tiāⁿ? M̄是！咱tio̍h kā咱ê傷悲收起來，kā目屎吞落去。今á日咱紀念康陸兄過身最大ê目的，是beh叫咱m̄-thang吐氣、懷疑、流目屎。每一擺咱用精神teh流目屎吐氣，懷疑啥物人才是兇手ê時，就是中KMT ê計，時間一下過，KMT hit位最大ê兇手就hō͘ soan去；KMT第一快樂！古早陳文成事件是按呢，林義雄先生母kiáⁿ ê事件是按呢，今á日王康陸博士ê事件，mā一定是按呢。KMT殺人喝救人，kha-chhng pōaⁿ leh就beh soan路去。

古早耶穌bat講，我過身去，恁mā無好日子thang過，我beh等，等到有一日恁知影我來世間是為著beh救恁，死是為著恁死；等到hit日，代誌才會解決。今á日康陸兄ê靈魂，mā beh kā罪惡貫滿ê KMT講，恁免想beh平安過日；不但按呢，所有為台灣犧牲ê靈魂mā beh hō͘所有疼康陸兄ê人知影，咱mā無法度平安過日！Tio̍h等到有一日世間人攏知影伊是為啥物人來死ê時。一直到hit日來到以前，代誌無法度thang解決。

康陸兄tī天頂繼續teh âu叫：「台灣人啊！台灣啊！M̄-thang kan-na為著家己teh活，mā著為別人來活！M̄-thang kan-na嘴teh講，tio̍h行動！ Khiā起來！向前行！ 啥物攏免驚 ! 」

願咱今á日作伙攏khiā起來，作伙將這個惡魔統治者kā ián hō͘倒，早日建立屬tī咱ê獨立台灣國。願天頂ê上帝支持咱經過這個苦難ê日子。Kôaⁿ天tī目睭前，春天就已經無外遠啦！願上帝保護照顧在座所有參會ê同鄉。平安。

(本文刊載tī「台文通訊」第26期，Dec.1, 1993)