支持小眾傳播開創台灣新文化

– 陳柏壽 牧師 –

Tùi古早以來人類溝通方法是用言語做中心，文字不過是最近幾千年才有ê物件。初期ê宗教經典大部分是經由口傳(narratives)存留落來ê。真chē偉大ê社會運動kap革命，起火以及傳播ê媒介m̄是大眾傳播媒体，是口傳kap私傳ê力量；用今á日ê術語來講，私傳抑是口傳會使比喻作「小眾傳播」。大眾傳播媒体代表統治者kap財團ê利益，小眾傳播代表人民ê心聲。小眾傳播kap勢力兇猛無所不在ê『大眾傳播』（mass media)比較起來，若親像排山倒海ê洪流頭前ê小土屯á，擋bē-tiâu，無tap無sap，無法度比phēng。

但是最近tī紐約ê哥倫土亞大學有開一門課叫做『大眾傳播kap意識形態』，結論soah發現一個真特殊ê社會現象：就是原來統治者、資本家以及宗教家(尤其是猶太人kap一部分美國特有ê商業化ê電視佈道家)，拍算beh利用大眾傳播ê工具，來建立in特有ê意識形態，結果並無影親像in所想ê hiah有效。主要ê原因是tī現代社會ê知識階級層面已烴看破大眾傳播ê霸權kap白賊ê本質，所以tī學校kap社會教育ê過程中，灌輸對大眾傳播資訊輕視ê態度。換一句話來講，就是知識階級teh看「中央日報」、「聯合報」等，攏是用不信kap懷疑ê態度去看，台灣話講是「看報紙tio̍h顛倒péng看！」。知識階級無人肯定chia ê大眾媒体所傳播ê價值觀。

現代美國ê社會真正teh啟發激勵知識階級ê力量顛倒大部份是 「小眾傳播」，親像 The Nation，The Christian Century，Monthly Review，Z（Zeta) Magazine，The Sojourner，National Catholic Reporter等等。Chia ê小型刊物，是真正teh支持並創造知識階級ê思想路線kap意識形態ê力量。

將來ê世界有可能會親像Goerge Orwell ê名作「1984」內所描寫世界：大眾傳播一隻一隻變做巨大恐佈ê恐龍，主宰每一個人每一日全部ê公、私生活。這世間看著 ká-ná真無ǹg望。但是歷史teh進展ê時，人類突然發現恐龍竟然有無力症kap自絕症ê症頭，發現人類思想ê清流經過「小眾傳播」一點一滴beh滴破盤石，beh拍開人ê心門，beh hō͘人ê良心活起來，hō͘世間有新ê希望。

今á日聰美姊紀念基金會ê幾位有志，beh用阮ê精神kap有限ê經濟力量來支持咱這份「台文通訊」台文月刊ê發行，就是因為阮深信小眾傳播ê力量，也深信忠實、親切反映台灣人話語ê台語白話文ê力量。

支持用台語寫ê小眾傳播媒体koh有一層khah深ê意義。母語親像人ê皮膚，生就liâm kap肉作伙；台灣人bē曉講台語，就是親像hō͘中國人ê統治者剝皮，剝kah流血流滴。今á日台灣社會治安hiah bái，koh愈來愈bái，根本原因ê一項就是無皮，無親情kap文化ê溫暖，無語言ê母胎teh保護。台灣文化kap語言ê復活kap改革，是台灣第一艱難、第一兇惡、第一直接、第一凄慘ê對立kap爭戰。

所有「台文通訊」ê義工，tī無人看見ê所在恬恬為台語文化teh付出、teh拍拚。Chia ê無名英雄，攏是阮上尊敬ê對象。這款文化人ê戰鬥kap犧牲，tī過去、今á日kap將來，無人比in會過。咱m̄免驚大眾傳播，因為全台灣ê土地kap全台灣ê草根，攏teh拍手、teh祈禱、teh祝福「台文通訊」進行到taⁿŽê成績。

(本文是「台文通訊」第26期ê社論，Dec. 1993)