向頭前的過去 (台湾教會公報)

陳柏壽 牧師

歷史是咱人群 ê 粘著劑，對過去深刻 ê 認識kap 體驗，會促成咱對過去chhōe-tio̍h向前 ê 進路。過 去促成一群東北三州 ê 有志，結連做伙 ê 動力，hō͘ chiah-ê 平凡大眾 ê 廚師、洗衫店 ê 頭家、技術者、 會計師、建築師、醫師、律師、牧師、家庭主婦來 起造「衛鄉」ê 歷史，伊 ê 基礎就是對真理 ê 追求， 對上帝 ê 信賴，以及對台灣故鄉無限 ê 關心。

1986年對日本搬來協和神學院以後，受派去 恩惠教會工作，有一段時間kap黃武東牧師、王成 章牧師做伙輪流主持禮拜。後來，王牧師轉去台 灣神學院教冊，阮嘛有參加Brooklyn ê 台灣三一 教會。每禮拜透早，我就載牧師娘kap 3個囝（後 來koh生1個查某囝），全家親像日耳曼民族大移 動，經過Whitestone Bridge去Flushing，中晝食了趕 去Brooklyn禮拜，轉來到厝攏7、8點，囡仔kaiⁿ- kaiⁿ叫，大人嘛lek kah叫天叫地。同時，我愛koh 準備考試、寫論文、顧教會，逐日攏無閒kah若狗 蟻。我 ê 身軀因為按呢變bái去，m̄ 是暗時袂睏，就 是膀胱結石、放尿流血，後來甚至膽囊去hō͘醫師 手術掉，hō͘我變做「無膽 ê 人」。佳哉，後來Jane Lai有教牧師娘駛車，伊考著駕駛執照，會當家己 駛車去買菜、送囡仔去學校。

●在地生根　點to̍h台灣精神　

為著路途遙遠 ê thoa-bôa，koh看著大New York 北旁，Westchester地區無半間台灣人教會，親像保 羅去hō͘北旁 ê 馬其頓叫著，阮決心欲tī北方「在地 生根」。Tī台灣白色恐怖 ê 年代，咱給伊號名叫做 「衛鄉」教會。1988年，代先tī阮厝2禮拜聚會一 擺，後來改做逐禮拜，但是人無濟。耀勳兄講，咱 有決心，若準講只有「3个人」，嘛欲kā-i 禮拜落 去。感謝主，後來真濟兄姊駛真遠 ê 車來做禮拜。

1989年1月24日，我去Tarrytown歸正教會總部 chhōe總幹事Dr. Rev. John Hiemstra，伊叫我去chhōe Greenville Community Reformed Church。教會牧師 Dr. Rev. Jack Elliott, Jr.真古意，隨叫阮去Social Hall （交誼廳）做禮拜，講 m̄ 免錢。順賢兄做一個布 條寫「上帝是愛」，榮二兄用綠色布條仔寫教會 ê 名，吊tī講台前，阮tō親像廟口做王祿仔賣膏藥， 嘛親像路邊teh排擔喝lin-long，就按呢大聲唱歌祈禱，開始做禮拜。

後來，賴長老因全家嘛對恩惠「歸正」轉來，真 濟兄姊嘛攏「歸隊」，hō͘衛鄉教會成做大紐約地 區，敬拜上帝兼台灣精神 ê 火把。

自從我受封立美國歸正教會牧師以來，衛鄉教 會kap其他教會最大 ê 分別，就是堅持「人人皆祭 司、人人皆先知」ê 路德馬丁宗教改革最高理想。 Tī我 ê 日記內會當發現，所有較久出入 ê 會友，攏 bat khiā tī講壇頂司會或講道。無形中，教會帶有 反對利用宗教kap教會產生 ê 階級kap權威。

每人每日仝款攏只有24點鐘，上帝hō͘人天賦 ê 智慧kap人生經驗雖然種類不同，卻攏有平等 ê 價 值kap地位。教會 ê 兄姊，一个一个，攏是戰場 ê 勇士。所以，教會 ê 牧師袂使bô-sî-bô-chūn to̍h-sī 欲「教示」人、「教導」人。無人會當利用上帝 ê 名，提升家己比別人khah高。

最近我koh轉去 ê 時，有深深感覺著大家攏真正 有嚴謹 ê 人智觀念kap西方 ê 自由精神，經過集體 智慧 ê 捶煉，產生特有 ê 教會文化。所以，咱教會 應該是上帝教會 ê 典型。

●堅持立場　敢向強權示威

過去連續幾年 ê 大紐約區228國殤祭日，攏是衛 鄉教會 teh 主導；中國人向台灣射飛彈 ê 時，咱去 示威；江澤民來美國ê 時，咱去示威；為著加入聯 合國，咱嘛去示威。

另外，為著推展台語，咱t ī美東夏令會去排擔 賣《台文通訊》。除了chiah-ê，耀勳兄嘛代表教會 贈送記念牌hō͘伊籐邦幸醫師，記念伊 ê 婦人人黃 聰美姊 ê 精神，後來koh設立聰美姊記念基金會， 記念這位台灣女性 ê 故事。基金會發行100期 ê 《台文通訊》，現在繼續t ī網站「發行」古早獨 盟tī東京出版 ê 500本《台灣青年》雜誌（www. chhongb i.org）。當時，基金會有故黃聲宏醫師 做主席，我做總幹事，黃圭如姊做會計，黃耀勳 兄做監賬委員，賴柏年兄、張啟典兄做理事、秀 蘭姊做打工……。

1994年，為著抗議中國教會ê 丁光訓對台灣 ê 拗蠻，衛鄉教會全體去協和神學院示威。丁光訓 是協和 ê 畢業生，現在是南京神學院院長，同時是 中國三一愛國教會主教，中國全國人民政治協商 會主席。彼時，我是協和學生會會長。伊來訪問學校 ê 時，身邊tòe歸群ka-choah（虼蠽），我tī會 中問伊：「你用做一位牧師 ê 觀點，對台灣人追求 獨立 ê 看法如何？」伊thi-thi-thū-thū講袂清，最後 煞講：「台灣是祖國 ê 一部分，祖國必須統一！」 對彼陣以後，阮就決心欲阻擋協和頒最高獎章hō͘ 伊，決心tī頒獎彼日發動示威行動。學校恐嚇我， 講欲kā我退學，講一切結果攏我負責。

但是無想到彼日，衛鄉教會全體、在地同鄉、 哥倫比亞大同學共約100人，將協和 ê 大門封起 來，沿Broadway歸路攏插綠色 ê 台灣國國旗，以及 「One Taiwan, One China」ê 旗仔，大家分傳單hō͘過 路人。真濟重要 ê 教會界人物，包括台灣人 ê 教會 人物，遠遠看著按呢就oat轉頭過，m̄ 敢參加。雖 然有幾位對後尾門溜入去會場，結果會場非常冷 清，真少人參加。

這是表現教會 ê 立場kap意志真好 ê 機會。咱 ê 示威引起神學院，以及真濟紐約kap台灣媒體 ê 注 目。這項代誌以後，學校不但無kā我開除，甚至過 一禮拜後，神學院院長Dr. Donald Shriver, Jr. khah 電話hō͘我，講咱來頒一個仝款 ê 獎hō͘高俊明牧師 好無？我問高牧師，伊講：「我已經有chiah-ní濟 榮譽神學博士，m̄ 通koh再增加啦！」後來，這位 神學院院長親自主持我 ê 封牧典禮。

●勇敢向前　靈魂精神起來

教會kap咱人生仝款，不斷teh向前行。情勢愈 bái，咱著愈勇敢。台灣chím-má親像拄著寒天，但 是保羅給伊 ê 囝提摩太講：「Tī寒天來以前，請你 著緊緊來，koh拜託你將我彼領外套順續帶來！」 （提摩太後書4章7～22節）「寒天」ê 意思就是 講叫咱靈魂著精神起來 ê 時陣，人生就是不斷要 求叫醒咱家己 ê 過程。

咱台灣人 ê 獨立建國，一山poâⁿ過一山，過去 ê 回憶就是teh繼續喉叫，叫咱今仔日著koh poâⁿ過， poâⁿ過另外彼個山頭，hit領皮 ê 外套moaⁿ咧，充滿 著信心，轉來台灣老母 ê 身邊。M知你猶記得文 夏 ê 歌聲？「白雲啊！你若欲去，請你帶著我 ê 心 情，送去hō͘伊，我 ê 阿母……」「免掛意請你放 心，我 ê 阿母！我也來到他鄉 ê 這个省都，不過我 是真勇健 ê。媽媽請妳也保重……」