攝理

陳柏壽牧師

17/09/2021

咱佇教會內聽真濟「道理」，叫做「信仰」的道理，真濟教義、悔改、禮典的理論，主日學講真濟真趣味的故事、神跡，學生一世人攏會記得。但是教會生活真少chhōa學生出去外口，叫學生去互風吹、雨淋、褪赤腳、潦溪水、聽鳥仔唱歌；教會訓練咱一世人做一個「室內」的基督徒，訓練咱做一個「頭殼」的基督徒。一直到咱死，欲埋入去土地，牧師猶佇墓仔邊講道理。

看咱基督教的上帝kah世間所有宗教共款，攏有二個面向：一邊是理論kah教條的上帝；另外是佇大自然中人會當體驗著的上帝。後面的彼個上帝kah世間人所講的上帝/神明，有真濟共通的所在，因為咱有共通的人性，生活佇共通的大自然攝理。

半世紀生活佇海外的我，固定一定愛轉去故鄉看看咧，主要是欲看古早細漢大漢的彼邊山、彼條溪水；擱卡重要的，是欲轉去看阿爸kah阿母埋的墓地，彼個有花有草向著海的彼塊土地。去到遐，看著遐的花草，吸著遐的空氣，toh會感覺聽著故鄉的呼吸，聽著爸爸kah阿母的叫聲。

當初上帝創造世界，有講伊創造的世界一切「真好」擱「真媠」（創世記1：31），所以有交代咱著做一個藝術家去欣賞，做一個詩人去吟講，做一個會曉法勞這個世界的管家。上帝創造的這個世界就是咱的聖殿，上帝毋是干單滯佇教會內面，教會不過是人做的聖殿；上帝的聖殿就是咱生活四圍的大自然，包括天星、溪水、樹木，kah天頂的飛鳥，野地的百合花。

教會的教條、教理、信仰告白、禮典等等雖然是咱信仰的一部分，但不過是咱信仰的一半；咱的信仰的另外一半，包括咱摸會著、看會著、飲會著、鼻會著、食會著的生活的全部。遮的教會外的生活的部分，毋是信仰的「陪菜」，顛倒是咱信仰的「主菜」，是咱對上帝的信仰的真重要的部分；遮的部分是上帝創造的神聖的部分。咱生活的周圍細節，攏是上帝創造的「神聖」，咱不但著跪佇聖壇頭前，咱嘛著跪佇上帝創造大自然的頭前。

咱的上帝命令咱著疼厝邊，揹起十字架，行艱難的路途的大使命；共款，咱面對大自然嘛有上帝交代的大使命，就是著疼這個自然，為著這個自然揹起咱人類的十字架。路加福音時常寫講主耶穌避免人群，行入去自然曠野，意思嘛是講咱的主耶穌嘛需要佇自然中得著安慰kah充實的力量。

教會內所講的正義、醫治、自由、得救的道理；仝款，咱佇外面的大自然，嘛會當揣著安慰、平安、鼓勵、充實的力量。主耶穌的教示中，特別是對我這種草地出身的囡仔來講，最大感觸是伊講大自然的道理：「試看天中的飛鳥，無種作，無收成，無積聚佇粟倉（chhek-chhng），恁的天父也咧飼因…試想山理的百合花，怎樣大欉，因無著磨，無紡織，但是我給恁講，當所羅門王極行伍的時，伊所穿的，毋值得這蕊花。」（馬太6：26-30）。

過去以來咱人類踳踏、破害、輕視大自然，表示咱毋知甚物是神聖、美麗、完美。咱若袂當看著飛鳥、百合花的神聖kah美麗，就看袂當看著上帝的神聖kah美麗。主耶穌叫咱去「看」、去「想」山裏的百合kah天裏的飛鳥，因為因是代表美麗kah真理。佇因的所在，無罪惡、無悲傷、無流目屎。主耶穌講的是一種攝理：咱袂使崇拜自然，但是咱袂使離開自然，因為自然是飼咱的老母。

這邊溪水，彼邊山，是咱身魂徛起的所在，所以咱著出去，出去大自然內面，去揣上帝的攝理。人生的遭遇三不等，坎坎坷坷，起起落落，變化真濟。但是世間只有一項無變，就是故鄉的一山一水，永遠佇遐發出招呼的聲音，親像老母咧叫囝，無時無陣咧叫，叫這個流浪天涯的囝轉來。咱的上帝就是佇遐咧苦叫咱的老母，叫咱轉去伊的身邊。上帝是一位慈悲憐憫的上帝，親像大自然，包圍咱、保護咱，伊就是偉大的母親，是全宇宙全人類、萬人萬世代的上帝，是咱心靈平安的源頭。