孵囝的所在

陳柏壽牧師

16/08/2021

我佇雲林古坑的溪邊厝出世大漢，彼間老廟是阮莊里一切活動kah精神的中心，無論是拜拜、giâⁿ鬧熱、做戲，差不多我攏有佇hia。廟內特別一項代誌是我一世人袂忘記得的，就是正身頂面大樑頂，燕仔 用嘴瀾（chhùi-nōa）kap土角做出來的巢，一年過一年，燕仔某攏會佇遐孵卵生囝，藍色的卵，鳥仔大漢 ，飛去，因就擱生第二水。Tiàⁿ-tiàⁿ看著鳥仔囝猶袂曉飛，摔落去土腳，鳥仔爸母就佇土腳，慢慢á kā教，慢慢á kā扶，一直到鳥仔囝家己會曉飛出去為止。逐年因攏會轉來這間廟仔，因為這是因徛家的所在，全莊的人嘛攏款待因真好。

想著阮過去的人生，阮二翁仔某對台灣、日本搬到美國逐所在，做四个巢，生四个囝，有公的有毋的，去到佗位阮就去揣路、揣材料、揣厝，佳哉上帝保庇，互阮平安孵卵生囝，到今互因飛去全世界因愛去的所在。世間人咧款待阮，親像阮莊里的人咧款待hia-ê轉來做巢的燕仔仝款，給阮扶持照顧，互阮平安生長大漢。阮一世人有經過真濟艱苦、戳折、著磨、悲傷；但是就是因為經過chia-ê，阮才體會著會當安心、做巢、孵卵、生囝的幸福。

最近因為疼風去互阮附近一個台灣人針灵醫生看病，技術真好。入去病院就看見一仙紅色小關公佇壁頂，二邊有紅色電火。吳醫師講伊細漢的時老母就下願欲互伊做關公的契囝。不管伊對關公的信仰如何，濟少這仙關公互伊心靈有安心，伊就按呢平順處理阮chia-ê患者。我感覺關公滯（tòa）佇這間病院的厝瓦腳就親像燕仔滯佇阮廟內仝款，不但互關公真安定，也互流浪到美國的吳醫師真安心。

猶太人佇久長亡國的歷史中，最後建立因家己的聖殿，是何等歡喜滿足的代誌。因佇聖殿中敬拜上帝，但是詩人用來描寫聖殿的尊嚴最好最實感的方式，是經過篾（bi̍h）佇聖殿內做巢的鳥，來講起上帝的愛kah憐憫。容允燕仔kah雀鳥來聖殿內做巢變做上帝的愛的體現，厝鳥的厝的安心，kah上帝的神聖kah尊嚴是同一體。詩篇84篇寫講：「我的上帝啊，佇你神聖的坐位邊，有雀鳥仔揣著家己的巢，有燕仔揣著孵囝的所在，因為滯佇你的厝，就有平安kah福氣」（詩84：3-4）。

佇New York做牧師的時，有一擺邀請萬佛會的宗聖法師來阮衛鄉教會禮拜，伊剃和尚頭，身穿袈紗，伊設的宣傳台灣獨立的地下電台，拄好去互國民黨禁台，所有廣播器材攏互KMT沒收去，伊徛起來第一句話就講：「我轉來遮禮拜，就親像轉來家己的厝！」。對這位流浪天涯無位好去的法師，伊佇上帝的厝內，就是親像燕仔歇佇阮溪邊厝的廟內，真正平安。

世界去到toh-ūi雨水攏是冷的，社會人情攏現實的，人生到處風湧較濟，但是聖經中繼續教咱講：世間猶久有安心歇睏孵卵的所在，就是彼個會當遮風避雨的廟仔kah教會的厝跤。佇hia無論風颱落雨，無論外口樹仔掃甲東倒西歪，無論溪水一直漲高，無論世情按怎冷淡，無論生命到尾會有死亡，上帝猶久互咱有所在孵卵生囝，囝會大漢，猶擱會飛出去，猶會當為咱繼續戰鬥，行頭前的路，kah風湧車拼，所以咱佇這世間的頭前路，猶閣充滿希望，咱著愛有信心，繼續向前。