大紐約區台灣國殤日紀念會開會辭

March 14, 1993
kap 朋友分享

大紐約區台灣國殤日紀念會開會辭

– 陳柏壽 牧師 –

 今á日咱大家tī chia就是beh紀念四十外冬前,發生tī咱台灣故鄉歷史上第一悽慘二二八事件。咱ê胸前攏掛一蕊白花,就是kā伊紀念、kā伊懷念、kā伊疼惜ê意思。紀念就是無beh放hō͘ bē記得。有人來美國thàn錢,真拍拚,taⁿŽ錢mā thàn著ah,事業學業mā成功ah,就kā台灣過去悽慘ê歷史,khǹg tiàm kha-chiah-phiaⁿ,kā伊bē記了了。

二二八以來四十六冬,台灣人猶生活tī白色恐怖ê陰影ê內面。二二八hō͘真chē台灣青年ê理想、熱情、kap創造新天地ê抱負,soah變作親像美國ê冬天,結冰tī hia、凍死tī hia。但是咱今á日來chia出席大會ê父老兄弟姊妺,m̄是這款人。咱ê心猶活teh,咱m̄甘願kā伊放hō͘ bē記得。Ta̍k年ê 二二八若到,tō親像基督徒tú著禮拜日,khoân-khoân leh就來教會,攏m̄敢kā bē記得。今á日咱就是用這款心情來參加。

今á日tī chia ê兄弟姊妹,當二二八發生ê時,厝裡並無死人,但是咱來參加這個會,作追思悼念ê禮拜,就是因為知影所有tī台灣ê人,無論是河洛、客家、原住民,甚至中國大陸來ê人,攏是二二八ê犧牲者,攏是中國獨裁統治者手下ê犧牲者。經過四十幾冬,二二八已經變作咱「台灣民族」ê大事件,已經無人敢講二二八kap我無關係。

最近tī咱台灣,尤其是hia ê無經過二二八慘案經驗ê台灣新生代,in攏比二二八koh khah二二八。Tī咱ê前輩猶teh驚惶驚死ê今á日,in已經先踏一步,將二二八ê火點hō͘ to̍h,傳遍tī全台灣ê街頭巷尾。咱tī美國ê台灣人猶teh驚死驚死ê時陣,二二八ê消息tī咱ê故鄉台灣,已經是tùi阿公、阿媽、到小學生mā會知ê代誌。四十幾冬來tī學校,冊無寫二二八,老師mā無教二二八,若講二二八就會hō͘國民黨掠去關、去酷刑,今á日怎樣情形會變hiah chē?我想來想去,只有想著一個理由:「人teh作,天teh chhiâu 」。Hia ê殺人放火ê兇犯,想講世間人已經bē記得了了lah ê時,上帝有teh看,祂是公義ê上帝。這個公義ê上帝活tī咱ta̍k人ê心內,hō͘咱m̄敢bē記得咱ê歷史,hō͘咱m̄甘願放hia ê殺人放火ê人去耀武揚威。

古早開天闢地ê時代,咱人間ê第一ê先祖講是叫作「亞當」。這個亞當生二個kiáⁿŽ,大漢ê阿兄叫該隱,細漢ê小弟叫亞伯。二個兄弟起冤家koh起怨恨,結果該隱soah kā亞伯殺死,tâi tī田岸ê角頭hia,想講已經無人知影。上帝問該隱:「恁小弟tī tóž位?」該隱講:「我thài會知?我to無teh食飽專門teh照顧亞伯ê人!?」上帝講:「你免騙我,亞伯hō͘你殺死tâi tī土底,伊ê血tùi土底chhèng到天頂,向上帝喝冤枉,伊ê聲猶tī這世間teh âu叫」。咱台灣話叫做「冤魂不散」ê意思。人間權勢ê統治者,想講世間人攏bē記了了ê時陣,天頂ê上帝tī hia目睭金金teh看,tùi一千九百四十七年以來犧牲tī中國人統治者手中ê幾ā萬台灣人純全ê生命猶未安息,目睭猶m̄願合,in ê聲猶tī這世間âu叫,che就是咱大家今á日開紀念會tio̍h-ài清楚ê代誌。

我作一個牧師人,hō͘各社團拜託來主持這個大會,mā是用這款心情,beh將這個犧牲ê生命,這個悽慘ê歷史,koh一擺排列tī上主ê面前,排列tī上主ê義理kap審判ê台前。Tī上帝犧牲ê十字架ê下面,我看著hia ê台灣人菁英ê墓,ta̍k個墓攏是空空,kap主耶穌ê墓仝款,in hia ê人已經無koh tòa tī墓內,攏已經復活lah!In活tī咱台灣美麗島ê每一個角頭,活tī你kap我每一個人ê心內。

(本文刊載tī台灣教會公報,1993/3/14, 2141期)

 

 

kap 朋友分享

No Comments

Leave a Reply

Your email address will not be published. Required fields are marked *

Web Design MymensinghPremium WordPress ThemesWeb Development

懷念秀蘭姊 (New York 衛鄉教會敬告)

April 19, 2016April 19, 2016

各位鄉親朋友:

我們所愛戴,思念的秀蘭姊,已於 Las Vegas 時間八點零五分,在她深愛的丈夫,子女及教會牧長會友,聖歌隊的歡送中離開,蒙天父恩召回天家。 耀勳兄說,那一刻,秀蘭恢復了她美麗的面孔,安然地睡了。

我們慶幸曾經分享過她燦爛的一生,她的熱情,幽默的談笑,愛故鄉台灣,堅強的信仰,令人感動的禱告詞,還有一手好菜滷肉,,,,這些都會留在我們的記憶中,永遠地懷念她。

讓我們繼續為耀勳兄及全家禱告,求主安慰保守,勇敢地面對再來的明天。

衛鄉教會敬告

公募聰美姐記念基金會「印信」、「表徽」(logo)啟事

March 11, 2016March 11, 2016

列位讀者:

二十幾年來咱遵守聰美姐遺留的精神,繼續進行台灣語言文字化以及啟蒙振興台灣精神的工作。現在咱著創造一個代表咱基金會精神的表徽:代表默默做工、恬恬獻身的聰美精神。

希望有心的兄姊大家向這方向做伙來思考,創造一個適當咱的內涵,做咱對外的印信或表徽。有結果的時,咱基金會會準備好的感謝。請提供恁的尊貴的意見用e-mail或批信,寄互任何一位基金會負責人。感謝。

聰美姐記念基金會 敬致