伊藤聰美紀念基金

– 陳柏壽 牧師-

伊籐聰美是一位醫生，伊也是一位平凡ê台灣婦女，但是伊過了一個偉大ê一生。伊kap夫君伊藤邦幸醫生結婚了後，相牽去偏僻ê Nepal做醫療傳道七冬，轉來日本後，伊就用井上魯鈍ê名，每月奉獻日圓伍萬kho͘，hō͘『台灣青年』雜誌做台灣獨立運動ê路用。按呢繼續將近20年無停，一直到伊六冬前過身後，伊ê夫君才將這個偉大ê台灣女性ê故事講出來。這個故事已經tī台灣教會公報（92.7.26、92.11.15/22、92.12.6)、台灣公論報（92.7.22、92.12.6）、以及美國台灣同鄉會聯合鄉訊等報導，引起海內外台灣人真大ê共鳴，大家踴躍獻金，所獻ê金額也攏有經過台灣教會公報社、台灣衛鄉教會、波士頓台灣教會等，直接寄去hō͘入院中聰美姊ê夫君伊藤先生。

1993年1月3日聰美姊ê家屬tī衛鄉教會提議今後所有ê獻款應該設立『伊藤聰美紀念基金』（Ito Chhong-bi Memorial Fund）。主要ê理由是beh繼承聰美姊ê心願kap精神。聰美姊ê精神就是一世人無愛出名，一世人tī人生ê重擔ê下面，無kap人計較，靜靜teh獻心祈禱，並實踐奉獻ê精神。所以這個基金會ê宗旨，就是beh喚起台灣人奉獻犧牲ê精神，將捐獻ê資金來支援hia ê tī台灣草根ê運動者，hia ê無beh出名，無人知，但是熱愛台灣，為台灣獨立獻身ê文化、教育、社運ê地方工作者。Hia ê人ê精神，就是kap聰美姊仝款。