May 1, 2006

聰美是一位醫生，伊也是一位平凡ê台灣婦女，但是伊過了一個偉大ê一生。伊kap夫君伊藤邦幸醫生結婚了後，相牽去偏僻ê Nepal作醫療服務七冬，轉來日本後，伊就用井上魯鈍ê名，每個月奉獻日圓伍萬kho͘, 互『台灣青年』雜誌做台灣獨立運動ê路用。按呢繼續將近20冬無停，一直到伊過身六冬後，伊ê故事才tùi日本翻譯過來互大家知影。

這個故事已經佇台灣教會公報，台灣公論報，以及美國台灣同鄉會聯合鄉訊等報導，引起海內外台灣人真大ê共鳴，大家踴躍獻金，所獻ê金額也攏有經過台灣教會公報社、台灣衛鄉教會、波士頓台灣教會等，直接寄去互佇哈佛大學進修中得中風ê夫君伊藤先生。伊藤先生已經佇 1993年八月八日腦充血別世。

1993年1月3日聰美姐的家屬提議將所有ê獻款設立『聰美姐紀念基金』（Chhong-bí Memorial Fund）。主要ê理由是beh繼承聰美姐ê心願kap精神。聰美姐ê精神就是一世人無愛出名，佇人生（生六個囝兒）ê重擔下面，無kap人計較，靜靜teh獻心祈禱，並實踐奉獻ê精神。所以這個基金會ê宗旨，就是beh喚起台灣人奉獻犧牲ê精神，將捐獻ê資金來支援hia ê佇台灣做草根運動者，無beh出名，無人知，但是熱愛台灣，為台灣前途獻身ê文化教育，地方ê工作者。Hia ê人的精神，就是kap聰美姐仝款。

台灣獨立建國運動第一迫切ê課題在佇台灣文化kap國家意識ê建設，其中最重要ê就是台灣語言ê口語化kap文字化ê建立。因為一個民族若是喪失伊ê母語，彼個民族真緊就會互人消滅。 Tùi 1993年10月阮開始負責發行「台文通訊」，一直到2006年2月為止，總共出版118期（25期–142期）。這時陣阮感覺聰美姊紀念基金會階段性ê使命已經完成–啦。雖然無繼續發行「台文通訊」，m̄-koh以後阮會用『再出發』 ê心志繼續針對台灣人ê文化語言獨立建國運動拍拚。 過去10幾年來受著大家ê愛護、支持kap贊助，阮誠心感謝。佇未來ê歲月拜託大家繼續kä阮指導kap支持，多謝。