今世之子

經文：路加福音16：1-9

陳柏壽 牧師

10/6/2013

金句：「主人就呵咾（o-ló）這個不義的管家做事聰明，因為今世之子在世事頂面，比光明之子更加聰明。我閣給恁講，著用不義的錢財結交朋友，到錢財無用的時，因通接納恁入永存的帳幕。」（路加 16：8,9）

無論你按怎gâu講道理，人生猶是活佇食飯做中心。

我看少年人肚腹枵的時，嘴peh開開，一直pe落去，彼個面形是世間第一媠的面，第一滿足的面。我想天使的面不過是按呢。

阮灶腳窗仔門邊掛飼野鳥的籠仔。看每早起鳥仔飛來食豆仔的時，歡喜到袂顧tì，有的用chhu的飛來，chhu lai chhu khi, 有的閣會sè輾轉，親像跳làng-sù互你看。

給我剃頭的淑惠姊的細漢囝Andrew去日本中野縣參加國際交流，無薪水，干單互伊食及toà。佇路邊看人咧賣西瓜，一liàm西瓜差不多20 cm欲賣200箍。伊算算咧差不多2箍美金。2箍美金會當買半粒西瓜啦，chū按呢忍起來，毋敢買來食。

當初佇京都欲訂婚的時，散到lak袋仔帶磅子，野口牧師去給會友借2腳手指，互阮暫時使用，完成訂婚禮拜。對hia開始上帝一步一步牽阮一家，經過人生的風湧，無互阮飢著。chím-má一個娶mo͘h-西瓜（Mexican），一個娶mo͘h-東瓜（Tokyo），頂禮拜一個嫁mo͘h-金瓜。上帝互因一個一個結因的果子。

為著食飯，全美國大學生只有7.6%讀社會政治、神學哲學、藝術科，遮的大部份畢業攏真歹揣著頭路。絕大部分的學生攏是讀理科、機械、電腦、醫科。只有真少數理科的人年老才來讀神學、文學、藝術。橫濱的蔣中山醫師是這種稀有的種類的人。

咱chím-má講食飯的道理毋是咧講今仔日咱講的減食，咱因為食siuⁿ傷重，食到糖尿病、心臟病、高血壓的彼款。是咧講真正肚腹飢，飢到欲khiat去壁頂的彼款的肚腹飢。

細漢的時毋是真liōng-siōng的家庭出身，所以我tiàⁿ觀察人食飯的形狀，抑同情人早起食飯後，毋知今暗欲食甚麼的痛苦。

我beh 離開Mercy Island的教會的時中會派人來調查，toh有一位青年人佇美國人面前控告我是一個共產主義、社會主義者。伊拍算想講：若是告我是共產主義者，拍算我會去互人趕出美國。有時仔我teh想，耶穌若毋是共產主義/社會主義者，無伊是甚麼人？

確實有影，對細漢開始，我就真怨嘆這世間的不公平。也就是按呢，我才會來做基督教的牧師。

基督教倫理有二面性。今仔日咱讀的經節，主耶穌頭前點出彼位管家，利用主人互伊的權勢，做功德互別人：你欠主人偌濟油？100桶！緊提筆來，寫做50桶！你欠主人偌濟麥仔？100擔！緊提筆來，寫做80 擔！伊心內想講，有一日主人無欲倩伊的時，手giâ鋤頭giâ袂起來，崛土掘袂落去，去路邊分錢做乞食，閣驚歹款。Chím-má最好的辦法就是用別人的拳頭拇cheng石獅，將主人的財產分分互下跤手的人。等到有一日伊無位好去的時，邊仔猶有bat受過伊的恩情的人，來接納伊，互伊有恩典及安心的所在。

這節聖經看起來親像有矛盾的所在，抑引起真濟聰明的牧師講道的爭執，問題就是佇此：主耶穌煞呵咾這個管家做代誌真聰明。

雖然福音書寫講這個管家叫做「今世之主」。後面接落去是咧講「光明之子」。但是一般牧師卡愛講後面彼部份，卡無愛講頭前去互主耶穌呵咾的彼部份。

這段聖經我若是只有講後壁的部份實在真好講，人嘛卡kah-ì聽，但是主耶穌留二面互咱家己做選擇：是毋是干單做光明之子就有夠額？欲做光明之子以前，是毋是著學習做一個「今世之子」？這二項觀念豈有關連？

欲了解主耶穌的福音最大的困難就是講福音的二面性：講一切為著食飯，袂使；講一切為著精神生活，嘛袂使。講恁著純全親像鴿仔，但是亦著靈竅親像蛇；講恁著偝去十字架，行狹閣細條的路，但是亦著親像羊仔進入狼群，及因車拼。這叫做基督教的二面刀，二邊攏會傷人。

福音書內面講著錢的所在真濟：最有名的就是主人分錢互僕人，一個分一兩銀仔，主人轉來的時，伊趁十兩轉來，互主人真呵咾：另外一個分一兩，伊另外閣趁5兩，也互主人呵咾：獨獨一個，將主人彼兩銀仔包佇巾仔來，主人轉來，伊原封不動送還主人，互主人真受氣。

主耶穌講咱著結子10倍、20倍、100倍，我想多少嘛有這個意思。

德國真有名社會學家Max Weber所寫的「新教的倫理」有二個要點：一個是人人佇法律面前完全平等，皇帝佇街路拄著紅燈嘛著停咧等；第二就是佇這種親像牛毛遐濟的法律個社會內面，趁愈濟錢的人，就是愈成功的人。因為伊的理論，叫人著趁錢、趁錢、趁錢，是美國變做產業真發展的所在。

我一個好朋友叫做Ken Walter是一位基督徒律師，koh是University of Washington法學院院長。有一日佇阮厝食飯的時討論伊的冊，其中伊的結論就是：佇美國，你無論用甚麼手段，趁來的錢就是錢，有錢就是有勢力，有錢就有生命。Life is for profit。

有一間教會受著一包真大包的奉獻，是對隔壁的妓女戶集中來奉獻的。教會的執事有人認為這是污穢錢，著退還因。毋知兄姊恁大家的想法按怎？甚麼人決定遮的錢是清氣錢，甚麼錢是污穢錢？

錢這種物件人人攏愛。我想世間最講毋免趁錢的所在就是教會，但是上愛錢的所在嘛是教會。

羅牧師講一個笑話：教會隔壁有一間鬼仔厝，無人敢入去。有一日，教會牧師志願欲去遐toà一暗看覓。過暝日全教會會友看伊平安無代誌對hit間鬼仔厝出來，就問牧師：你怎樣有法度彼群鬼仔？伊講：真簡單！「我干單將獻金袋仔lu去因面前，因toh攏走到裂褲腳！」

主耶穌面對矮仔撒該的故事是按呢寫：矮仔撒該因為人矮，有自卑感，所以khia̍t起致酸叢樹仔尾溜，坐高山看馬相tak。無想到，主耶穌一直行，行來到酸叢樹腳，閣大聲喝講：「撒該、撒該，緊對樹仔落來！我盈暗欲來恁兜食飯！」去互耶穌叫著的撒該，真正是歡喜到袂顧（路加19：1-10）。

真濟傳道人雖然無主耶穌的能力，但是真愛有主耶穌的氣勢。會友互某某人叫著，就感覺真光榮，親像去互耶穌叫著。這是所有做牧師著自覺、自律、自省的所在。毋通無形中互家己變做教會的神明。

牧師毋是教會的管家，牧師是教會的僕人，是服務人的人。管家的意思是用主人的權勢來進行伊家己的圖謀。這是所有世間人「今世之子」正常的圖謀。佇台灣大間教會牧師攏駛Benz，就是今世之子的成功。

馬英九做台灣的管家，伊有法度剝奪阿扁仔最後一線生機。管家真容易誤用別人的錢，嘛誤用別人互伊的權勢。管家及主人的錢及權勢，若毋是對別人來，就是對上帝來，錢及權勢攏是對外面來，絕對毋是伊本來就有。世間人所有的錢及權勢，攏是上帝來的，毋是人家己的。

有的查埔人認為伊是這間厝的管家，轉來厝就是大聲細聲，腳來手來，拍某拍囝，但是去到外面軟kô-kô，由在人欺負。馬英久佇國際上軟kô-kô，對中國軟kô-kô，但是對國內的人，手段真嚴格、真殘忍。伊想講伊做管家，就會當亂來。

凡間的人大部份是親像主耶穌講的：有一個管家欠主人一千兩銀仔，有一日主人來查賬，伊phak佇主人腳前求赦免，主人就憐憫伊、赦免伊。這個人一下行出門口，拄著有一個人欠伊十兩銀仔，就共伊chhiú-ńg掠tiàu-tiàu，無欲放伊去（馬太18：21-35）。這不但是咧講咱家己？咱咧做人的管家，是毋是用這種態度？馬英九咧對待咱的故鄉，是毋是用這種態度？咱欲按怎處理咱家己的問題。

無錢袂使，但是錢親像海水，湧來湧去，看親像是佇手中央，但是真緊toh對指頭縫漏了了。但是你手內有的錢、勢，著好好管理，親像主耶穌呵咾彼位聰明的管家按呢。

我欲去讀神學院以前，我感覺錢真重要。欲去讀神學院的時，我感覺錢啦食飯啦，攏無三重要，我攏想講上帝一切攏會備辦。欲去讀神學院的時，最無贊成我去做專職的牧師的是阮老爸及高俊明牧師，因為因認為我做一個平信徒嘛會當真實際來服事上帝。

Chím-má年紀愈大，才漸漸發現基督教的二面刀真厲害：除去恁著純全親像上帝以外，恁嘛著靈竅親像蛇，著親像一隻羊仔chông入去豺狼的世界內面。基督徒無法度生活佇家己一個人的世界。

所以我除了第一擺洗禮進入主耶穌的世界以外，我亦著有第二擺的洗禮，進入人的現實世界。第一次重頭生以後，也著第二次重頭生，進入人的世界，進入管家的世界。

欲進入做光明之子以前，著先進入管家的世界，做今世之子。

王金平一世人利用國民黨的權勢及人民的血汗，佇妥協及奸巧中生存落去，這豈毋是歷史的諷刺？基督教對王金平這個人及伊的一生欲按怎解釋？

真濟台灣人一世人無原則，只有掛一個道德的外殼，遊走佇二邊的陣營，得著財富、勢力及生活的安定及保障。現今的台灣真少有親像明治時代勇敢的鬥士，無顧家己的利益，用熱情及理想咧奮鬥。

現今的台灣只有二種的今世之子咧統治：一種是利用台灣資源，圖謀家己的利益；另外一種是利用台灣資源，圖謀中國的利益。大部份的人若毋是這邊的今世之子，就是彼邊的今世之子。這款的人比堅守原則的人加真濟。

宮崎駿的新的animation叫做「遂著風去」（風立ちぬ）是講戰爭中的日本人，家己無法度發言講反對戰爭的話，但是閣無去戰爭袂使的一種無奈的心情。一億萬的日本人佇軍閥的支配之下，只有忍受、妥協活下去，精神上非常困難，結果國家遭受慘敗。這豈毋是主耶穌所講「今世之子」的寫照嗎？

台灣人走來遠遠的美國過日，豈毋是一種逃亡的人生？有一日咱的後代欲反省咱今仔日的處境，是欲講咱遮的人離鄉背井，逃亡來美國？抑是講咱是為著甚麼理想、熱情來美國生活？

我想良心上，咱代先承認，咱是欲「活下去」才來美國。咱先活下去，咱的後代才有機會來做反省，才有法度再出發，才有法度繼續生根。今仔日袂當家己活下去，剩的後面攏免講啦！這是今世之子的台灣人的運命。

今仔日咱台灣互人四面封鎖袂當生存，是毋是咱著遵照主耶穌的教示，用錢去交世界逐國做朋友，毋通將一切攏灌入去中國，等到有一日，因攏會當來幫助咱。但是真正的今世之子的台灣人有這種智慧無？現在台灣的執政者幾乎忘記其他國家，只有一切中國，遮的執政者實在毋是聰明的管家，實在是不義的管家。聰明的管家甚至會當利用不義的錢財，交結濟濟朋友，為將來拍算。

佇生存競爭的世界內面，基督教豈無教咱另外一條咱會當去的路？我想佇這個聰明的管家的教示中，互咱加減有一點安心及信心，揣著一條生存的路。這條路是另外一種福音，但是這個福音，雖然感覺及通常主耶穌的福音小可有矛盾；但是主耶穌的福音往往親像山坡頂面，佇藍色天空中的白雲，真媠，但是達袂到，到甲山頂嘛摸袂著，親像司馬遼太郎的「坂の上の雲」。上帝愛咱無論如何，著勉強給活下去，勇敢給活下去，袂使失敗，袂使佇生存競爭的世界，互中國人的火車母給咱轢死佇鐵枝路火車路頂。

祈禱：「主啊，你互阮生活佇真複雜的人間社會，毋是干單一條路，有真濟路會當活落去。感謝主，佇阮感覺無一條路通去的時，你有開別條路互阮行。願你互阮無感覺做一個凡間之子、做一個今世之子，無感覺見笑，反轉感覺這是阮做人的義務及光榮。阮著佇這世間認真生活落去，拍拚生活落去，勇敢生活落去，做一個成功的基督徒人生，做一個好見證。」