「地上的事及天頂的事」

我給恁講地上的事，恁尚且毋信，若給恁講天頂的事，恁豈欲信？

約翰3：10-15

陳柏壽 牧師

7/28/13 主日學

全本約翰福音書幾乎攏是主耶穌及猶太人teh辯論、說服、對立的記錄。歸本約翰福音的記錄來看，主耶穌佇地上的生活真無和平，無真溫柔合宜的境界，真濟「腦筋震盪」的言詞，伊三年傳道生涯用一句話來講就是親像海頂的波浪，起起落落，無一時安靜，日子 不止歹過。星雲法師講的「慈悲 沒有敵人，智慧不起煩惱」，豈有影？

最近王敏昌博士過身了後，人才發現伊發現的前列腺測試PSA，救真濟查甫人的生命，但是這個重大的發明竟然去互伊實驗室主任侵佔，這個美國人上司將伊家己的名排做第一，對外獨攬功勞，名聲及利益全包。另外一個新港人，嘛是佇同一個癌症研究所工作，也是真傑出的科學家，接受雷根總統「最佳青年研究癌症獎」、「紐約州學術科學獎」的李清利博士，也受伊的上司的欺負，結果才49歲就因心臟病發作英年早失。面對這種世間的不平，咱豈毋免反抗？慈悲豈會解決問題？

猶太人最無愛聽的話是主耶穌講，天父及我是一體，看著我就看著天父，父佇我的內面，我佇父內面。猶太人講因有亞伯拉罕做因的祖公及天父，主耶穌講佇亞伯拉罕以前，伊就已經佇遐（8：58）。上帝有法度將遮的路邊的石頭興起亞伯拉罕的子孫。恁無信我，至少也著信摩西，信摩西就是信我，因為摩西的話是對我來的（5：46,47）。主耶穌講遮的「天頂」的話，猶太人聽袂入耳，起怨恨，控告耶穌不但謗瀆上帝，閣用政治的理由控告伊反叛羅馬皇帝，給伊釘死十字架。所以主耶穌死做宗教犯，也死做政治犯。

咱世間人毋免為上帝辯解，嘛毋免為上帝伸冤。十字架的道理在佇：上帝降生入來人的世界的宗教及政治內面，也死佇人間的宗教及政治內面；上帝嘛真清楚給世間人講，咱人攏活佇世間的宗教及政治內面，也最後一定也是死佇宗教及政治內面。

亞伯拉罕是猶太人選民主義的起源。選民主義的奧義在佇保羅先生的羅馬人書11章所定義的：咱「外邦人」不過是野橄欖，去互人接枝佇好橄欖樹頂，咱外邦人完全無得通誇口。雖然這個講法及頂面講的主耶穌有關亞伯拉罕、摩西的的教示以及真濟福音書的教示有衝突，但是世間真濟人，尤其是各民族的智識分子，攏因為保羅這句話跋倒，無法度信基督教。

但是我teh思考這個問題的時，有我的答案：上帝實在非常公平，伊雖然封立猶太人做伊「特選」的民族，或是講猶太人自己封立因做上帝的選民，但是猶太人歷史以來，因並無卡幸福，顛倒受的苦難袂比別民族卡少。最近的例就是希特勒的日耳曼人屠殺猶太人的記錄，因為日耳曼人對家己的民族優勢，無法度及猶太人平立。現今的來看，別民族佇這世界興旺，人口不斷增加，增加比猶太人卡濟卡緊。另外上帝也興起一個仝款認為亞伯拉罕做祖公的亞拉伯民族，千外年以來及猶太人戰爭、對立。

猶太人雖然目前的世界佔有政治、軍事、經濟的優勢，猶太教倚靠基督教生存，親像寄生籐纏佇母樹生存，吸收母樹的營養。但是咱這枝受接的野枝，雖然互保羅認為是野橄欖，猶閣有法度供應母橄欖的營養，供應寄生籐的營養。野橄欖比母樹閣較興旺。野橄欖接枝以後，親像阮後壁彼叢李仔，新枝的李仔比母枝的李仔卡勇。這就是上帝的攝理。所以咱會當理解：選民主義實在是猶太人的惡夢，因為伊起造及他民族中間真高的牆圍。上帝並無互選民戰贏野橄欖。歷史以來上帝佇現實世界的運作，現實世界的演變及進化，上帝並無因為選民意識的問題有甚麼偏待別民族的證明。選民主義是一種「宗教政治」。不但阿拉伯人認為因嘛是上帝的選民，日本人、德國人、中國人、羅西亞人，世間各民族，嘛攏認定因才是上帝的選民。

宗教信仰是政治的「上層建築」。尤其對基督的信仰來看，信仰更加是講「天頂」的代誌；政治是講「地上」的代誌。耶穌及尼哥底母對話講：我給恁講遮的「地上」的道理，恁猶聽無，恁無欲信，何況我講「天頂」的代誌，恁豈聽有，恁豈欲信？古來猶太人及中國人差不多，真固執，專注重「地上」的事。

咱人的信仰，接受上帝、神、佛等，是經過二種路徑：一種是經過意識、日常生活的經驗、大自然環境（石頭、動物、植物、海洋、天界等等）；另外一種是經過超感覺的世界，無法度用人的頭殼、五官去體驗的上帝。主耶穌所講的「地上的事」就是teh講頭前的部份；天頂的事就是teh講後壁彼部份。

人的意識不斷teh進化。經過日時的意識，感官，感覺界的體驗，變做生存的原則，累積真現實的宗教觀。台灣的農業社會的歷史，特別是經過感覺意識的累積，經過生存條件及現實的妥協，產生台灣人的特有的人生觀。太古以來，台灣人用感覺做道具，經過動物性的發展，形成台灣人特有的社會及歷史。台灣人卡少掛慮「天頂的事」。

最近柯文哲醫師，台大醫師，演講中講著伊聯考志願台大醫學院是因老爸填的，結婚是因老母做的媒人，欲生幾個囝是因某決定。伊講到今為止，伊家己毋知teh做甚麼，日日佇病院工作，有時無愛轉去厝，轉去厝的時，囡仔攏teh睏啦，夫婦真少講話，伊總是感覺伊佇厝佇，親像厝裡的外口人。小小的辦公室，寂寞到欲起痟。伊欲揣轉去厝的路，但是轉去厝的路真漫長。一直到有一日，伊突破日常生活的封鎖，進入鑑察阿扁仔的病症，進入探討台灣社會的不義，伊才發現，干單全心注意「地上的事」及「日常的事」，無法度解決問題。

台灣人掛慮「天頂的事」的時大部份就是受著hia-ê宗教教棍的主宰，受著宗教企業的支配，toè因跳舞，受因思想控制及因的生活方式：可以談施捨、功德、慈悲，但是不可談社會政治、社會不義、政治結構等等的問題。chia-ê團體代表的，就是法鼓山星雲、中台禪寺、慈濟功德會等等，叫做「袂使講政治」的政治。遮的就是一群真強的「政治」團體。

「袂使講政治」的宗教團體，實在是一種菜市仔宗教團體，大甲媽的顏清標嘛是只有鼓勵伊的信眾來粘油香，毋通插中國人在遐teh為非作亂，顏清標才會當支配百外萬信徒，大甲媽過境的時大家phak佇土腳，將一切利益資源完全歸伊所有，將台灣資源攏送去中國福建媚州。台灣的宗教團體對台灣社會來講，是一種惡的源頭；因對台灣社會惡性的破壞，比對台灣的建設卡大。

按呢講台灣的基督教會是毋是抑脫離這群宗教政治團體？毋是。台灣的基督教會，包括長老教會在內，我想有一半以上攏屬佇這種「宗教」團體，用上帝的名，利用社會及政治資源，來追求因地上的利益及保障。台灣教會的運作方式，實在就是一種「宗教」。佇台灣互相車拼、競爭、鬥爭；將來決定台灣及中國的政治前途，台灣教會也是一個決定性因素。

基督教會是毋是一個「宗教團體」？若是教會的人利用上帝的名，來追求因地上的利益及保障，無欲用卡高的眼光，來看世間的不公不義，就是一個「宗教團體」。若是咱的教會，會當時常用卡高的靈眼看世間的代誌，談論世間的不公不義，探討上帝的旨意及天頂的代誌，毋是為著個人的利益及權勢，咱的教會就有別於所謂的「宗教團體」，就毋是宗教團體。

咱的團體叫做「教會團體」，毋是宗教團體，因為教會是上帝佇這世間的代言人，是世間的光及鹽。

我無法度佇此完全解說這個基督教毋是宗教團體的道理，因為用通常的理解，大家攏認為基督教本來就是一種宗教。欲將基督教對菜市仔宗教救出來，著用長期的時間，佇咱家己心內多多思考，大家再三討論才有法度。其實咱基督教會真濟強調的事項，譬如講：道德、人性、創世、無常、禮典、儀式、生活習慣、衛生各方面來看，基督教及其他宗教團體並無真大的差別。

基督教唯一會當徛起佇世間眾人類面前的道理，就是上帝親自來世間做人，道成肉體，耶穌就是上帝，普世救人的上帝。這毋是世間所有菜市仔宗教的信徒所會當容易了解的代誌。欲了解這個道理，需要「天頂」的智慧及追求自由的決心，著超越現實動物界「生存」的境界。

及醫療手術、換器官、肉體改造仝款，咱的心魂及精神嘛需要有新的目睭及新的耳孔，需要手術改造。咱今仔日的目、耳，已經及原始的人類離開真遠；原始人類原來自然生存佇上帝的靈界內面，後來因為人類犯罪，及上帝的關係斷絕，人的心靈就無法度及上帝直通，人的五官的直接感覺，及上帝的中間，已經受著遮蓋，對彼部份的世界，就是「頂面」的事，就看袂著、聽袂著。

咱若是注神看耶穌，就會看著「頂面的事」，就會看著台灣社會烏暗、腐化、爭權、奪利、獨裁、封建、破壞的另外彼面，咱的心肝就會活起來，增加咱戰鬥的精神。

人類自古流傳落來的神話、傳說，就是人及上帝神靈體驗的破片，實在毋是完全虛構的故事。古早人佇濛濛狀態中，有上帝的意識及形像。今仔日咱著迴光反照，從咱的近視之眼、盲聾之耳中，閣起來揣著原始的沉默的世界中，有古早的美音、知音。

人的嚨喉是人類肉體進化的最後成果。人不但會出聲，更加會講話，講因的族群的語言，講因的台語。牧師娘阿兄過身，我去給火葬以後，日本火葬場將骨灰囥入去金斗甕的時，將嚨喉彼粒圓骨囥佇最頂面，才蓋蓋。表示「出聲」的所在最重要。這粒礦物質互人出聲，不但會當回應上帝，嘛回應別人；不但互人感受咱的存在，互咱也感受其他動物及植物的存在。

約翰福音1：1 講：太初有「道」，道及上帝同在，道就是上帝。 這字「道」原文就是「聲音」、「語言」的意思。創造原來就是「語言」的現實化。不但太初是按呢，現在是按呢，將來的世界也是「語言現實化」的世界。啟示錄1：15,16講主耶穌降臨的時，伊的聲，親像眾水的聲，伊的嘴出一支兩面利刀；11：5伊的嘴欲出火，燒滅仇敵。將來的世界，不在物質的肉體，是在火的創造，對人的口吐出來的火劍來存在。這是精神上的人未來的進化。

歷史以來人類社會的形成及進化，不在動物體驗。中國人的孔子教的思想，教育後代幾千年的中國人，「不知生、焉知死」的思想，「食色性也」就是專講食飯、性欲的動物本能。所以袂當超越萬物之靈的戶碇，超越進化的監牢，袂當進入「天頂」的境界。一直到今仔日，中國人的社會政治結構，在因講的「中國特色的共產主義」的口號下，猶閣遵循這個基本生存的本能，強者愈強、弱者愈弱，喪失超越動物意識的束縛，無法度進入「天頂」的境界。

若是干單遵照「生存競爭」的法則，人類佇這個地球頂面早就已經滅亡絕種才著。人類進化及動物的弱肉強食的法則相反，所以佇地球頂面繁衍生湠。主要原因在佇人類會當跳越「地上」的制限、「現在」的制限；不只有在肉體之內的發展，反轉開展出人的精神力量，對創世開始的動物性，發展出「人類兄弟」的觀念：民主、自由、博愛，成做人類共同的記憶及精神的財產。一年透天種作的水果菜蔬，拄開始熟toh叫厝邊朋友緊來挽。台灣歹thàn食搬來美國，人美國社會嘛給咱接納。這就是進步的人類一家的精神。

今仔日親像中國社會彼款弱肉強食的所在毋是攏無，但是野蠻事件的發生，毋是現代社會進步文化的主流。人類千年、萬年的意識型態的進化，變做人類共有的歷史記憶，產生今仔日進步文化的主流，並毋是偶然。現在的人的共同價值不在欺負壓制動物，是在尊重生命，保護動物；不在注重肉食主義，是在菜蔬主義；不在開發奪取自然，是在自然生態的調和及保護；不在種族優越感，是在各種族平等；女性不在屈服在男性之下，是在男女平等。

馬英久的政策：獨專、自私、虛榮、偽善、愚弱、墨守成規、謹小慎微、濫用國家公共財產。伊及現在中國人仝款，是在違反人類的主流文化。這是一種非常異化的、非常的野蠻行為；台灣社會現象是進化遲頓民族特有的現象，台灣毋是行佇現代社會的進步的先端的道路。

基督教最高的人間愛的價值，「天頂的價值」，表現在路加福音第十章所描寫的好的撒瑪利亞的故事內面：一個猶太人對耶路撒冷去耶利哥的路中，拄著強盜，互人拍到半死。猶太人的宗教領袖，一個祭司頭，看著這個情形，越轉身就走；另外一位利未人，看著嘛緊閃過，毋敢出手救伊。猶太人是一個自持真重的民族，因看其他人無起，看隔壁的民族撒瑪利亞人做污穢人、下等人。Chhàu-tú-khám（抵好）一個外邦的撒瑪利亞人經過，雖然強盜可能猶佇附近，伊將身家財產安全完全囥一邊，為著救這個猶太人完全獻出。這個故事就是teh講著人類的共生的「愛」的DNA。

為著達到這種高度的人類共生的DNA，著克服所有低次的生存本能，克服所有有害的力量，克服所有地上及現在的掛慮，不斷進化。人類的進化始終是在火爐內面精煉的過程，互人漸漸精煉做真正的人，卡高的人，親像啟示錄所講：口出兩面有火的利劍的形像。咱著用最高人性的火，精煉咱的靈魂，時時講上帝的話，毋是講菜市仔宗教話。

人的超越「存在」、超越「生活」的卡高的「愛」（疼）的DNA，就是親像佇主耶穌內面，來世間拯救世間人的「意志」。不但上帝佇「意志」中，貫徹做上帝；咱人嘛佇「人的意志」中，貫徹做人。世間的一切，攏是意志的体現。巴勒斯坦人的反抗運動是因的意志，美國的軍事行動是表示美國的意志，中國及日本佇尖閣列島的對立，台灣人欲出頭天，攏是表現集體的「意志」。世間就是有各民族意志的体現，世間代誌才會遮爾複雜對立。意志是高次元，看袂著的物件。

靈界及意志是高次元，其中有熱情、理想、希望。遮的攏是「天頂」的未來世界的物件。未來的世界及天下的世界，摻雜做伙，就是親像耶穌佇馬大及馬利亞的厝內的情景，聽上帝的道理及灶腳煮飯的代誌摻雜做伙。天頂的代誌及地上的代誌，毋通濫濫做伙，著分互清楚。

雖然恁互我有這個機會來講出我的信仰，但是我今仔日只有用「地上」及「天頂」做討論的主題，做大家交換意見的平台。希望大家踴躍來討論。