失落的戰鬥

約翰福音12：25

陳柏壽 牧師

這禮拜一個人去海邊釣魚，欲跳過一個較高的坎仔，毋知家己的力頭已經無親像古早啦，跳一下煞tó-siàng-hiàⁿ，失失昏昏去毋知人。摔落去的瞬間，家己有聽著kha-chia-phiaⁿ心臟的部位「Hmm–」一聲，就失失昏昏毋知人去。真濟好心的美國人倚來我的身邊，緊kā我救，緊卡911，叫救護車，送我去附近病院急診，才救我這命。尾椎骨pit開，心臟定幾秒鐘。

本來計算好好，下晝欲做的代誌，miⁿ-á-chài欲做的代誌，今年欲完成的代誌，一切的一切的計劃，一瞬間攏變烏有去啦。我的身軀及生命，真可能佇一瞬間，bô-têng-bô-tî，就消失去啦。

自細漢開始我是一位真驚死的人。真驚死意思是真惜命，命對我是真重要。但是年紀愈大愈感覺人欲無命是一瞬間的代誌，生命不過親像「鴻毛」，輕輕仔toh飛去。

生命飛去的時，一生累積的名聲、財產、家庭、囡仔、愛情、懷念，一切佇一瞬間就飛去。咱一生攏親像坐佇名聲、財產、家庭、囡仔、愛情、懷念的巴比倫的河邊，坐tī hia啼哭。

國家及社會嘛是仝款，台灣人半世紀以來繼續坐佇金錢、物質、投機、宿命的河邊；猶太人半世紀以來繼續坐佇霸權、財產、優越、法統、道統的河邊。真緊，chia-ê人，佇bô-têng-bô-tî的中間，會親像鴻毛按呢，輕輕仔飛去。chia̍h-ê人，只有會坐佇巴比倫的河邊啼哭。

對細漢開始我不但真驚死、驚無命，我koh-khah真好強、無欲認輸。因為我的好強及無認輸，所以一生串串拄著真濟仝款的人，拄著仝款無認輸閣好強的對象。不但佇事業的頂面，就是佇教會牧會的中間，嘛拄著真濟競爭的對手。我想這是上帝刁工安排互我不可逃閃的命運。

我想上帝互我、逼我去做牧師的原因，主要就是欲互我家己去對付這種好強及無認輸的性格。做牧師人一生的運命就是你著行一條孤單、毋甘願、及人無仝款的路；同時閣一定袂使行一條孤單、及人無仝款的路。這是牧師人一生的宿業。

做牧師或是做基督徒的一生，就是佇「取得」及 「失落」、「合群」及「孤單」、「通融」及「競爭」的中間，時時掙扎，時時裁決，家己時時鬥爭。

「取得」是一種技術。「名聲」真濟是因為媒體的宣傳造成：我所識真濟真優秀的音樂家，因為無媒體的支援，一世人佇國民學校教室的風琴邊過日；Wilhelm Kempff因為無媒體的褒獎，一直到死，世間人無人知這位偉大的鋼琴家；Van Gogh因為謀生的技術無好，畫出來的畫無人買，所以一世人及散赤過日；真濟偉大的思想家、文學家、牧師，因為生活的技術無好，生活真艱苦。「地位」koh-khah是靠技術取得，台灣的馬英久的選總統，完全是靠集團買票、灌票、做票及電腦的作票，騙來的政治地位。「投機」是靠內線的資訊趁錢。「趁錢」更加是一種動物本性的充分發展，卡敢、卡奸巧、卡毋驚死的人，卡趁錢、趁卡濟錢。

主耶穌所講：「失落」是生命的源頭，這種道理，實在毋是咱在生容易了解的道理。伊講「毋驚喪失生命的人，欲得著生命」這款道理，實在毋是平常人有法度了解的道理（約翰12：25）。可能是咱活到人生的最後，嘛真難了解的道理。

但是咱欲認識伊講的這个道理以前，先已經看著耶穌失落互咱看：棕樹節前的禮拜，耶穌及學生佇橄欖山邊食最後的晚餐，耶穌將外套褪去來，腰縖巾仔，給學生一個一個洗腳；後來伊互人掠去欲釘十字架以前，外套嘛是互人剝掉，身軀光光，互人嬉弄。上帝受苦的最清楚的一幕，就是伊的外套剝掉的一景。

神學家Dietrich Bonhoeffer佇獄中欲予人處死刑的前一禮拜，拜托伊的爸母將伊所有的衫及鞋，送互需要的人。 1945年4月9日，伊嘛將身上的囚衣褪起來，赤身行上吊死台。

「失落」以前著愛先「有」。代先「有」物件，才有法度「失」。耶穌代先有伊家己的外套，後來去互人剝去；Bonhoeffer有伊家己的物件，伊才會當去放互別人。欲「施捨」以前，代先著「取得」。「施」比「受」卡有福的前提，是先有「得著」才有法度「施」。

意思是講：上帝叫咱代先著運用動物性的本領去趁錢、去生存，然後才有法度去犧牲、施捨、去失落。這是講著人生的「兩難」。人間的出發點是對動物性開始，sûi著年紀的增加，人漸漸才向彼的卡高的人間性、精神性提昇。

彼得講：「錢、銀我攏無，只有我奉耶穌基督的名，叫你起來！」意思是講，道理的起頭，是逐項攏無，逐項攏是空空。「基督的名」是空空看無的物件。但是這項佇空空的中間，就是欲產生「有」的物件及事情的動源及力量。

人的經濟行為本身嘛是對「無」中產生「有」的行為。別人看袂著，你看會著；別人趁未著的錢，你趁會著。這是人類經濟生活真奇妙的現象。人有經濟生活，其他動物界無經濟生活。

所以雖然經濟生活的一面是動物性，但是另外一面，嘛m̄-sī動物性。經濟生活是人性的一部分。人的社會，錢趁愈濟的所在，愈會趁錢，物質愈會發展。經濟是「無中生有」的物件。看非洲及歐洲的比較，咱toh知這个道理。

「核子」爆彈的原理是由「質量」改變做「能量」的表現，對真小的鈾(plutonium)的內部破壞，予伊產生原子分裂，就產生真可怕的發射的力量，幾分鐘以內可以將長崎及廣島幾十萬的生命絕滅殺死。這款的能源毋是用目睭可以看著，是以前人間毋敢想像的代誌。但是這種可怕的代誌，正正佇咱的目睭前發生。將來的世間，一定真濟是這款看袂著，超越咱想像的代誌欲發生。chím-má的核子母艦、核子發電廠，嘛攏是這種目睭看袂著小小的質量，產生的巨大的能力的現象。

人利用原子能的爆發，產生的能源，來利用做人生活的工具，伊同時產生真濟意料未到的悲慘的結局及後果。佇今年3月11日日本東北的地動牽連著福島第一核能發電廠的爆發。佇這項代誌發生以前，日本的政治家及商人，攏給日本人民講這種發電，是「第一安全、第一清氣、第一經濟，日本若無核能發電，日本國的經濟及文化，無法度變做世界一流的國家」。所有反對核能的人士，攏互人叫做「無實際的理想主義者」。

Chím-má發生災變以後，受災地區的人民，攏毋知欲按怎對付。每人佇因家己toà的田園，用因家己想的土步、土法去處理，用水道水去洗、用土剷挖土，挖的土嘛毋知欲埋佗位，無一項法則無一項公式可以遵循，真正是竹篙tàu菜刀，全國亂舞，天下只有叫天叫地。一直到今日猶是按呢。

核子能用來做核子彈，用來做核子發電廠，好名叫做「實用主義」、「效率主義」、「造福人群」。實在看來，是一種智識的誤用，是一種妖魔的智識。佇妖魔出現以前，咱攏看智識、智慧做好。人對任何一種的智識及智慧，攏充滿著無限的期待及幻想。

今仔日日本人及德國人已經無欲繼續予政客及生理人欺騙啦。今年底以前，這兩國的核子發電廠攏欲完全廢廠，百外間的核子發電廠攏khǹg佇原地，變做21世紀「人類智識的愚戇紀念博物館」。台灣的國民黨及商人到今繼續無欲覺醒。美國的商人及政客嘛是繼續按呢橫霸。

聖經內面有一句話講起：毋是所有的靈攏是聖靈，靈mā有邪靈（約翰一書4：1）。意思嘛會使講：毋是所有創造的智識、所有無中生有的智識、所有超人的智識，攏是正道的智識；因mā有可能是邪道的智識。

「經濟」雖然是一種無中生有的人類的智識，雖然是一種做人的必要條件，人無食飯會死，但是經濟發展的智識及技術，最後的結局來看，毋是人間幸福的絕對條件。伊有可能及核子能仝款，是人間的邪道，伊毋是人間幸福的條件。所以主耶穌講：人不可能同時服事上帝又服事瑪門（路加16：13）。

人間佇這種邪道造成的災難的時陣，猶閣無徹底謙卑反悔，只有頭殼鑽入去土腳，拚命欲chhoē生路，是無彩工啦。這種完全靠家己欲chhoē生路的態度，無欲仰望超然、超人的上帝的心情，是一種對造物主上帝、對生命的敖慢不遜。每日佇hia喊：拍拚！拍拚！拍拚！但是無一個最高的上帝的倚靠及指針。這就是對家己的生命的摧殘。

咱活teh就是欲確信咱真正是「赤身對老母胎出來，亦欲赤身轉去」這个道理（約伯記1:21）。意思是講世間的代誌，實在是對空空來，也是向空空轉去。

人佇真有限的生命中間，就是咱teh講：咱還看有、還摸有、還聽有、還食有、還聞有、還感覺著的真短暫的生涯中，欲按怎創造咱家己的「空間」、家己的物質、家己安心的立業。

一直到「時間」已經毋是佇咱手內的日子，咱無法度掌握時間的日子，咱著準備閣轉去彼个原來是空的世界的日子為止。

到彼日為止，咱攏無欲停步，咱攏繼續鑽佇土腳。

咱這个人生就是叫咱如何「對無中創造有」，同時嘛是teh訓練咱「對有的中間入去無」；用真的智慧、真的藝術、真的認份、真的覺悟的心情，來進入「無」、來進入「失落」的過程。基督徒的人生就是訓練咱「對無入有」，閣「對有入無」的過程。

德國日本政府投資真大，建立核子發電廠，但是因真緊就反悔，越轉身，行轉來原來的正路。因放會開，敢放手，敢失落，正是一種宗教上的回心反悔的過程。

國家社會及個人仝款，嘛可以反悔、會當反悔、會赴反悔。世間就是不斷的個人及國家靈魂的驚醒、奮醒的過程。何時台灣國的靈魂會當醒起來啊？這世間靈魂袂曉反悔的，豈毋是只有動物呢！台灣人豈只有是動物的水準呢？

放落、反悔是真大的工程，上帝的譬喻中間有講–著：雖然已經有99隻羊，1隻失落嘛互人真凝心，毋願放伊去，卡按怎盤山越嶺，嘛欲去給chhoē轉來；一粒珍珠拍落去，一定欲佇厝前厝後、厝尾頂到眠床腳攏去抄找，chhoē無m̄放伊煞；厝內有大囝，順順仔teh做工，但是彼位佇外口放蕩的細漢囝，是老爸日日心頭掛念的全部，伊一日無轉來，老爸toh一日倚佇門口等，等到日頭欲落山，欲等到看著伊的形影出現。

無欲放伊去，就是咱心中永遠的固執，真正毋是干單為著物質，毋是干單為著報償，毋是為著啥物不得了的目的；只有是為著一個講出的「心願」，靈魂內深的所在的一個「渴望」，只有「放落心」nā-tiāⁿ。

毋甘願、毋放伊去、放落心，欲檔外久？真濟時陣，卡按怎等放蕩囝無欲轉來，放老爸戇戇khiā佇門坎邊，永遠的等待；真濟時陣，hit粒寶貝的珍珠就是無閣出現；真濟時陣彼隻走無—去的戇羊仔就是無閣轉來啦。世間代代時時會迫咱去接受「永遠失落」的現實。真濟失落以後，就攏無閣轉來啦。「失落」的現實，毋是咱會當控制及主宰的現實。親像這禮拜我bô-têng-tî去tò-siàng-hiàⁿ仝款。

佇紐約的衛鄉教會牧會時，看著素真姊mo͘h著伊唯一的細漢囝Eric，駛二點鐘來教會做禮拜的時，toh想著伊31歲toh去互國民黨謀害的陳文成教授― 一位青年、純真閣熱情的疼台灣的學者。

一個生命的消失有時親像鴻毛，但是有時親像水湧，愈湧愈遠愈強愈沈重。文成兄的死，對素真及Eric來講，對所有疼台灣的人來講，若準親像是真大的失落。但是上帝經過伊的死，變做親像真大真強的海湧，佇每一個台灣人的心內衝擊。伊的死變做台灣人心靈的力量，充實台灣人的靈魂中反抗的力量。

文成兄的身軀摔落去台大校園的土面的瞬間，就是親像主耶穌的血滴落佇各各他的土面的瞬間，帶來改變世間新的氣力及希望。伊互我看著一個「失落生命」的新的境界。

注神看文成兄的失落生命的事件，不但激起個人心靈的意志，咱更加著用群體的力量，來保護伊這个失落的事件，深化這項事件的意義。

311日本東北的大地動及海嘯以後，隨時有將近2萬人死亡。佇海邊有真濟老人將chia-ê死去的身軀及面，給伊洗清氣，用白布及新衫給穿sù-sī, 準備萬一有伊的親人來認的時，會當看著一個媠閣清氣的面。失落到最後，嘛著失落到媠閣清氣。

尼哥底母對十字架落來的主耶穌的身軀，給伊洗清氣，閣用一百斤的芳油抹佇伊的身軀，用白色的幼布包好，囥入去新的墓內（約翰19：39）。

阮老爸死的時，有人準備紅色白色的大道公衫欲給moaⁿ，我講m̄-thang。 我給爸爸的身軀拭清氣，換內衫褲，將伊佇國民學校教冊，伊相愛穿的彼輸se-bi-ro，給伊穿互sù-sî sù-sî，互伊平安轉去。失去的爸爸，嘛是欲失落到真有氣派，真有尊嚴。

今後咱著將文成兄的死，裝飾予伊sù-sī sù-sī。咱來佇這个校園的所在，起一個記念的燈臺，互所有的台灣人知影這是一個偉大的靈魂失落的所在，互文成兄的死，變做失落產生的收成，互伊的失落變做充滿及收成。

想著文成兄，互我佇心靈中，看著我家己猶teh及hia-ê人teh比較、teh競爭，我看著一個真可憐真無路用的我；我有時我mā-ē看著hia-ê猶想欲繼續及我競爭的對手的目神，我若給深深看入去伊的目睭內，嘛會看著對方真苦憐真無奈的目神。世間人的靈魂、智識及意志是何等的脆弱及無助！

逐年四月東京的櫻花對滿開開始，十日內花就謝到乾乾乾。

櫻花失落的時陣，就是櫻花發新葉結櫻桃的開始。