趕出樂園故鄉以後

創世記3:22-24

列王紀上19:11-12

哥林多後書12:9-10

陳柏壽 牧師

金句：『獨獨屬神的人，寸度萬項事；但是家己無互世間人寸度。』

（帖撒羅尼迦前書5:14）

4/17/11

日本的總理大臣開記者招待會，上臺先給日本國旗行一個禮。我作牧師上臺以前嘛給十字架行一個禮。十字架代表咱的上帝主耶穌基督降世作人的記號。

今仔日是教會歷的棕樹節，意思是紀念百姓佇耶路撒冷城門口，大家手giâ棕樹枝，喝”Hosanna! Hosanna!”，意思是歡迎至大人君入城。彼隻驢仔子戇戇啊，tòe佇驢仔母的kha-chhng後teh行。

彼群人及彼隻驢仔母及驢仔子共款，因攏m̄知因是teh作甚物、teh喝(hoa̍h)甚物。只有閣過2、3日，kâng這群人，佇耶穌的面前，喝：『釘乎死！釘乎死！』。因家己嘛m̄知影因是teh做甚物、teh喝甚物。

咱做人最大的悲哀就是一世人m̄知家己是teh喝甚物、做甚物。一世人親像一隻驢仔子tòe佇驢仔母的kha-chhng後壁，戇戇仔行。

對 “Hosanna” 咱可以看出人生的不定及無常，嘛會使看著上帝佇這世間所拄著的不定及無常。日常生活的術語，親像咱tiāⁿ leh 講：『上帝無所不能』、『上帝無所不在』、『上帝是公義』、『上帝是愛』等等。Chiah-ê術語時互咱掛佇嘴邊，講著真緊，但是講無3分鐘toh bōe記得，嘛m̄知是講啥。Hosanna就是這款術語。

最近佇路邊看著一個看板寫講5.21是世界末日。下面有寫匯款的銀行及口座號碼。『世界末日』嘛是一種宗教術語。

日本東北地區發生的大地動及大海湧，15分鐘以內互二萬外條無辜的生命，去互海湧沖去。真濟人轉去尋古厝，去尋故鄉，故鄉已經無佇hia，古早的國民小學、市仔、廟寺、公所、公園、工場、親人、朋友…一切的一切，攏已經尋無啦，去互海湧ká ká去啦。故鄉不過是一場夢及懷念。有人講這是前世的共業，所以歸群人作伙死。

電視內面有真濟人佇倒去的厝堆teh尋人，有看著白衫頂印著 “Taiwan” 的義工，互我看著感動到目箍起紅，彼二字『台灣』互我想著我的故鄉，亦互我看著台灣人的人情及義理。日本仔政客給咱台灣團延二日，看中國仔的面色。面對中國的橫暴恐壓，台灣人才發現日本是咱的厝邊。

救援隊尋無活人，欲離開以前，排一列，佇死失的人的面前，立正、行禮。實在是人生的悲哀。

啊，忽然間我發現我家己嘛是日本人的一部分，彼個人嘛是我的同胞。佇hia,嘛有我活過的故鄉。八戶（Hachinohe)，宮古（Miyagi)，石卷（Ishinomaki)，松島（Matsushima)，仙台（Sentai)，氣仙沼（Kesennuma)，逐個海港及魚村，攏有我行過的腳跡。東北莊腳的國民小學，教室攏無燒氣，日本人講hiah呢有錢，就是按呢hiah khiām teh過日。

彼年欲離開台灣的時，欲離開家己的故鄉的時，有流目屎。彼時陣絕對無想講日本是我的故鄉。

佇日本工作、食頭路，及人競爭，互人欺負，定定一個人佇火車內面流目屎，一個人，目箍紅紅行佇黃昏的街路。為著顧三頓、飼某子，牙齒根咬leh，及人車拚，流浪天涯，真正是一位流浪天涯的台灣男子行船人。感謝上帝，最後我無輸人，上帝無互我倒lòe。

欲離開日本的時，我soah流目屎，知影這是我真可貴的人生的第二故鄉，伊陪我經過政治的烏名單的日子，亦經過飼家顧子的艱難的日子。

阮全家搬來美國，讀神學院、大學院、作牧師、教冊，閣作四個的囡仔的老父。20外冬牧師生涯退休，即滿逐日猶teh修理厝、作yard及現實生活戰爭。

閣落去欲搬去叨位？阮m̄知。但是即滿阮心內知影，美國嘛是阮的故鄉，有烏的、白的、黃的，中晝時佇Costco,大家攏teh食$1.50的hotdog，就過一頓，實在是真可愛的故鄉。

上帝佇人的心目中有二款：一款是萬權能的、無所不在、無所不能的上帝；另外是一位憐憫、受苦、軟弱的上帝。基督教有十字軍的帝國主義的上帝，追求的是全世界歸上帝國的Crusade、Christendom的上帝，叫做『大使命』的上帝；嘛有佇十字架頂受苦、哀呻的的上帝。

共款，這個美國有世界上製造絕大部分武器、時時準備欲打人的帝國主義的美國，最近Obama作總統有卡改一屑仔；嘛有世界上第一有自由及民主的美國。這是一個矛盾的上帝觀，嘛是一個矛盾的美國觀。對咱teh變老的人生來講，我卡愛後面的彼個上帝，嘛卡愛後面的彼個美國。

本來我是帶『故鄉症頭』真重的人：這旁溪水、彼旁山，這叢蓮霧、彼叢檨仔，iam-kok-ke、灌肚猴，掠烏龍仔sio-kā。細漢時代的情景，時常佇夢中出現。

經過chiah-ni̍h濟遷徙，經過chiah濟人生的風波，囡仔一個一個生，即滿第二個娶『mo̍͘h西瓜』的，講西班牙話，孫仔轉來厝干單會曉kà阿公講：『a-koa! a-koa！』是愛欲飲水的意思；第三個娶『mo̍͘h東瓜』的，講日本話，拄著阿公，一個叫我『A-khong!』，一個叫我『A-gōng!』；第四個欲嫁『mo̍͘h菜瓜』的，講越南話。大的m̄嫁，講伊『mo̍͘h苦瓜！』著好。一個一個全世界散散去了了啦，剩我及牧師娘bi̍h佇Seattle彼間舊厝。

即滿我才知影當初上帝是按怎欲將阿當及夏娃趕出樂園、趕出故鄉的原因，就是不准因留戀佇無煩惱、無憂愁、一切滿足的境界。上帝叫因出去，互因離開熟似、快樂、滿足、安心的故鄉。離開故鄉變作一個咱做人的條件。

有一擺我去kā一個老大人作葬式，看著伊一個子，將老父七、八十年來寶當當的，攏已經變黃的家庭相片，歸堆攏拚落去糞埽桶，因講chiah-ê攏無人欲閣看啦。Chiah-ê舊相片是老大人儉歸半世紀的相片，是老人內心最安慰、最懷念、最依賴的一片心靈的故鄉。但是囝孫會佇一瞬間，給這個心靈的故鄉，拚落糞埽桶。咱將家己的囝孫的相片保惜到若命，實在是留teh互咱家己看niâ啦，囝孫仔無人leh給咱『知道』啦！

Mài講別人，講我家己就好。我有一擺轉去溪邊厝故鄉，欲去尋阿祖的墓，尋遍墓地，尋無陳清山阿祖的墓。聽講真早以前toh去乎人lu作田地啦。人過三、四代，墓地toh尋無啦。我即滿及人作伙，佇Seattle買十塊細塊墓地，本來拍算欲叫囝孫仔轉來遮作伙埋，即滿想起來是真無可能啦，不但按呢，連囝孫仔欲轉來chiah看阮的墓牌，嘛是無可能啦。墓牌是欲互咱一代家己看niâ啦。上帝互人類想欲留佇世間的物件，攏變作『徒然草』(Tsunezunekusa)，一切攏是白工。

我的看法是：人反叛上帝的代誌，m̄是 hiah大條的代誌。17世紀英國詩人John Milton寫真有名的冊『失樂園』(Paradise Lost)。寫講撒旦入蛇身，去及夏娃講話，夏娃問伊：你是按怎會曉講人話？蛇應講：『因為我有食『智慧樹』頂的果子。上帝叫你bē使食，就是欲試你有hit種勇氣亦無啦！』

是按怎講智慧果bē使食？三、四百年前這位詩人toh按呢寫：上帝的天使Raphael給亞當講，你一世人一定學真濟作人應該有的智慧，但是猶有真濟其他的智慧，你無一定著愛知。即滿想起來嘛m̄是無道理，親像福島核子爐暴炸的代誌，人類製造核子炸彈的代誌，人用細胞去製造人、製造其他動物，人用基因變化去製作有毒的青菜水果的代誌，攏及人偷食智慧果有關係。真濟時陣，人所愛的智慧，m̄是真正人須要的智慧。

上帝經過這項代誌，互人知影，因為人的私心及貪婪，第一智慧會產生惡果。第二就是給咱講作一個人的基本條件，就是流汗做工挖土，才有飯好食。干單食好作輕可，一定bē成功。第三項道理，上帝給咱講，著時常搬厝。基督徒及遊牧族同款，著時常離開心愛的故鄉。再會吧，心愛的故鄉！

上帝給亞當及夏娃送出來到伊甸園的門口，佇門口設置cherubin (基路賓），就是有動物的面形的天使，親像khiā埃及金字塔門口顧門的天使，互人雖然懷念故鄉，但是hō͘人檔佇外面，bē使閣轉去。上帝閣安置有火的利劍，固守『生命樹』的果子，互人無法度永遠bē死，互人對土出，佇真短的生涯，就會歸土。離開故鄉，生老病死，變作作人的運命，人會死才是人。人m̄是上帝。

講來到chia，嘛有人講：上帝將亞當及夏娃趕出去以後，伊家己一人佇樂園真孤單。最後姑不二將，歸去嘛來世間，降世作人，及人間作堆。歷史以來，干單基督有teh講上帝來世間作人的代誌。

上帝給亞當及夏娃送出門的時，抵好日頭tih-beh落山，天開始變天，涼風起吹，樹葉仔起落，實在是一個真稀微寂寞秋天的黃昏。這時陣的上帝，做衫互因穿。上帝不但做衫，閣是做『皮衫』互因穿。上帝即滿才知影，伊的囝兒須要穿衫。上帝的思想嘛leh改變，以前伊m̄-bat按呢想。

上帝知影，這二個一下出門，不但有外口大自然的冷風的打擊，閣有人間社會的無情無義，有社會的不公不義，有殘忍冷酷的政治，有食飯趁錢的經濟的壓迫的現實。

最近才知台灣人熱心為日本人地動獻互『台灣紅十字會』幾若億的錢，干單差不多四分之一寄去日本，剩的攏互hiah-ê龍及蛇霸佔tiâu leh。幾百年來，台灣人的脆弱無助，親像略略仔toh欲寒著的身軀，隨時toh去互有權勢的人蹧躂及欺負。

最近我才知是按怎阮兜樹仔頂，小隻鳥仔忽然間攏變無去。有一日，佇我的目睭前，一隻食鳥的鷹對土腳chông起來，對樹仔尾溜頂，給這隻小鳥仔打落來，佇草埔頂，kā伊食到剩這一支毛。我拾起來，紀念這隻乎人食去的弱小的生命。人活佇這世界，及這隻細隻鳥仔同款，時時面臨大自然的橫暴，以及人間社會的恐怖。上帝知影，所以伊做衫互咱穿。人及世間所有的動物無kâng，就是人須要穿衫，動物閣卡可憐，無衫好穿。

人真愛講，就是因為人類反叛上帝，所以互人致使到這種運命。我是顛倒péng想，我是看著上帝及人間的關係teh進化及改變。對上帝hō͘人tòa樂園、叫人離開樂園、閣給人穿衫，chiah-ê代誌，不但交待咱作人的條件，嘛互咱看著上帝款待人的方法，漸漸teh改變。

人類反叛上帝的代誌無一定是bái代誌。咱講這是bái代誌的人，是khiā佇上帝的立場teh講話。咱作一個人，只有會當khiā佇『人』的立場出發，來去尋上帝，就是用人的智慧去尋上帝，所以我的冊叫做『人智學』。

人類犯罪是人本性的一部分，是上帝賞賜人的本性的一部分，m̄是做人有法度家己選擇的代誌。上帝互人作一位真正的人的價值，就是在佇人有法度、會hiáu反抗。真正人的價值，不在逐項事攏給上帝講yes! yes! yes! 不在事事替上帝講話，親像真濟gâu講話的牧師按呢。人的價值是在佇人時常會給上帝講No! No! No!

我彼個tòa佇 Chciago『mo̍͘h西瓜』的查某孫仔，即滿會曉講第一句話，除了講：『Aqua！Agua！』以外，就是講：『No!  no!  no!』我看真濟細漢開始一直喝：『不要！不要！』的囡仔，哭kah大聲細聲，佇火車頭nòa佇土腳m̄起來，但是大漢以後，這款囝仔會卡bat代誌，會形成卡克制、人格卡成熟的人。

人類會生長大漢的過程，就是因為人類不斷teh給上帝講No!上帝款待人類hiah呢好，就是上帝容允人類不斷給伊講No，容允人給伊反抗。上帝對人類的慈悲及疼痛，就是對人給上帝講『No !』的時陣，顯明出來啦。

今仔日咱teh怨嘆上帝無bô-têng-bô-tî用大水淹死人。我teh想上帝嘛是及咱作伙teh講：『NO!』，上帝嘛是及咱作伙teh流目屎。上帝的愛，在佇上帝及咱作伙teh講『NO !』。上帝就是NO !

古早的上帝，一直維持一個Oyaji Kamisama （親父神樣）的形象，伊用尊嚴及權威來管理世間的上帝，伊雖然有愛，但是伊的愛是bih佇伊的尊嚴的後面。

但是上帝造化的形影，對佇匿佇嚴格及尊嚴的面形，漸漸進化到今仔日的聖經的所在，講著以利亞的故事，一直到最後上帝親自來世間作人，來到世間的上帝受盡世間的酸鹹苦chiáⁿ，作世間的囚犯，互人釘佇十字架頂為止。上帝來這世間流浪，互世間冤枉，上帝是流浪的行船人，坐這班最後的夜快車，唱再會的夜港都。

台灣的紅十字會的國民黨的會長，講社會對紅十字會無照起工匯錢去救災，是因為民眾無教育。台灣的立法委員佇立法院講學生無“立正”及馬總統講話，著siàn嘴phé，閣著跪三日。這就是佇台灣的中國文化封建權威統治的心態。

今仔日欲講以利亞以前，咱閣來看三月十一下午2:30佇日本東北地區發生的大大地動及tsunami的代誌。二萬人，若m̄是死佇海邊，就是去互海湧沖去，若無就是hông teh佇厝瓦腳。咱真正看著大自然的威力及暴力。

Tsunami過了的日本東北海岸，聽講最近的黃昏閣變到真安靜、真súi，日頭欲落山的時閣有五彩的雲，宮城的櫻花猶閣開到真白。大自然性地發了後，即滿換作笑面。一個老父，佇這個櫻花的花蕾欲開的季節，想著舊年全家作伙看櫻花的一景，猶佇海邊teh尋伊的某、老母及三個子的身屍。因攏互海水m̄知影沖去叨位啦！

上帝豈真正活佇大自然的威力及暴力，嘛活佇大自然的溫順美麗的內面？上帝的面形豈有影變化hiah緊？上帝豈有影hiah呢thian-thé、自專、任性、無理，上帝豈m̄是teh譏笑世間眾生嗎？大自然親像魔鬼，有時是顯出天使的súi面，有時親像惡蛇的毒面。上帝的面豈有可能活佇大自然的無道的內面？

咱佇以利亞及上帝見面的一境，看著上帝真正無活佇大風、大水、地動、雷公閃nà及大火的內面。上帝無活佇大自然的威力及橫暴的內面。顛倒上帝變作一位活佇真脆弱、無力，只有剩一息仔氣的聲音。咱的上帝對一個Oyaji Kamisama,對一個發號司令的上帝，變作一個脆弱、無權威、無力量、無聲音的上帝。威力及權威已經m̄是上帝的代表。

古早人相信『天行健，君子自強不息』。但是這個天，這個自然，對tòa佇仙台海邊的人，對tòa佇印尼的Aceh海邊的人，對700外個活活去互山土埋佇下面的高雄小林村的人來講，已經bē通啦。

對泰初開始，基督教就是teh教示咱，咱的上帝絕對m̄是大自然的上帝。大自然是上帝的創造物，上帝m̄是大自然。上帝互菜蔬、樹仔大叢，互日頭遍照大地，互四季運行；但是菜蔬、樹仔、石頭公、大樹公、日頭、四季，攏m̄是上帝，攏m̄是神明。

我的想法是，上帝創造自然以後，伊共款著去對付自然的橫暴；抵好親像上帝創造人類以後，伊共款嘛著去忍受人類的反叛共款。歷史以來，大自然不向上帝講Yes! Yes! Yes!人無給上帝講Yes! Yes! Yes!所有人類的反叛，及大自然的反叛，攏是共款。上帝容允一切受造物的反叛，容允受造物的No! No! No!，就是上帝的攝理及世間的逆理。上帝的攝理就是活佇伊的逆理的內面。

以前我拄著艱苦的時，多少佇眠夢著會想著明年櫻花會閣開，明旦再日頭會閣出來，但是漸漸我才覺悟，若m̄是上帝teh chùn的聖手扶teh，甚物時陣彼ê夭壽海湧欲閣來，咱m̄知。世間上已經無甚物『天行健，君子自強不息』的代誌，若m̄是上帝的親愛的手扶leh，明旦再日頭一定bē照常出來，若m̄是上帝特別的恩待，我種彼叢日本梨仔，明年bē生。一切攏在佇上帝，世間一切的自然，攏m̄是自然。若無上帝就無自然。

這個上帝是不斷teh及自然、及世界、及人生的運命teh戰爭的上帝，上帝嘛是叫咱著不斷去及自然戰爭，所以伊佇創世的開始toh交待人類著去『管理』這個世界，去開發、整理、挖土、去生產。

自然須要去『管理』，若無伊有時會起歹，核子發電廠著去好好管理，若無伊會起毒；菜蔬著管理，若無管理，野草就發到滿滿是，蚊仔虫仔會kā你的菜，食到乾乾乾；基因配種的動物，著好好管理，若無咱會生破相囝。人著用智慧去管理世間、管理自然，乎自然聽咱的話。

有真濟人給我講：希望上帝經過這個大水的事件，乎日本人醒起來，來看著彼個創造天地的上帝。因講話親像基督教的十字軍。

幾千萬年以來，日本人是生活佇大自然的橫暴的內面的民族，這二禮拜猶繼續teh地動。所以因的人生觀、日本人的文化內面，有真濟『脆命』及『宿命』的成分。咱豈會當用『脆命』及『宿命』給日本人推銷基督教？

細漢佇莊腳的kám仔店，有人來寄便藥仔，胃痛食這包，頭殼痛食彼包，寒著食另外一包。即滿咱來給日本人講：海湧來的時，食耶和華這包，地動的時食創作天地彼包，著火災食全能天父彼包。豈有影hiah簡單？基督教的道理，豈是按呢？

M̄是。咱的上帝早toh活佇日本、活佇日本人的心目中。佇這個悽慘的情境，咱攏無講話的權利，上帝嘛不准咱用伊的名為伊亂講話，上帝無必要人去為伊講話、為伊推銷，為上帝賣便藥仔。聽講時時用上帝的名的人，駛車tiāⁿ-tiāⁿ會拄著紅燈。

你豈m̄知上帝佇今仔日，及日本人、及印尼人、及台灣人，及hiah-ê無緣無故teh受苦死亡的人，作伙流目屎嗎？因hiah-ê人的心內的上帝，及咱的上帝無共款嗎？咱的上帝豈m̄是日本人、印尼人、台灣人的上帝嗎？

基督教對絕對權威的國家宗教，到kah絕對權威的教皇宗教，進化到有解說聖經、敬拜上帝的自由的宗教改革，一直到今仔日無教會主義的抬頭，教會權威的失落，宣教師佇南美、日本、中國各所在宣教的態度及方法的改變，互咱看著基督教是一個不斷解放的宗教。

上帝對一個絕對權威、絕對的命令、絕對的律法的上帝，絕對控制自然，絕對自然神的上帝，漸漸進化到一個微小、安靜、受苦、犧牲的道成肉體的耶穌。歷史上咱看著一個不斷teh變換、不斷teh自我解放的上帝。

十字架的道理，就是聖保羅所講的，佇伊最軟弱的時，就是伊最堅強的時；咱的上帝佇伊顯出最軟弱的一面，就是伊最堅強的時陣。上帝的堅強，顯明佇為耶穌受苦犧牲的十字架。佇十字架頂的上帝，是一位最堅強的上帝。

用另外一句話嘛會使按呢講：

上帝的『慈悲』，在佇『自然的橫暴』中，顯明出來；

上帝的『正義』，在佇『人間社會的不義』中，顯明出來；

上帝的『永遠』，在佇『人生的脆弱及不定』中，顯明出來；

上帝的『完全』，在佇『人的不完全』中，顯明出來；

上帝的『聰明智慧』，在佇『人的愚戇』中，顯明出來；

上帝的『財富』，在佇『人的散赤』中，顯明出來；

『天國的幸福』，在佇『人間的目屎』中，顯明出來；

上帝的『保庇』，在佇人間的不斷『遷徙及流浪、離開心愛的故鄉』的頂面顯明出來。

咱佇這世間尋無路，行到絕路，一切攏無望的時陣，完全無有答案的時陣，上帝差遣天使，用聖手給咱扶teh,互咱知，伊猶佇hia。

我相信這位活佇逆理內面的上帝。我相信及咱作伙流目屎的上帝。我相信放互咱敢去懷疑的上帝。我相信叫咱搬厝離開故鄉的上帝。

我嘛相信稱咱作伊的朋友的上帝。

我嘛相信坐佇天堂的生命樹的頂頭的上帝，因為咱經過所有人生的風湧、艱難、困苦以後，咱嘛欲轉去彼叢生命樹的身邊，佇hia有永遠的平安的上帝及咱同在。

祈禱：

『生命的源頭，阮的天父上帝啊，這世間濟濟代誌發生，阮bē了解，阮無答案，霧霧無明。但是有一日阮欲及你面對面，及你見面。上帝啊，你是生命的源頭，生命在佇你，死亡在佇你。但是阮深信你及阮作伙，同款佇生命及死亡的戰場征戰。阮深信你已經戰贏這場戰爭，你已經贏過撒但、贏過死亡。你有一日欲chhōa阮轉去，轉去生命樹的所在，得著永遠的安息。靠主耶穌基督聖名求。阿們。』