『接耶穌回家』

陳柏壽 牧師

聖誕節就是上帝回家。但是無位好去。

約翰福音書開宗明義就寫講：上帝轉來家己的所在，伊家己的人無beh接納伊（1:11)。

古早有一個故事講十六世紀大航海時代，有真濟冒險家，坐篷船出海，向著矇矇眇眇的大海出發。穭濱遜飄流記就是teh描寫一個水手，經過大風大湧，破船了後，飄流去一個無人島，佇hia，一個人自立求生，經過十九年後去互人救著，轉去伊的故鄉的故事。

這個故事是teh描寫這個老水手的冒險、勇敢及韌命。但是這個故事有一個續輯，是teh描寫這個老人另外一旁的故事。

離開十九冬的老水手的馬車轉來到故鄉的舊路，心內閣歡喜、閣緊張。已經十九冬啦，舊厝m̄知變作按怎，in某m̄知猶會記得伊無？人m̄知猶有teh懷念伊？

『海島七號』的電影內底彼位原住民青年，拄著人toh對落袋仔內提出伊古早女朋友的相片，講：『這位就是我的魯凱公主，很漂亮hó͘ⁿ ! 你若遇著伊，tio̍h給伊講，我還很愛他！』

老水手的心情嘛是按呢，無論離開外久，無論離開外遠，心心念念嘛是伊的老厝及伊的某。馬車愈近，心肝頭跳愈緊。

日頭已經落山，遠遠toh看著厝的窗仔門有一pha燭火的光，有人佇厝。伊拈腳拈手，對外口chhip入去窗仔門。

噯-喲-òe！伊看著in某已經改嫁，生四個子，一家六人圍佇桌邊teh食飯 — 一個真溫暖、真幸福的一幅美麗家庭的寫真。

老水手回到伊的馬車，khia上馬，將馬韁giú hō͘ ân，繼續向前行。

雪愈落愈大，天愈來愈烏，頭前的路愈看愈無。但是離開故鄉久久的老水手知影：伊若轉來佇in的中間，就是增加這個家庭的人生的負擔。Tiām-tiām–ah離開就好啦！

十九年的希望、十九年的期待、十九年的紀念、十九年的祈禱。海湧hiah呢大，路途hiah呢遠，十九年背的十字架，真正是一言難盡。

若是主耶穌就是這位老水手，這個故事代表二個意義：一個是上帝去hō͘世間的人間家己的溫情、家庭、親情的圈圈，阻當佇門口，無法度入去；另外就是上帝來世間只有付出、只有憐憫、只有同情，雖然經過濟濟委曲冤枉，伊嘛無beh增加人間的煩惱及負擔，無beh入去內面。

腓立比人書2:6-11所描述的上帝一生的旅程就是：伊對天堂降落世間，『道成肉體』 — 對一個創造世間、主宰宇宙的力量，縮小家己，屈服家己，將家己變作一個有限的『人』。

來到世間的上帝，tuì第一日開始，就無位thang去：伯利恆全城的客店，無一間有空位。上帝去hō͘人間拒絕佇外面，姑不二將去kap大自然的精牲tòa作伙。

伊出世以後隨時tio̍h『走路』，因為有權勢的人beh掠伊去thâi。所以伊hō͘父母āiⁿ去埃及避難（馬太2:13-15）。

伊轉去家己的故鄉拿撒勒，嘛去hō͘伊的厝邊隔壁親人朋友看無起，甚至beh將伊sak落去山崁死（路加4:29)。上帝去hō͘伊厝邊的人『近廟欺神』，去hō͘家己人看無一塊，hō͘家己的人欺負，連伊的兄弟嘛看伊無起（約翰7:5)。上帝佇這世間的運命，kap凡間世人佇這世間的運命，差不多共款。

伊的人生的旅程，就是親像先知以賽亞所寫：『伊無好形狀無威儀，伊hō͘人看輕，hō͘人放栜；伊一世人受濟濟苦痛，常常拄著憂悶』(53:2-3)。

最後伊孤單一人去hō͘人掠去山頂，hō͘人釘死佇十字架。伊去hō͘人掠去，是去hō͘伊家己所疼的學生 — 最後晚餐的時頭殼khòa佇耶穌肩胛頭的hit個學生 — 用30兩銀仔kā伊出賣hō͘敵人（馬太26:15)。

世間人無人知影彼位佇外口流浪十九冬的老水手，曾經bat閣轉來伊日日數念的舊厝。伊bat轉來，但是伊tiām-tiām–ah離開！後來老水手死佇甚物所在，不但世間人無人知，連伊家己的某、親人朋友，嘛無半人知。

受世間人拒絕的耶穌，離開地面上到天堂，坐到主宰宇宙的寶座頂，完成伊來世間作人的一個『循環的旅程』，親像買來回車票，伊閣轉去天頂。

其實伊這個旅程，是一個非常孤單、寂寞、無人知的旅程。若m̄是聖神做工，上帝佇耶穌身上，訪問過這世間，閣tiām-tiām–ah轉去，有可能無半人知。

最近日本基督徒作家曾野綾子(Sono Ayako)所寫的冊內面有講著『沈默之美』(chinmoku no utsukushi)。是講：人生所有的怨嘆kap悲哀、所有歡喜kap笑容，一盡攏m̄免講出嘴，一直留到上帝hia，一切交hō͘上帝，che是至美的靈魂。

咱人生命攏有二個基因：『靈魂』的基因，以及『肉體』的基因。靈魂的基因是全人類共通的特色，因為是對上帝來，kap上帝牽連作伙，親像葡萄枝接佇葡萄樹共款。但是肉體的基因，人人無仝。

上帝親自降臨世間，一方面是伊靈魂的降世，伊是上帝的神性的顯見，伊是世間所有靈魂的歸宿。但是另外一方面，伊有人間肉體的基因，因為伊降世作『人』。所以耶穌身上包含有『神性的耶穌』kap『肉體的耶穌』二項。這二項無法度分開。

靈性上，耶穌代表上帝佇人間普世的、共通的精神kap靈魂；但是肉體上，無人知影耶穌生做甚物款：伊有可能是黑、是黃、是白，嘛有可能有蓮霧鼻，嘛有可能煎菜脯卵、包肉粽、食番薯簽糜。咱講台灣話上帝嘛聽有。上帝講的台灣話，一流美(súi)，因為台灣話嘛是上帝的老母話。上帝留真濟空間hō͘世間人去接納這位肉體的上帝。台南天主堂門口的馬利亞的銅像，穿台灣衫，生作蓮霧鼻。耶穌的相佇非洲攏是黑面的，嘛真少發嘴鬚。

所以台灣人基督徒不但kap普世的耶穌的神性有牽連作伙；佇台灣人的民族、文化、習慣內面，耶穌嘛是咱完全的一部分，是咱的完整的傳承kap驕傲，是咱的骨肉。

全世界各民族攏會佇耶穌身上，得著in民族的認同kap認証。世間所有的信仰kap神學，有一日攏會將上帝潛藏佇後面的本性，上帝無出聲的部份，一一歸還原位，一一進入in的心內。

今年聖誕的歌聲閣再響起啦！耶穌閣一擺孤單一人來到咱的門口，teh khok咱的門啦！外口真冷，風sńg-sńg–kiò，伊猶佇hia teh khok門….

台灣選舉的時，3,000台票就有法度給一張票賣掉。上帝疼世間，就是tio̍h面對著這世間『殘酷的愛』的現實：『愛』會去hō͘『錢』賣掉。上帝亦tio̍h面對著這世間的『愛的殘酷』：孤單、出賣、死佇十字架。

對台灣人來講，今年beh用30兩銀仔來賣耶穌，已經無夠看啦！中國錢卡好賺啦！若是beh正式khai錢賣耶穌，已經有人開三千萬、三億萬，嘛m̄是甚麼大代誌啦！生利人對賣耶穌的代誌真m̄驚，beh賺，卡濟嘛有！賺錢賣耶穌，賣耶穌賺錢。

台灣的gâu人攏認為：最好是放耶穌家己一個人佇門外khok門。無看好了了！ 無聽–伊好了了！橫直上帝來世間，伊本來就是無位好去的人啦！

M̄是按呢！今年咱絕對bē使按呢！上帝拄著世間的逆勢kap逆風，就是kap咱作人共款：作人嘛會拄著的逆勢kap逆風。上帝的運命，就是咱的運命。

今年開始咱來接耶穌回家！今年開始咱tio̍h將上帝的逆勢kap逆風扳回轉來：將耶穌chhōa入來咱兜，chhōa入來咱內心上深的所在，hō͘嬰孩耶穌有安心thang tòa的房間，hō͘『平安暝，聖誕暝，真安靜，真光明』的歌聲，會當chhèng到天庭，hō͘眾天使kap咱台灣人作伙歡喜。