『無增加別人負擔』

哥林多後書12:13-18;使徒行傳20:34-35

陳柏壽 牧師

十六世紀大航海時代，有真濟西洋冒險家，坐篷船出海，向著矇矇眇眇的大海出發。『穭濱遜飄流記』就是teh描寫一個水手，經過大風大湧破船了後，飄流去一個無人島，佇hia一個人自立求生，經過十九年後去hō͘人救轉去伊英國的故鄉的故事。

這個故事是teh描寫這個老水手的冒險、勇敢及韌命。但是這個故事的續輯，是teh描寫這個老人另外一旁真深的心懷。

離開十九冬的老水手的馬車轉來到故鄉的舊路，心內閣歡喜、閣緊張。已經十九冬啦，舊厝m̄知變作按怎，m̄知有去hō͘八八水災的土石流淹過？In某m̄知猶會記得伊無？人m̄知猶有teh懷念伊？

『海島七號』的電影內底彼位原住民青年，拄著人toh對落袋仔內提出伊古早女朋友的相片，講：『這位就是我的魯凱公主，很漂亮hoh ! 你如果遇著伊，tio̍h給伊講，我還很愛他！』

老水手的心情嘛是按呢，無論離開外久，無論離開外遠，心心念念嘛是伊的老厝及伊的某。馬車愈近，心跳愈緊。

日頭已經落山，遠遠toh看著舊厝的窗仔門有一pha燭仔火的光，有人佇厝。伊拈腳拈手，對外口偷chhip入去窗仔門。

伊看著in某已經改嫁，生四個子，一家六口圍佇桌邊teh食飯 — 一個真溫暖、真幸福的一幅圖。一個真súi的家庭。

老水手靜靜回到伊的馬車，馬索giú越方向，再出發。

雪愈落愈大，天愈來愈烏，頭前的路愈看愈bē明。但是離開故鄉久久的老水手知影：伊若轉來佇這個新的家庭的中間，就是增加這個家庭的人生的負擔。Tiām-tiām–a離開就好。

十九年的希望、十九年的期待、十九年的紀念、十九年的祈禱。海湧hiah呢大，路途hiah呢遠，十九年背的十字架，真正是一言難盡。

看hō͘破、放伊去，親像轉來故鄉的老水手按呢，就是真正的福音的道理。福音的道理就是佇人生的最後的最後，嘛是先去想著別人。人生無必要去增加別人的負擔。

保羅講：人生只有三項物件，hō͘人活落去，這世間只有剩三項物件。這三項物件叫做：『信』、『望』及『愛』。其中最大的一項是『愛』。保羅佇哥林多前書十三章，hō͘人稱作『愛的讚歌』的內面，嘛寫講：甚物是『愛』？『愛』就是、『凡事包容』、『凡事相信』、『凡事向望』、『凡事忍耐』。

意思是講：佇『愛』的內面包含著『信』及『望』。

會增加別人的負擔的『愛』豈是真正的愛？老水手十九年來，心內『相信』，心內有『向望』，心內有『愛』。

但是伊的靜靜離開、伊的不存在，是表現一種閣卡深、閣卡真實的愛。這種的愛，就是永遠無欲增加別人的負擔的愛。

這世間無人知影伊bat閣轉來探這間舊厝。

咱每日的人生本來就是give and take的循環。基督教的福音是講：To give比to take閣卡有福氣。用主耶穌的話是講：『施比受卡有福』。

你若繼續give,到尾啊會攏give了了，無物件thang閣give啦，所以叫做『give up』。Give up就是看hō͘破、放伊去的意思。實在講起來，真正的愛，在佇give up,在佇看hō͘破、放伊去。無條件放伊去啦！

結婚前，男朋友kā女朋友講：『我無條件，完全愛你！』結婚了，全全是條件。

第二次世界大戰，日本兵佇中國大陸及蔣介石的兵戰，無一擺輸，但是最後受著美國投的二粒原子彈了後，日本的昭和天皇佇radio放送講：『日本無條件投降』。『無條件』的意思是講，日本無第二句話啦，一切攏去啦，欲煎欲煮由在你啦！

今年的父親節阮細漢查某kiáⁿ寫hō͘我的card,寫講：多謝爸爸hō͘我『無條件的愛』。

我想主耶穌講的To give的含意嘛有『無條件的愛』以及『無條件投降』的意思。

世間大部份人，一世人日日三思的就是take,一直想欲theh、theh、theh，永遠bē滿足。台灣話的『theh』及美國話的『take』欲仝欲仝，所以有人認為英語是對台灣話出來的。

但是咱台灣話有講：食人一斤，嘛tio̍h還人十六兩。食人半斤，嘛tio̍h還人幾兩？日本人若受著別人送的禮，明旦再toh想孔想縫欲送甚物去還人，叫做『回禮』（o-kaeshi)。今仔日無給人還，明旦再toh bōe記得，繼續受別人的禮，欠人的恩情愈濟。欠人的恩無還，就是罪過。

咱台灣人卡少用信用卡去借錢。真濟美國人用信用卡借錢，先買先好、先用先好，結果欠歸形軀債，tio̍h去走路。我一生干單有一擺為著欲省稅，提厝去抵押貸款。對貸款彼日開始，心情toh真bái，心肝頭逐日toh是想著欠人錢的代誌，重iⁿ–iⁿ。最後緊緊還hō͘清，卡規氣。

咱一世人嘛會使講攏是teh欠人的債，一世人攏是teh還債teh過日。佛家講前世相欠債，今世來作夫妻；前世相欠債，今世chiah來作咱的kiáⁿ；前世相欠債，今世chiah來作咱的朋友。

基督教卡少講『前世』，但是卡濟是teh講『今世』。基督教是講咱『今世』攏欠別人的債、欠上帝的債。你物件hō͘人，m̄是因為你卡gâu、卡慈悲、卡gâu作善事、卡有力、肩胛頭卡粗、手骨卡勇、卡大尾。是因為你欠人的債。

是因為你teh hō͘人的時，是teh還人的債、還上帝的債。一生攏teh還這個債。Teh還這個債的時，不但是表現你的愛心，嘛是teh減輕家己的負擔、減輕別人的負擔、減輕上帝的負擔。

逐禮拜咱來教會，攏teh暗唸主耶穌教咱的祈禱文。咱攏唸講：『主啊，赦免阮的辜負，親像阮嘛有赦免辜負阮的人』。『辜負』原來的意思就是『債』。咱欠上帝的債，嘛欠別人的債。欠別人的債另外一旁的意思，嘛是講咱m̄-thang增加別人的負擔的意思，減少欠人的債- – 咱清清氣氣來世間，清清氣氣轉–去。

老鳥仔欲搬厝，一定會將老巢，整理到清氣溜溜。你豈bãt看鳥仔的老鳥巢lah-sap-lī-lo無？咱欲轉去的時嘛tio̍h 按呢清氣溜溜。

森林內的萬獸之王的彼隻老獅王，平時吼一聲，全森林的動物，雞仔、鳥仔、兔仔、羊仔攏驚到phí-phí-chhoah,走到裂褲腳。但是老獅仔有一日發現伊已經年老的時，伊會家己一個人，放sak伊的歸群，揀另外彼條路，去到森林的無人去的所在，過伊最後的人生，無增加別人的負擔。

甚物時陣去khiā台仔頂、甚物時陣落台；甚物時陣來排擔仔，甚物時陣咱來收擔；甚物時陣咱tio̍h chhoā某kiáⁿ向前行，行佇生活的第一線頭前工作，認真拍拼、趁食飼家；甚物時陣咱tio̍h認份，家己一個過家己的日子，一直到講『Sa-yo- na- ra!』的彼日？這m̄是干單彼隻獅王的智慧，嘛是咱作一個基督徒的智慧。

保羅這位偉大的老師一生作人最大的一個原則就是咱今仔日的經節。伊講，伊一世人toh是『無欲欠人的債』。伊講恁每人無論作人的父母，作人的老師，作人的朋友，甚至作人的牧師，攏m̄-thang欠人的債。伊講：你看我這二雙手，佇外口做工，pêⁿ布帆，飼我家己這個腹肚，我無欠恁中間任何人一銑一分錢，這項代誌恁大家攏知影。我按呢做，是欲hō͘恁作模樣。作人的牧師本來就是應該按呢。

伊閣講：我來這世間是作一個戇人，我除了認真做工以外，toh是m̄敢增加恁的麻煩。我一世人絕對無拖累著恁。我taⁿ第三擺欲閣去恁hia，嘛無欲the̍h恁一銑錢。但是恁看我作戇人。我愈無給恁the̍h錢，恁看我愈憨。Che是世間第一位牧師、第一偉大的牧師苦勸咱的話。

1787年法國發生大革命，彼陣的口號叫做：『平等、自由、博愛』。這三句實在是符合tú-chiah保羅先生的教示：『信、望、愛』。

咱一世人teh追求『信』，相信甚物？就是相信有一日，世間會『人人平等』。今仔日想起來，世間有平等無？資本主義國家本來就是無平等。另外彼邊呢？1848年馬克思發表共產主義宣言，1991年經過84年的實驗，蘇聯倒台。今仔日剩中國、古巴、越南、北韓。中國社會佇地球頂，是世間第一無平等的所在，所有共產主義國家培養出來的攏是『紅色貴族』，佇中國散赤人及好額人的精差非常大。來美國用現金買厝的，大部份攏是共產黨的幹部。

有人講35歲以前你若m̄是社會主義者，你是無心肝；35歲以後你若猶是社會主義者，你是無頭殼。

這世間無平等是因為人性本性的惡質及自私：一切攏是為家己，一切攏bē信用別人。年紀愈大愈愛錢，年紀愈大愈bē信用別人，世間愈無人thang信靠，生活愈無幸福。

佳哉上帝猶有留hō͘咱世間人最後一個平等，叫做『死』的平等。彼日若到，人人平等。

第二項保羅講世間剩的是『望』，望甚物？是望得著解脫、得著『自由』。人間真正有自由無？有人出世就目睭無看、耳仔無聽、破相半遂(piàn-süi)，身軀無自由。有人出世就無父無母。平平是人，有人生來tō真無自由。

西伯利亞的丹頂鶴大部份攏是飛去日本北海道過冬。舊年有一隻丹頂鶴，72年以來第一隻，飛來到北部的新竹，佇空軍機場tú-beh歇落來。但是隨時一個老兵仔的士官長giâ槍toh kā伊拍落來。佳哉干單拍著翅果(si̍t-kó)，無死，但是已經bē飛啦。

頂個月去Canada坐佇車頂有一位台灣野鳥協會的朋友，伊招大家緊出錢kā這隻孤鳥醫傷。經過幾個月，本來想欲就地放生，但是驚伊飛bē遠，嘛驚伊閣去hông拍落來。最後大家決定出錢hō͘伊坐飛機轉去北海道伊的故鄉。

台灣豈m̄是丹頂鶴會tàng自由來往的in的土地？無，人類是伊的敵人。Salmon (三文魚）豈m̄是會tàng自由轉來Seattle in古早的故鄉？無，有真濟水壩檔咧。咱豈m̄是會tàng來去美國、加拿大，自由自在？無，tio̍h簽證。世間無影有彼款的自由。

基督教是teh強調自由的宗教，但是濟濟人利用基督教的名來限制人的自由、控制人的自由，將自由釘死佇hia。In講Iraq的女性包頭殼佇街仔路行路，是teh欺負女性。為著解放女性，in就派兵去拍人。無想到人in Iraqi的女性包頭毛佇街仔路行，是代表in的美麗、in的驕傲及in的滿足。美國人所想的自由及in所想的自由無同款。

近年日本因為交通事故過身的人，一年有一萬幾個，但是看人生絕望家己去自殺的，一年有三萬外個。

自由是掛佇天邊的大餅，雖然是咱共同的夢，但是世間濟濟無自由：身體的健康無自由、經濟的困難無自由、愛情去hō͘人棄拺的無自由。自由是看會著摸bē著的夢。世間無真正的自由。

佳哉上帝留hō͘世間人有一個最後機會來得著自由，就是等到咱人生的終點ê時。『死』就是人生最後的解放。死以前，無自由。

除了頂面所講的無可能的平等，無可能的理性的平等，及無可能的自由，無可能的自由的夢，這世間猶有剩甚物thang好期待呢？

世間除了無平等、無自由，除了無奈的信心及無奈的希望，除了無法度解放的無平等及無自由以外，猶有剩甚物物件hō͘人猶會tàng活落去？

使徒保羅講：咱佇這世間猶有剩一項、最後的一項、最大的一項，『愛』。因為人猶會tàng發現上帝是愛，人及人的中間猶閣會tàng互相追求愛，互相接收愛，hō͘這世間猶閣值得活落去。

Peter kap Linda去西伯利亞的Baikal湖（世界上深的湖）thit-thô，人thài羊仔hō͘ in食。羊仔牽來，叫伊khiā leh，刀對頷頸(ām-kún) kā伊liô落去，chiah用手伸入去伊的心臟，給心臟tēⁿ hō͘停。戇羊仔倒落去，tiām-tiām無講話。

咱的上帝就是『愛』、犧牲的愛，親像一隻羊仔，去hō͘人按呢牽去山頂。上帝的愛是無講話、無出聲的give up。基督教teh講人生、teh講上帝，通常攏是按呢：去hō͘人欺負、侮辱、烏告、背叛、出賣，一直到死，tiām-tiām無出聲。上帝用無出聲來表現伊的最深沈的愛。

我作牧師去老人院探訪老人已經bē數擺啦。我一下入門，看伊一個人坐佇輪椅，oa̍h佇窗仔門邊看外口，m̄知teh看甚物，m̄知伊leh想甚物。

一世人儉腸ne̍h肚、食頭路、顧家、有時失業去尋頭路、hō͘人踢去門外，有時hō͘人巫告、暗傷。人生hiah呢濟的計畫、hiah呢濟的理想及眠夢。

漸漸事業已經成形，有婚姻、家庭、囝仔、孫仔。一世人攏為著顧某kiáⁿ，好食物攏留hō͘ in食，好物攏干單提轉來hō͘ in用。Chím-má想起來嘛感覺我是一位真自私的人。魔鬼嘛是顧in家己的人。

Chím-má破病年老，gín-á kā我送來chia。過去以來一切的一切，真súi的夢，所有的財產、名聲、地位。流汗及目屎累積起來的基礎，chím-má親像土角厝的四面壁去hō͘大水淹著，一塊一塊pi̍t開、一塊一塊beh pang落來啦。

老人m̄甘我去給訪問。若是去，伊toh一直講：『牧師，你真無閒，kâ看一下就好，你緊轉去做你的代誌！』

我攏講：『我真有閑啦，呣免煩惱啦！』

我用手kā伊牽leh，為伊祈禱：天父上帝啊，請你用憐憫的手，保護照顧伊。願你的慈悲及疼痛，顯明你的疼佇伊的身上，hō͘伊佇肉體的艱苦中，得著解放。

牧師這種頭路，就是佇人生的不歸路中，永遠ti hia給人講這句共款的安慰的話。

祈禱了後，逐擺我攏看著老人的目箍紅紅。目睭尾留一滴目屎ti hia。

老人干單一直tòm頭。我只有tiām-tiām坐佇伊的身邊。

親像我入來伊的房間的時共款，四面攏tiām-tiām無聲。老人院亦好，老人的厝亦好，攏真安靜。

我給伊講，我會閣來看你。給伊講，外口日頭真光，花園仔的花嘛開到真súi，你tio̍h出去行行leh。我知老人已經行bē tín-tāng。

有一日你及我會共款，醒起來soah爬bē起來，soah bē行路，親像老人按呢。

我離開老人tòa的所在，外口的風真涼，hō͘我頭殼小可醒起來，知影頭前猶有真濟代誌愛做。

越頭看著老人tòa的彼間窗仔門，知影伊已經給輪椅靠來靠佇窗仔門邊，手猶一直kā我iat，目睭kā我金金看。

忽然間一陣茫茫仔雨吹來，遠遠有看著七彩的虹掛佇山頭。

我想著tòa佇美國的老人，實在偉大。Chiah-ê老人看著若準是去hō͘外口的世界放栜去。M̄是，in知影這個時陣就是上帝叫in一個人忍受孤單的時陣。In知影kiáⁿ兒孫，in逐個人攏leh āiⁿ in家己的十字架，leh拍拼，leh行in家己的路，完成in家己的人生。

老人的人生，及咱的上帝共款，tio̍h行這條寂寞的路程，一生無欲增加別人的負擔。寂寞的人生不但是作上帝的命運，嘛是咱作人的命運；咱tio̍h靜靜仔來，歡歡喜喜用笑面看世間，閣靜靜仔去，用笑面來離開。

祈禱：

主啊，阮佇這世間無真正的平等，嘛無真正的自由。阮的一生就是親像保羅講的，是一聲深深的吐氣。

阮無論老幼、男女、基督徒或m̄是基督徒，人人攏āiⁿ著逐人的人生的十字架，這個十字架真重。請你來幫贊，減輕阮的艱苦，因為你有講：見若勞苦擔重擔的人，tio̍h來你chia，你beh hō͘阮得著安息。

請你赦免阮逐人欠缺你的債，亦hō͘阮會曉時常赦免、減輕別人的債及別人的人生的負擔，hō͘阮會當清清白白來，嘛會tàng清清白白轉去。

靠救主耶穌的聖名懇求。阿們。