拍X的二分法

陳柏壽

我有一擺去講道，題目是「人活毋是干單靠餅活」。彼日我無食早頓，抑無食中晝頓，你豈知我oān-nā講道，肚腹oān-nā iau到頭殼起戇，二枝腳phih-phih-chun。

講道了真濟人走來給我講我講了真好，真感動人。我毋敢給講我iau到二支腳phih-phih-chun。

真久以來我攏一直堅持精神就是一切。但是愈來愈感覺主耶穌福音的內涵有真深的涵界。福音包含人生的全部：不但講精神，嘛講人身的全體。

聖誕節對我來講最大的意義，在佇上帝道成肉體，降生來世間，及人間合一。上帝互咱知伊無愛咱將天頂的上帝及地上的人間分做二邊。

人世間真愛分邊，分高分低，分你分我，主內及主外，會內及會外，選民及外邦人，黨內及黨外，讀冊人對做工人，台北人對下港人，高級外省人對下級的台灣人；精神對肉體，智識階級對肉體勞動階級；及以今仔日咱讀的聖經哥林多前書12章所講的，頭殼對腳。我認為這款二分法的想法，是人的人格及靈魂腐敗的開始，也是社會混亂的原因。

人類對創世開始的記載就有二分。上帝的名，佇創世記第一章內面上帝叫做Elohim，第二章的上帝叫做Yahweh。創世記中有真濟版本，上帝的名嘛有Adonai，嘛有El Saddai，嘛有Elyon。聖經有真濟所在是綜合各地文化、語言以及宗教的產物。今仔日的世間，上帝嘛有天公上帝、kamisama、Allah以及種種地方的文化及宗教的名稱，遮的攏是teh講上帝。

創世記第一章內面上帝給人講世間所有菜蔬、果子攏通挽去，無規定啥物樹仔啥物果子袂使摸袂使食；第二章toh限定生命樹分別善惡的果子袂使食，你若食一定會死，無仝款的版本。

第一章認為上帝是對「水中」造世間生物；第二章認為上帝是佇「土頂」創造所有世間的生物。

第一章上帝講人著生湠濟濟，管理全地，做主人；第二的上帝講，你事事著聽我的話，做一個順服的僕人。

第一章是寫上帝先造世間的野獸精牲，才造人；第二章是寫講上帝先創造人，才創造野獸精牲。

第一章寫上帝用伊家己的形像造人，上帝做出來的人有上帝的本性的一部分，這個所在可以講是人性本善的代表；第二章是寫上帝是用土粉造人，這章可以講人本來就是土粉，是會腐敗會做歹的本性。

第一章上帝當時造男閣造女，一擺就創造完成；第二章寫講上帝先造男，後來才用男的一支排仔骨，giú起來做查某人。查埔較大抑是查某較大？查埔khiā較頭前，抑是查某khiā頭前？愛講查埔人較大的人，攏用第二章。

西洋文化留互咱真濟好的遺產，但是嘛有負面的所在：就是二分法的思考方式。西洋文化繼承希獵羅馬的哲學。希獵羅馬哲學的主體起源佇三位大師：Socrates, Plato 及Aristotle。因就是西洋二分法的先祖。

Socrates對女性的態度猶真合理。聽講伊真疼某，嘛真驚某。伊一日到暗攏坐佇廟埕，teh及人講哲學，開嘴合嘴就是哲學、哲學，無欲出去趁錢。因某愈看愈gêng，toh給伊罵閣lé,罵真大聲。毋但按呢，伊忽然間用一面桶的冷水，向著Socrates的頭殼，toh給phoà落去。Socrates歸身軀澹（tâm）糊糊。

學生大家嘛攏chū-án-ni愣（gāng）落去。毋知老師閣落去欲按怎發生氣。但是kan-á看老師面色攏無變。一分鐘了，聽著老師靜靜仔講：「一般若雷公sit-nà以後，攏會落一陣西北雨！」「這桶水互我變做一個正港的哲學家啦！」Socrates講：「人若去娶著歹某，一定會變做哲學家。」

Socrates講任何代誌攏著問，chím-má的人叫Q&A，彼陣伊叫做quest。有問，才會bat家己。世間的道理毋是佇台仔頂一直家己講，人佇台仔腳，戇戇啊聽。我上驚的代誌就是人聽我的講道，頭殼一直tìm，講真好真好。我想是真bái真bái，因為我根本袂進步。咱teh思想的時，一定著想及別人無共款的思想，才是真正的思想。

伊講真正知影啥物是智慧，就是「知影你逐項攏m̄-bat的時，才是真正的智慧」。

哲學是teh chhoē哲學的時的「過程」。哲學毋是欲chhoē答案的過程。世間的真理就是teh討論的時才會看著，但是看著的真理，干單看著一半。另外彼半咱家己毋知影。咱的生命就是在佇繼續chhoē另外彼邊的真理。若是無愛去chhoē另外彼邊的真理，想講我所bat的就是完全的真理，彼款人佇這世間是白活的啦，無路用啦。這叫做dialectics辯證法。

Socrates一世人無寫半本冊，伊的理論攏是伊的學生筆記抄落來的。Socrates互人掠去，受命令著lim毒藥死刑。人問伊欲死以前的感覺。伊講：「我只有祈禱上帝，互我存一個真媠的心！」

Socrates有二個使徒：一個是Plato, 另外彼個叫Aristotle。這二人的哲學行二條路。抵好親像創世記第一章及第二章的分別。看代誌，拆做二邊看，逐項事攏拆做二邊 ：二分法。

Plato減Socrates 40歲。伊會使講是注重創世記第一章的代表：人是上帝的一部分，人的一切就是精神，人代表上帝的尊嚴、價值及存在。伊主張人需要教育，教育互歹人變好人；人需要管政治，人若無插政治，人toh會去互比你較bái的人來管。

彼日去參加一個party，隔壁坐一對台語教會的會友。第一擺見面，知影我就是陳牧師，第一句話就講：當初恁為著政治，恁對阮教會分去Keystone，後來恁閣去設信義會，chím-má恁閣分去New Port。伊講這攏是政治的關係。伊講阮教會攏無講政治。台灣問題的政治，佇教會內，絕對袂使講。這是一位初見面的人對我講的第一句話。原來我才知因老爸是國民黨時代，受任派做台灣省議會議長，這位女性是馬英九總統府的大官。

其實咱佇遮teh講台灣話，對中國人統治者來講，就是一種政治。彼日郭教授傳互咱，呼籲咱來聯署，將咱的國家的名改做「台灣」，這嘛是政治。這是咱生活的一部分，是上帝賞賜咱的基本人權。

Plato一切攏用精神做中心，及後來的Hegel仝款，一切攏講是唯心論，一切攏用創世記第一章做中心。保羅常常會講心靈是一切，肉體是無路用的，但是伊有時嘛會翻來覆去，講二邊的話。Gâu翻來覆去就是保羅神學的特色。

Plato講精神，譬喻講「愛」。伊認為愛是單方向的，愛無一定著雙向。親像上帝teh疼世間人，世間人無一定會疼上帝仝款。這種單向的疼，就是絕對的愛。這點對我來講有一個真悽慘的經驗：少年時陣bat jio̍k過2、3個查某giⁿ a，人攏無欲chhap我，看toh無欲看我，互我真正想欲去自絕。佳哉無去。

照Plato的理論，我這種單相思嘛是一種的愛，雖然人無欲chhap你，嘛是有存在的愛，叫做Platonic Love。伊講真偉大的愛，不但是肉體，閣較大的是精神，叫做Romantic love。上帝愛世間人是一種Romantic love。所以Plato是理想主義的大師。

西洋文化的第二的潮流，就是創世記第二章所產生，抑是Plato的學生Aristotle的理論，叫做「唯物論」。後來的Karl Marx嘛是講唯物論。保羅、雅各、彼得有時嘛會講唯物論。

Aristotle減Plato 26歲，伊是Macedonia的人，後來對Macadonia興起的Alexander大帝，就是受Aristotle影響真大。Aristotle認為人毋是精神的產物，人是土粉，人的肉體是物質。伊走來雅典的Academia讀冊，是Plato最好的學生，但是專門講Plato的歹話。伊看代誌看人攏是用生物學、科學、實驗的觀點來看。

Aristotle認為女人應該是被統治者，因為創世記第二章明明寫講，上帝趁查埔人teh睏的時，對伊的排仔骨提一支來製造查某人。所以Aristotle講查某人較無理性，重感情，無欲講道理。但是伊講查埔人佇因某面前，最好嘛是mài講話、mài做代誌，食互槌槌，kek互戇戇，採取中間路線，人煮啥物互你食，你就提去食，mài加講話。

有的教會牧師，無管教會經濟，無管教會的死活，伊干單關心伊領的薪水偌濟就好。這叫做遵行Aristotle的「中庸之道」，執行Aristotle的倫理學的要點。

西洋文明留互咱真濟好的資產，但是今仔日用信仰的觀點來看，及咱台灣人的人生觀，有出入的所在，就是因的二分法，因用二蕊目睭teh看代誌。

咱來耶穌基督的教會的人，就是欲要求訓練咱家己做一個完全的人，毋是toè tio̍h外口世界的風俗及規矩，來分咱及別人。

上帝佇這個聖誕節給咱講：上帝對天降世做人，咱毋免閣踮遐枵飽吵（iau-pá-chhá）啦！Soah-soah-去啦！來世間極加幾十年toh欲轉去啦，mài閣亂啦！mài閣分啦！連上帝家己toh無分上帝及世間人，咱做一個微細脆弱的人，有啥物通閣分咧？

我chím-má才知影，咱欲做一粒細粒石頭，真無簡單，有時比大粒石頭閣較重要。無細粒石頭kheⁿ牢牢，較高較大粒的石頭壁，嘛真緊會崩落去。咱毋免想欲做大。

保羅的福音是講：腳及頭殼平重要，頭殼袂使kā腳講，我比你較重要，無你boâ kin。顛倒保羅按呢講：人看愈無目，愈歹款，愈下賤的，咱著愈照顧，給伊裝飾較好勢，包好勢，互伊看愈文雅、愈重要才著。

主耶穌講，所有世間人所想的攏著顛倒反想：咱愛做頭的，著徛去後壁。咱愛做人的領袖，著去做眾人的僕人。