暗光鳥

陳柏壽牧師

11/02/2023

暗光鳥（àm-kong-chiáu），中文叫夜鷹或貓頭鷹，面二邊有尖尖的耳仔，中央是二蕊圓滾滾黑溜溜的目睭。阮老爸佇溪邊厝國民學校做老師的時，阮tòa佇日本宿舍，暗時若到，宿舍厝前的檨仔樹尾溜，就出現彼隻暗光鳥咧叫「ku—ku,ku—ku！.」伊用烏色的大蕊目睭咧kā我看，目神真清楚，一直欲共我講話。我佇眠夢中猶久會記佇伊清楚的叫聲。伊日時毋知篾去佗位，暗若到，伊就飛來佇彼叢檨仔樹支頂的所在唱歌。天愈黑，伊唱歌愈愈大聲，一直唱到我心靈薏（ì）仔內面。

後來阮老爸去互督學調來調去，我國民學校攏總讀四間，四年的時，老爸去互人調去大湖底國民學校，深山林內，閣無basu通坐，一家六个gín-á用行路，拖一台鐵馬，親像諾曼第登陸，到位才知無水道水，甚物攏無，逐項攏對頭開始。我心目中爸爸一世人毋捌甲人冤家，伊互督學袂較薏的時，互人調去無人欲去的所在，伊只有鼻仔摸咧。Tòe人的命令，親像一隻暗光鳥，恬恬啊篾入去樹影內面，毋敢反抗。

我想人若會當佇暗中看著路毋知欲gòa好咧。佇Hawaii牧會tòa Oahu島，島中央有一條貫串南北的路，規條路攏是密林，khám佇路面，連白日時駛車過有時心內嘛會澹澹，目睭無khoàiⁿ路。咱若有暗光鳥的目睭tō͘毋免驚，毋免開大燈。

Hawaii本來就有暗光鳥，但是去互蛇食了了。後來市政府chhiàⁿ真濟人專門掠蛇，掠到現在Hawaii全島已經攏無蛇，暗光鳥才漸漸轉來，逐日佇阮厝後壁彼叢檨仔樹頂teh叫，聲音親像“phu—ku, phu—ku..”實在真互我懷念。

搬來西雅圖以後，嘛定定聽著遮的暗光鳥的叫聲，但是伊叫的聲親像是“fruee—fruee. .”，若準是咧喝“freedom…freedom”，親像美國西北部的人，是咧追求自由的一群真開明的人。

「守更」佇咱每日做息是真重要的一項工作，詩篇130：6就是講守更人的任務就是欲chhōa咱等候到天光的時。咱佇庄腳艱苦過日，為著保護家己的身家生命，暗時攏著守更。我看暗光鳥就是擔當這個使命。人人日時做工，暗時著歇息,只有靠守更的人來顧暗，暗光鳥那親像來世間來負責這款工作，佇烏暗中伊目睭金金看，開開開，開真大粒，看顧厝前厝後，大大細細，袂使互外口人親裁入來。咱用這個觀點來看暗光鳥，就知影去感謝伊。

最近台灣有一個真有名的立法委員，十幾年前去互共產黨設計，佇上海牽著一個風塵女子。因為共產黨看伊chím-á已經無利用價值，就將伊的風流代誌公開，結果伊的名聲掃地。人生有時會拄著這款烏暗地，若無有暗光鳥的目睭，看家己的人生看無明，就非常悽慘。

黃昭堂，是我心目中一隻標準的暗光鳥。佇日本讀冊了後就就任台獨聯盟主席，後來聯盟遷台，伊嘛一直是聯盟主席。平時伊無三講話，但是講起話就是真有力真警世的話，伊的人生親象一葩溫溫仔火，但是伊的火一直咧，繼續，一直袂化。伊繼續咧引咱台灣人往獨立建國的大路前進。伊有寫一本冊若準是叫「台灣那思那斯文」（Taiwan Nationalism)，伊是一位理想主義真強的人，伊出聲的時，親像一隻暗光鳥。

我想最寶貴的人就是佇烏暗中會當看著頭前的路的人，無論甚物困苦烏暗的日子。猶原真勇敢進前的人。