講題：Gondora 的人生

8/2/15 Burnaby

禮拜祈禱

黃武東牧師少年的時，任何時陣，若聽著人講著「蔣總統」這三字，著隨時立正。後來伊才知「總統」的意思就是：一把米掖落去，hit隻雞角仔給雞母雞囝逐逐出去，干焦伊一個人總thóng。所以中華民國就是幾十年幾仔代攏無變。

最近嘛有一個台灣的總統。但是伊毋是總統，伊攏無thóng。90 幾歲猶拖一個老命去日本國會演講。演講彼早起安部總理大臣先去hotel見李總統講一點半鐘的話。這是日本國會史有遮300幾位國會議員聽一個退休的外國總統的演講。

台灣的電視台無一間放送這個演講。台灣的中國人聽著「日本」二字著khimobai，尤其閣較無愛聽著日本話。

我佇internet看李總統45分鐘的演講，對頭到尾，全會場靜靜靜，差不多連喘氣的聲著有聽-ìⁿ。這表示日本人認真的態度。若是台灣有名人的演講，每一分鐘toh 拍撲仔（phah-pho̍k-á），講的人猶未開嘴，人已經準備欲拍撲仔啦，規個會場攏像菜市仔。

李總統親像一位老武士。武士面對敵人欲決鬥的時，一定用平常心，一定會贏；若是緊張，血壓升高，一定會輸。宮本武藏每擺決鬥攏袂輸，祕訣在佇遮。李總統心神自在來演講。

咱teh開會做禮拜嘛著用這款心情，代先將咱的心肝定落來，將咱的思想、感情、意志，先沉底，頭殼毋免閣想代誌，趁錢的代誌khǹg tiàm一邊，翁仔某的代誌khǹg tiàm邊仔，囝兒朋友弟兄，親成50，朋友70 攏khǹg tiàm邊仔。將你心內所有的重擔，交代上帝，用按呢來開始。

————

主啊願你àⁿ耳孔聽阮的祈禱。阮有身軀病痛、心神欠安的所在，請你毋通pàng-sat阮，請你毋通離開阮，只有上帝你是阮佇這世間最後的倚靠，你是主宰阮生命的源頭。主啊，阮佇這世間，無論用頭殼想，用腳行路，用全身軀做人，一切的一切，攏是對你hia來。阮每一日攏著感謝，因為你是阮的上帝，阮的生命。願你聽阮祈禱的聲。按呢kā你懇求祈禱，是奉靠救主耶穌基督的聖名。阿們。

最近有真濟人煩惱美國加拿大的基督徒一直減少。我想咱是家己揣煩惱。咱的上帝毋免咱為伊煩惱。教會人數減少，毋是表示基督徒減少。

我差不多每禮拜攏佇美國教會禮拜，感覺因對上帝的敬畏及虔誠，袂輸任何國家的人。及咱台灣教會有一點無仝，就是美國人親像放出籠仔的鳥，因的信仰及思考的基礎是自由；但是咱台灣人，來到北美，雖然嘛是放出籠仔的鳥仔，但是你叫伊飛出籠仔，閣毋敢飛，看著外口的「自由」會驚，最好oan-ná顧佇籠仔內卡安全。放驚飛，捏（tēⁿ）驚死的台灣人的信仰。

做30幾年的牧師，chím-má想起來，感覺真見笑。提出2/30年前的講道文，看著真著驚，我太遐爾敢講話，會友太遐爾會當容忍我這款講道。愈無內容，愈無準備的講道，講愈久，講愈大聲。「起嘴（khí-chhùi）的愛pûn吹，隱痀（ún-ku）的愛跳舞」。不管時，kap-boe-tioh，to-si欲「教訓人」，「教訓人」及「給人講道理」，變做我的天職，因為我想我是teh講上帝的話。三句二句toh chhap一句：「這真重要！」，三句二句著講這是「絕對」，我的論點是「絕對著」。

及恁列位兄姊仝款，愈經過人生的風湧，愈毋敢講叼位（tó-ūi）是重要，叼位是絕對。因為叼位是重要，叼位是絕對，在佇聽的人家己做決定，家己的裁決，毋是講的人應該講的話。

世間有遮爾濟十字軍的牧師，佇講台頂濫用因的權威，破害人本性的良知良能，干焦會當kā鳥籠內的鳥仔講道。莫怪濟濟鳥仔攏飛出籠仔外。

我看咱台灣人的心靈卡活，對這款社會現象，較會了解。台灣人你若講二句，伊會bat十句。台灣人，尤其是佇海外的台灣人，真少是顧佇伊甸樂園（Ái-tiān lo̍k-hn̂g）門口，giâ火焰劍teh顧門的人，英文叫做“gate-keeper” Christians。kap-boe-tioh，動不動toh欲mēⁿ人，指責人。tiàⁿ愛講人的「靈性」無夠啦等等。我想世間人每一個人的「靈性」攏差不多啦！

這款人漸漸khah少啦。因為咱台灣人的心靈的本質真高。經過大山大海，千辛萬苦，來到加拿大的台灣人，品質一定無共款。

頂番我佇遮有講：人去互上帝趕出伊甸樂園以後，變做二款人：一款繼續佇伊甸園東邊，繼續佇hia顧門，親像鳥仔毋敢飛出去；

另外一種人敢飛出去，享受自由世界的空氣。嚐著（tam-tio̍h）自由空氣的滋味的人，真會曉尊重別人的自由，真毋敢講「這真重要，he真重要！」, 毋敢講「這是絕對，he是絕對！」因為過暝日，伊著khoài著及伊講的話，完全顛倒反的世界。我嘛真無愛回答人講：「請互我祈禱看māi！」，我看講這款話無啥老實。現代的基督徒的本質，就是用信心講誠實話，毋免hiah-nī龜毛。

來咱教會講道，第一印象是聖歌隊，女聲本來就真強，但是咱教會的男聲中氣真足，攏對丹田唱出來的。

頂個月及宮元兄、張牧師一家去Whistler坐gondora：這山poâⁿ過彼山，這條gongdora換過hit條，二支腳吊佇天頂，幌（hàiⁿ）ⁿⁿkōng幌，目睭看落去，下腳是深山溪崁，腳尾一直欲浮起來，心臟一直欲跳出來。

我想著古早一個電影叫做「I-ki-ru」，彼個老爸坐佇gongdora，中國話叫做tang chhio-chhian， 台灣人阮古早叫做hàiⁿ kong-chhiu，有人講是幌千秋，有人講是hàiⁿ chhiu-chhian。咱互中國人教到家己的話嘛袂曉講。總講一句，幼稚園內面攏有gongdora。

Gondora有二個意思：一種是義大利Venice佇港內用人咧撐（thèng）的船仔；另外就是咱Canada Whistler山頂的吊車。

二個老ang-kong-po-仔佇關西廣島庄腳做田。生二個查埔，一個佇戰爭的時互人召去南洋做兵，chhun一罐骨頭灰轉來，娶一個某，無生，chím-má去東京的品川的鐵枝路邊teh給人剃頭；另外一個查埔的，艱艱苦苦栽培伊大漢，作醫生，chím-má 佇東京開業。

二個老的攏毋捌去過東京，嘛想欲看孫仔。最後決定欲去東京thit-thô一擺。老歲仔毋甘坐快車，坐上慢的慢車，teng-khiau-khiau木材的椅仔，khok 8 點鐘才對大阪khok到東京，坐到giōng欲khiau-ku去。。

彼個做醫生的翁仔某講，因為患者真濟，真無閒，無法度給因招待。生的二個囝，看著阿公阿媽親像生份人。欲chhoē孫仔，孫仔走互你jiok，無欲chhap阿公阿媽。

因死去的大囝娶的某，彼個外口人的新婦，真有情，一直拜托二個老人去帶怹兜。厝真狹，6塊tha-tha-mi，新婦將伊的眠床，讓互老歲仔睏，伊家己佇門邊，genkang的頭前，舖一領毯仔，睏佇遐。

過暝日日頭真猛，二位老人毋知欲去佗位，坐佇曝衫的belanta頂面燒燙燙，看外口鐵筋khong-khu-li的東京，頭殼戇戇。噯喲oè，東京原來就是按呢！

最後因囝講咱來送oto-san及okaa-san坐火車去Atami （熱海）洗溫泉。he是富士山下面箱根（Hakone）靠海邊的所在。一下入hotel，人就是人，唱ka-ra-oke，歸群少年人咧啉酒，吵到giōng欲死去。

最後老爸共老母講咱來去看海。二個老歲仔坐佇海邊的堤岸邊。黃昏的海邊，海風咧吹，日頭tih-beh落山。老歲仔講伊頭殼teh gông，二個手牽手，toh轉來hotel。gondora hit條歌的melody，就出現。

過暝日較緊toh閣坐慢車轉來品川。老人想著庄腳的所在比toà佇東京較好，就講欲較緊轉去。閣坐8點鐘無冷氣的慢車，khok轉去家己種田的廣島故鄉。

轉去無二日就收著電報講老爸破病請轉來。出發前彼個做醫生的大囝toh講，咱著chah彼su烏衫的禮服轉去，意思就是講老人已經差不多啦。

導演kurozawa akira互我印象真深的所在，就是演老人的Takashi Shimura 佇日頭tih-beh落山的時，彼個年老的老爸，最後坐佇厝邊幼稚園的gongdora頂，hàiⁿ kông-chhiu，唱hit條gongdora no u-ta。

—–

（人生實在真短，古早初戀的愛情仔故事，giōng 欲boe-kit啦，紅色的胭脂，真緊會退色，少年時代的熱情，漸漸欲冷落去，我leh chhoē miⁿ-á-chài的年日，miⁿ-a-chai佇叼位？）

人生真正親像咧坐gondora，對這山開始吊到彼邊山，閣對彼邊山，經過山崁山坑，吊來到這邊山。對台灣彼個海角，吊過大海，吊來到加拿大。來到這個無嘴、無目睭、無腳、無耳孔，路頭生疏毋捌人的所在。咱坐這隻gondora吊車，閣落去，下choā欲吊去佗位？

Gondora tuh開始攏先向下面chhu落去，後來才慢慢仔giú高，giú到最後欲踫著石頭，才到山頂。真濟人的人生tuh開始攏無遐爾順利，後來漸漸停止失敗，反轉起來，才會當peh高。

向當時阮老爸做國民學校老師去互人吊去大湖底、樟湖、草嶺，後來閣互人吊去台北，6個囝toà佇民生路一間細細的違章建築，87水災一下到，古早的冊、相冊攏淹了了。後來搬去士林石牌仔，做老師45冬退休。6個囝攏大漢，大學畢業。chím-má想起來，這個上帝，7/80年來，嘛是toè佇阮這台gondora內底，毋捌離開阮。

40幾年前娶日本某，佇東京街路流浪，路頭生疏毋捌人，家己一個tiāⁿtiàⁿ佇東京的街路，oān-nā行，oān-nā流目屎。上帝嘛toà佇阮這台細細的gondora內面。後來囡仔漸漸大漢，上帝講阮著去NewYork讀神學院，就將阮這台gondora吊去美國，kan-na一siuⁿ鳥仔巢，hoa̍h講：「Let’s go!」 ，toh飛起來，飛來到美國。chím-má 4個囡仔嘛攏大漢，攏大學畢業。這台停佇西雅圖的gondora 豈通繼續閣行？

Gondora無欲停步，咱的人生嘛無法度停步。gondora不但無互你停步，你的路線嘛定好勢好勢，人生的路線，冥冥之中，上帝共咱set好啦。不但袂當換lane，嘛袂當換車，袂使講阮這台尚慢，欲跳去頭前hit台。

世間代誌真濟無法度照咱家己的pace，咱的calendar，咱的時間表，毋是上帝的，上帝無digital watch。馬大馬利亞的小弟仔拉撒路破病，因較緊叫人行一日的路去給耶穌講，聖經講：耶穌聽著消息, 閣佇遐toà二日才起身，閣行一日才到彼個散赤的伯大尼庄腳。我bat去hia, 除了規欉無花果及橄欖樹，chhun-ê就是石頭lok-khok，雞母袂生卵，只有風佇黃土的沙漠頂面teh吹的聲音。

一下到位馬大就給主耶穌講：主啊！毋免閣去看伊啦！已經4 日啦，身體已經臭啦！馬利亞仆佇主的腳前講：主啊！你若早一日到m̄-to̍h欲goā-好咧！

這真正是人間的悲劇。上帝啊！你的腳步按怎遐爾慢呢？這四日你是按怎hiah-nī無要無緊，你是按怎放阮佇遮khok khok等呢？

咱毋知這四日上帝是按怎過，可能上帝用四日的時間，佇地獄為著拉撒路及魔鬼車拼嘛無一定！

總講一句，上帝容允這個悲劇繼續進行。

人間的悲劇，才是上帝的開始。上帝來到墓口，喝聲講：「拉撒路出來！」

上帝有伊的計畫，有上帝的時間表。咱台灣的民主獨立，我看嘛是teh照上帝的時間表。及咱坐gondora仝款，咱著安心等，m̄-bián jump！

Gondora若是拄著烏雲大雨，抑是thàu大風，伊toh停起來，無欲駛。咱的人生，上帝若是看著大風大雨，看著頭前有陷坑，上帝會共咱的gondora停起來，叫咱毋通閣駛。

有的gondora有厝頂，蓋雨蓋日頭；但是有的干焦有4枝鐵架仔，互你歸身軀露現現。有時上帝互咱的人生是坐彼種無蓋koà的gondora，風吹落雨咱攏著接受，無互咱家己選擇。無air-condition，無論外口是寒是熱，咱攏著接受，咱著及上帝互咱的大自然共生。

Gondora互人知咱著生活佇現實生活的內面，毋通tiàⁿ生活佇冷氣及燒氣及sunroom內面。咱佇思想及教科書內所學的物件，無論對學校或是教會學來的物件，若是及咱現實生活及咱家己的人生經驗無仝款的時陣，你著將chia-ê思想及教條摒落去糞埽籠。

但是gondora會共咱送到人生的山頂。去到山頂看落來，心涼嗶吐開。人生著對高的所在看落來，看卡會明。一日到暗攏佇樹仔腳chǹg，chǹg佇趁錢的世界內面，真o̍h出頭天。

Peh到山頂，風景相媠的境界，就是咱人生的最後。坐gondora就是欲共咱giú到山頂。佇彼所在，天父上帝teh等咱。

林冠華同學知影天父上帝佇hia teh等伊，伊已經到佇山頂，對山頂看到整個台灣故鄉，看到真明，所以伊及鄭南榕、詹益華仝款，先達到最高的山頂，到佇上帝的所在。

阮teh駛來的路邊，有一種樹仔，葉仔的後壁pêng是銀色的，風若炊，規欉樹仔攏現出銀色，逐葉攏親像銀湯匙仔，所以人叫伊silver spo͘n。

我真愛看silver spo͘n。咱若愈老，年紀愈大，無論風按怎大、風按怎chháiⁿ，葉仔愈欲現出銀色的湯匙仔互人看，金爍爍。無欲認輸。

聖經講：你出世的時我就抱你、偝你、牽你、mó͘你佇我的胸前；一直到你年老，到今仔日，我猶是安妮；你一直到頭毛白siak-siak，我猶久phō͘你佇我的胸前。我欲造你、抱你、拯救你。這就是咱的上帝。

恁豈毋知二隻粟鳥仔只有賣一sián 錢，但是若毋是上帝答應，一隻toh袂la̍k落來土腳。（馬太10：29）。咱的生命豈無比一隻厝鳥仔卡貴重？

聖經講咱的生命真正是咱的目睭看無，咱的耳孔聽無，咱的心肝嘛想無的物件。世間只有一項，會當知影咱的生命，就是上帝的靈，叫做聖靈。上帝的聖靈看透世間萬事，上帝的聖神，互咱bat咱家己，咱會當bat咱家己，比別人bat咱卡深，咱若是破病，去看醫生是互咱參考nā-tiāⁿ，咱bat家己的身軀，比醫生bat咱的身軀卡清楚，卡實在。咱著活佇上帝的聖神內面，來bat咱家己，亦來bat咱的上帝，因為上帝是活佇咱的心內。

雖然咱kan-na會當bi̍h佇gondora內底，一路一直咧唱i-no-chi mi-chi-ka-shi，嘛是講咱活佇Whistler的gondora內面，嘛bē-bái！因為上帝一世人佇gondora內面，chhoā咱行世間的路。

祈禱：慈悲的上帝耶穌基督，你互阮的人生親像坐佇gongdora的內面，haiⁿ-kong-haiⁿ haiⁿ-kong-haiⁿ，天父上帝你欲給阮hàiⁿ去佗位？阮是m̄是著放伊kà阮 giú 到山頂，閣放阮落崎。無論甚麼情景，上帝啊，懇求你互阮安心。因為倚靠你，佇你內面，阮有平安。阿們。