前南社社長鄭正煜不敵病魔辭世，享壽68歲。（翻攝自法輪大法亞太訊息中心）

鄭正煜老師(1947-2014)，tī 2014 年國際人權日 ê 暗暝，離開伊 ê 至親、朋友、同志轉去西方樂園，hō͘咱無限 ê m̄甘、艱苦、佮數念。

佮鄭老師熟似，是 1996 年。彼陣伊做陳光復立委 ê 助理。有一擺鄭老師招我去第 4 台(彼陣猶是地下電視台)討論台灣母語 ê 代誌，印象–裡，曾貴海醫師 mā 有在場。過無偌久，我 koh 去高雄市興中路建國黨辦公室開台語羅馬字 ê課，鄭老師是辦公室主任，曾貴海醫師是南部負責人。就按呢，我開始認 bat 鄭老師。伊是退休老師(彼陣 mā 才 50 thóng 歲)，對台灣教育真有意見：是啥代台灣囡仔讀 ê 冊攏無台灣教材？後–來我才知，鄭老師已經 teh 處理台灣學基礎–「認識台灣」lah！對按呢開始，我對關心台灣語文 ê 議題放大到台灣教育。阮開始 tī 報紙雜誌、lajio͘h(廣播電台)佮電視台、街頭巷尾、立法院、教育部、真濟無仝 ê 場合寫文章、攑旗仔、giú 布條，抗議、喝口號，就是 beh 爭取「母語教育」、「教育台灣化」等「台灣學教育」。

1997 年，香港回歸中國，台灣回歸台灣。彼年，「認識台灣」地理、歷史、社會正式進入國中課程。這 ê 工程是足濟人做伙拍拚 ê 成果，暗中策畫 ê 靈魂人物就是鄭老師！

2000 年，陳水扁當選總統，真濟朋友大歡喜，慶祝咱「出頭天」! 南部 ê同志朋友感覺新政府 mā 是需要繼續支持佮監督。M̄才決定做伙組「台灣南社」。這中間鄭老師當然是靈魂人物。伊做 2 任執行長，後–來 koh 做 2 任社長。M̄-kú第二任做無了，因為身體袂勘–得。會使按呢講：南社若無鄭老師，所做 ê 事工會減 80%！

鄭老師大約 tī 1980 年代就發現肝硬化(m̄是 lim 酒引起–ê)，到 2001 年 hia發現肝癌，chhim(剛)開始無採用現代醫學治療，伊佮意另類療法：練氣功、食漢藥等。後–來，發現肝癌一粒一粒一直 puh–出來，才去揣高雄榮總處理。南社ê 醫生朋友佮榮總醫生 mā 有勸鄭老師換肝(肝臟移殖)，M̄-kú 鄭老師無接受。寶貴 ê 時間就佮性命按呢一點一滴 ta̍ uh-ta̍ uh-á (慢慢地)流對宇宙去！雖然身體愈來愈衰lám(衰弱)，鄭老師mā是繼續拍拚做教育台灣化ê事工。

2008 年馬政府上台了後，對本土教育愈來愈無重視，母語教育 ê 經費一直 teh 減少，對一年 5 千外萬一直減到 chhun (剩)2 千萬。鄭老師認為無抗爭 bē 用–得。經過策畫佮協調，一大陣人 tī 2013 年 1 月 11 日去教育部揣部長 hoe(抗議)， 差不多台灣本土語文學術界、運動界 ê 人攏總來 ah！kan-taⁿ(光是)立委就有 40 外 ê簽名連署，koh 有國民黨–ê！教育部長蔣偉寧看著 chiah 濟人，大大 chhoah 一 tiô(嚇一大跳)，講這是伊做部長以來單一訴求上大 ê 場面！當面就答應咱 ê 訴求，kā母語教育經費回復到本底 ê 金額！了後，鄭老師 mā 是繼續 koh 要求本土語必修ê 政策 ài 延長到國中；到尾仔，蔣部長已經有 teh 考慮 beh 採用，吩咐幕僚「兩案併陳」。今年 7–月，部長因為論文問題落台，換這馬 ê 吳思華部長，鄭老師開始煩惱！阮私下 kún-sńg 笑(開玩笑)teh 講，「思華」對咱不利，若是「思台」就足好！ 8 月初 8，濟濟台灣本土社團做伙開記者會，強烈要求吳部長 ài 執行國中本土語必修政策。Koh 有，託管碧玲立委安排， 8 月 22 tī 管立委辦公室佮部長當面講白話，但是部長 ê 表現，hō͘ 阮足失望！

其實，彼 ê 時陣，鄭老師 ê 肝癌早就已經湠–開，對肝湠到肺部佮骨頭，chhām(連)頷頸 ê 龍骨第 3 第 4 節 mā 已經 chù-chhng(破洞)！照講無應該按呢 koh四界走 chông (到處奔波)！M̄-kú 鄭老師照常 beh 出門拍拚！ 伊講「戰士著 ài 死tī 戰場」! 咱攏知，頷頸是頭殼通身軀所有腦線(神經線)經過 ê 所在。這馬第 3第 4 節已經破 chhè (破碎)，若是 koh 有小可卡大 ê 動作來傷–著，比如雄雄斡頭、tǹg(頓)–著(像 hāⁿ大步落樓梯)、跋倒、甚至是大力 phah ka-chhiùⁿ(打噴嚏)、、，腦線 ê 傷害攏會閣較厲害，致使大腦 ê 信號袂當經過腦線傳落去身軀逐所在，人隨時有袂當喘氣、心臟袂跳、內臟機能完全停止 ê 可能，危險性免講大家 mā知！ M̄-kú 鄭老師堅持 beh 去台北。我無法度拒絕，8 月 22 彼日 beh 出門進前，我 kā 伊家屬講，「這擺出門會拄著啥物狀況，無人料想會 tio̍ h。若是恁同意鄭老師出門，恁 ài 授權 hō͘我，若有狀況，我有權利處理，不管結局按怎，恁 ài 信用我。」家屬同意了後，我佮鄭老師對 in 兜叫計程車去坐高鐵、到台北車頭落車、好禮仔行路過地下廣場出去坐計程車去管立委辦公、、、。這，對咱正常人是極其普通 ê 代誌，親像桌頂 ni 柑；但是對鄭老師是足困難、足危險，袂當有一屑仔走 chhoa̍ h ê 大工程！ 若有淡薄仔失覺察，可能 ê 後果是隨時一命烏呼哀哉！ 伊彼當時鄭老師就哪像是風颱暝中 ê 一 pha 蠟燭火，隨時會 hoa–去(熄滅)！我 ê 壓力？袂曉講 ê 大重。

就按呢，對早起 10 點外出門，一直到暗時 6 點外，鄭老師為著「國中本土語國中必修」，南北奔波 8 點外鐘！這中間，無啥物歇睏、頷頸 kho͘保護箍、忍耐骨頭疼痛、m̄成食(進食不多)、行路足細膩、講話 mā 袂當連紲 siuⁿ久、、、。好佳哉！託佛祖、天公伯、佮上帝 ê 保庇，平安轉來到厝！彼款心理負擔，語言袂曉講、文字袂曉寫！

11 月 29 九合一選舉，民進黨大贏；開票彼暝，鄭老師佮我通電話，伊足歡喜！電話中，一直 kā 我交代：請民進黨執政縣市召開「本土教育聯席會」，討論按怎進行包含母語教育、教育台灣化等「台灣學教育」ê 相關議題。2 年前鄭老師佮何信翰教授有得著蔡主席同意，這款會攏總共開 3 擺，m̄-kú 後–來 sòa 無 hoeh 無 bóe (無聲無息)。鄭老師 ê 解說是，當時咱才有 6 縣市 nā-tiāⁿ (而已)，力頭無夠飽；這馬有 13 縣市，ài 要求民進黨出食奶仔力來做！這項代誌，12 月 14 蔡英文、陳菊、潘孟安鬥陣來 kā 鄭老師拈香時，我有拜託鄭老師 ê 後生鄭原真代表報告，蔡主席 mā 當場答應。

其實對 7 月份起，kan-taⁿ (光是)癌痛就 hō͘鄭老師足痛苦！癌症造成 ê 疼痛，無拄–過 ê 人 bē 當理解 kap 感受。我看伊按呢痛，影響睏眠佮食慾，就紹介高醫疼痛科朱醫生醫治。朱醫生醫術高明，果然「藥到痛除」 ，鄭老師歡喜到袂曉講，特別敲電話 kā 我 chhiàng 講，「我 ê 痛減少 80 pha，koh 會當行路 60 公尺去菜市仔，”吃大餐”(華語)，足感謝！」我 mā 敲電話 kā 朱醫生說謝。但是，基本 ê 問題無解決，好光景無久，koh 來就真緊繼續惡化，到 8 月底對台北轉–來了後， 就無 koh 再出門！過往前 2 禮拜，會使講攏無啥 lim 食，人 mā 開始淡薄仔精神恍惚，講話有時 bē 對 tâng (不對題)。上尾仔彼禮拜，我kap韓明榮醫生大約1日去探望1、2擺，韓醫生kā吊大筒–ê(打點滴)，加減補充水分kap糖分。12月初8暗時，因為實在tī厝內照顧真正無方便，得著鄭老師同意(進前伊已經有決定無beh去tòa病院)，送入高雄市民生病院，當時伊意識已經m̄是清楚lah。隔轉日，陳菊市長去探望，菊姊phak tī鄭老師ê耳孔邊kā安慰，鄭老師目睭無thí開，m̄-kú 目屎對目尾sûi–落來。 12月初10國際人權日暗時6點40分，醫生宣布死亡！鄭老師信任ê佛祖選人權日來o-ló、肯定伊對台灣人母語人權ê拍拚！

因為過去教育 ê 關係，鄭老師一開始 mā 認定台語就是中國閩南語，台語文攏會當對中國古冊，包含康熙字典，揣著適當 ê 漢字來寫。但是聽我 khau 破分析了後，了解台語 koh 有原住民語、英語、日語、荷蘭語、西班牙語佮可能是百越語 ê 成分，真緊就修正想法，koh 會當接受羅馬字 lām 漢字 ê 方式寫台語文。2006 年教育部通過台羅方案，南社 tī 後壁有出力。講著教育部眼時前採用「閩南語」這 ê 名詞，伊按呢講：「咱暫時忍耐， 但是後擺咱一定 beh kā 改轉來台語！」

鄭老師做台灣學 ê 態度是「永遠無放棄」，信念是「教育是上軟性 koh 上強勢 ê 建國工程」。伊 ê 話母(口頭蟬)是「hit-lō koh」、「這馬情形是按呢」。鄭老師一生上要意 ê 代誌是：教育台灣化、反對選舉買票、反對媒體 hō͘少數人控制 kap 救陳水扁總統–南社認定馬總統對阿扁總統政治迫害！用按呢數念我敬愛 ê 建國前輩–鄭正煜老師。