藍色的天及白色的雲

－懐念陳崑南牧師

昨昏為崑南牧師做葬式轉來，心情真累志。一禮拜前看伊，佇門口伊的查某囝叫講陳牧師來看你，伊佇眠床頂toh講：「我知啦！聽著伊的聲toh知是伊啦！」我牽著伊的手祈禱，伊用二支手給我的手moh條條，毋放我去。伊可能知影這是最後一擺我及伊做伙祈禱。

Chím-má我確信知影，伊是佇上帝身邊，離開十幾年巴金森病的艱苦，離開牧會50冬的世間的風湧，離開彼個「海水嘩嘩哮抬湧」，離開彼個「山搖chhoah變遷地動」的世界（詩46）。chím-má伊帶佇遐，是帶佇「青翠的草埔及安靜的水邊」（詩23）。伊佇上帝的身邊，是一個安心及安息的世界。

雖然是按呢講，佇西雅圖十幾年中間，自從伊身軀開始衰弱，行動開始袂自由，講話開始不斷重複的時，我發現伊漸漸開始進入伊家己的世界。我知影伊的思考猶真清楚，但是伊無法度自由表達，我想這是伊最痛苦的所在。伊進入佇人群中間，但是閣無屬佇人群。人無認同伊的獨立思想及意見，一切心思念頭只有會當囥佇心內，相深的所在。這世間迫伊生活佇孤單無助的生命。

主耶穌初出傳道的時，伊給咱講：「伊欲互受掠的得著釋放，互青瞑的得著看見，互受壓制的得著自由」（路加4：19）。 但是遮的情況，無發生佇崑南牧師的身上。巴金森的惡魔繼續掠條伊，繼續壓制伊。壓制到遮爾久長。

路加5章寫著學生佇海邊掠漁，掠規暗掠無魚，耶穌上因的船，叫學生kô到水卡深的所在落網。水深所在表示光線卡無，目睭看袂清的所在。咱的人生常常著去彼個卡深的所在，彼個陰陰暗暗的所在。咱的人生毋是常常佇日頭腳。耶穌叫咱著去拋網去卡深的所在，佇遐才掠有魚，意思是講咱佇彼個閣深、閣陰暗、霧霧無明的所在，較會看著真正的人生。彼個所在就是咱靈魂欲去的祖家。佇hia有生命的本質。

耶穌閣活了後佇學生面前、佇日頭腳清天白日的中間，上天。學生頭殼抬高高，結果干單看著耶穌升去天頂，看著的只是藍色的天及白色的雲。佇彼個所在，及深深的大海仝款，甚物攏無khoàiⁿ，但是hia就是生命的本源。

咱的上帝安排互咱的生命及咱的靈魂，實在就是按呢，咱卡按怎看就是看攏無。上帝本來toh是無愛咱看著家己未來咱的生命及靈魂。佇彼個藍色的深海及藍天白雲的天空，甚物攏無khoàiⁿ的所在，實在就是咱信耶穌的人一定著相信的所在。「信就是所向望的事的實底，是看袂著的代誌的確據。」（希11：1）

黃昏的西雅圖天空，風微微仔吹，天頂淡淡的白雲咧飛往故鄉的台灣，故鄉的一山一水，東學寮的老教會，攏佇崑南牧師心中。故鄉的獨立出頭天的意念，攏時時留佇牧師的心懷中。伊佇天頂咧祈禱，咧祝福，咧看顧咱。

陳柏壽拜 / June 29, 2019