永遠的敵人亞瑪力人

– 陳柏壽 牧師 –

佇猶太人久長的歷史中間，因世世代代交代子孫的一點，就是：「亞瑪力人是咱永遠的敵人」，「今恁著去攻打亞瑪力人，滅盡因所有的，毋通憐惜因，著將因的男女、兒童、食奶的紅嬰仔、及因的牛羊駱駝及驢仔，一盡剿滅。」（撒母耳上15：3）上帝雖然命令著「一盡剿滅」，但是掃羅留一括牛羊私用，嘛是互先知裁判伊犯大罪。摩西佇利非訂及亞瑪力人相戰，戶耳及約書亞扶摩西兩支手，兩支手扶高的時，以色列人就贏，一直到日頭落山，約書亞用刀殺死亞瑪力王，耶和華給摩西講，伊欲將阿瑪力人的名號對天下全然擦銷，耶和華咒誓講伊欲世世代代及亞瑪力人爭戰（出埃及記17：8-16）。「在耶和華你的上帝賜你為業的土地，你著將亞瑪力人的名號，對天下抹銷。不可袂記這項代誌。」（申命記25：19）亞瑪力人及以色列人不共戴天，因認定亞瑪力人是永遠的「惡」。

欲講亞瑪力人的故事著對頭開始講。亞伯拉罕的囝以撒娶利百加做某，利百加生二個囝，一個叫以掃，另外一個叫雅各。亞瑪力就是以掃生的第13囝。以掃及雅各佇母胎內面猶未出世就冤家：以掃先出母胎，雅各毋甘願，手giú著阿兄的腳tòe出來。對遐開始，雅各一世人就是giú著因阿兄的腳，毋放伊煞。「二族欲對你同一個胎出, 但是二族分裂的。」（創25：23）二個兄弟互相車拼，但是閣分袂開。

以掃生做強壯，紅頭毛，愛拍獵，得著老爸的疼；但是雅各這個giú後腳的小弟，真gâu怨妒，時常bi̍h佇厝內，卡值老母的疼。

有一日以掃拍獵轉來，肚腹真枵，雅各就利用這個機會講，伊有煮一鼎紅斗仔湯。「以掃你若將大囝的名分賣互我，我這鼎紅斗仔湯就互你飲」。這個短氣衝動的以掃，中著這個計。結果老爸的財產2/3就歸雅各，真正的大囝以掃只分1/3。

雅各一世人真gâu計算，計算遺產、名分、權力、名聲。到今仔日伊的後代，嘛是仝款，佇世界政治舞台上，為著遮的目標綿爛跋反，永無放棄。另外彼個以掃的後代，到佇今仔日猶繼續生活佇袂曉計算將來的樂天。

決定性的所在，就是老爸以撒破病tih-beh過身的時，叫二個囝來欲給因祝福：雅各搶頭去老爸遐，假裝講伊就是大囝雅各，老母利百加配合演戲，去殺一隻羊羔，煮好，叫雅各捧去老爸以撒面前。以撒年老，目睭看無。聽著聲是細囝雅各的聲，但是摸伊的手閣有發毛，原來伊老母利百加用一塊羊皮給khàm佇雅各的手骨及頷仔頸。來到年老的老爸以撒面前，老爸目睭無看，問伊講：「你講話的聲是雅各，但是手閣sêng以掃？」。以撒因為分袂清楚，就給伊祝福。

雅各受以撒祝福了後，tuh 踏出門，以掃拄好對外口拍獵入門。伊緊去做一盤真正的野味，捧來老爸以撒面前。以撒問伊：「你是啥人？」伊講：「我就是你的大囝以掃！」以撒大驚，講「tuh-chiah煮一盤肉捧來予我食的是啥人？我已經食了，嘛給伊祝福了！」

以掃聽著放聲大哭，給老爸講：「你豈干單會當祝福一擺？老爸，請你嘛祝福我！」（創27：38）以撒講，伊干單會當按呢祝福伊：「你著倚靠刀劍過日，閣著事奉你的兄弟。到你強盛的時，你欲對你的頷頸掙脫伊的擔。」（27：40）

彼時開始以掃khioh恨雅各，準備有一日欲報復。二人相爭、冤家、分離，但是二人又閣時常相遇。這次相遇的時，雅各好聲好嘴給以掃講：「我看著你的面，親像看著上帝的面！」，閣講：「請接受我為你準備的禮物，上帝已經予我真有夠額啦，所以遮的攏欲送互你！」雅各想著伊佇伯特利佇夢中看著天梯，有上帝的天使上上下下來來去去，上帝閣及雅各sio-ián，上帝對雅各偷提長子名分的代誌，若準無欲放伊煞。上帝要求雅各，用一世人的時間及拖磨來還債。上帝要求還賬的時間有時拖真久，咱有時感覺一直到今仔日，伊猶咧還。這豈毋是上帝的一種逆理？人想未到的所在，上帝猶咧做工。這種若準是上帝的暴力及無理，結局是世間向善的一種希望。

咱讀著這段聖經感覺故事內面若準有贏及輸，若準有受揀選及受排斥的二邊。但是認真來想，兩邊攏無輸贏。算來算去，加加減減，因二邊財產及命運攏差不多。上帝佇二邊對立的時，伊對天頂teh chhiâu。咱認為著的，有可能是m̄著。咱想講是贏的時，有可能是輸。上帝家己咧chhiâu。

這二個giⁿa的老爸以撒嘛是有仝款的故事。以撒的老爸亞伯拉罕giâ起刀欲殺以撒獻祭互上帝的時（創22），伊的兄弟以實瑪利佇遐teh看。回教的可蘭經有記載真清楚，因的先祖以實瑪利受著上帝的賜福並無輸以撒，回教族群最後也形成世間大族。代誌發生的當中，初看若準是災難，若準上帝非常不公，但是咱對歷史來看：上帝並無偏心，上帝無徛單邊。

以撒二個囝  —  雅各及以掃 —  的冤家及鬥爭佔滿舊約聖經以及後來世界歷史的版面。這個故事主角之一 亞瑪力人就是希伯來的先祖之一。因的神明叫以色列人著完全剿滅亞瑪力人，完全擦消因的歷史，其實毋是擦消別人的歷史，是擦消因家己兄弟及先祖的歷史。因為每次發出「剿滅」的命令的時，雅各的兄弟以掃，攏徛佇門邊咧聽咧看。「亞瑪力」這個名，歷史上不但無消失，顛倒是一代一代予人傳落去。人所毋愛的，上帝留落來。鬥爭、祝福、破壞、剿滅、賠償，攏是一事二面。

聖經主宰人的社會真清楚，譬如講烏人佇美國久長的奴隸制度社會內面，「烏人甚物財產攏無，只有互因一本聖經，叫因去讀，互因知影烏人是白人的財產」，美國建國的先輩較濟攏是按呢想。按呢經過百外冬。世間真濟宗教思想，包括一部分舊約的思想，實在是分裂社會、政治及人心的起源。今仔日阿拉伯人及西方人的對立，就是活活顯現佇咱面前的事實。

咱信耶穌的人知影咱人活這世間，應應有敵人；有外在加互咱的社會、政治、人間世事的敵人。見若反對咱的可以講攏是一種咱的敵人；另外有咱家己心內創造的內在的敵人，咱感覺會著及感覺袂著的意識內面，忽然會產生敵人。外在的敵人較好對付，但是心內的敵人，心內時常掰袂開（póe bōe khui）、纏袂開（tîⁿ bōe khui）。

主耶穌真知人的世界及人的本性，伊無講咱袂使有敵人。但是伊愛咱脫離敵人的纏絆（tîⁿ-pòaⁿ）；若是會當，最好離開敵人遠遠。伊講若是會當，甚至咱著去「疼」敵人。這是人生第一大的困難，真少有人做到。但是這是主耶穌設互咱人生最高的道德標準，親像一phah燈火掛佇咱面前，親像上帝永遠佇hia咧呼叫的聲音，親像leh叫咱回家的聲。

雖然這phah燈火真遠，親像一個永遠達袂到的目標，但是咱一定著向彼個目標進前，因為知影世間所有代誌，咱初想是上帝徛佇咱這邊，但是無一定，咱家己毋知，因為上帝是毋是最後徛佇咱這邊，著等到最後結束的時咱才知。咱著真正去等，認真等，耐心等，祈禱咧等，等到最後才會知。咱著認真去思考甚物才是上帝「最善良、通歡喜、純全」的旨意及教示。（羅馬書12：2）這款代誌是上帝留互世間咱信耶穌的人每日的工課。