本土語言 ê「首冊」羅馬字

張復聚(醫生、雄醫學大學台語文講師) 

教育部國民中小學九年一貫課程綱要語文學習領域公聽會，已經有 tī 北、中、南辦過 3 擺，大家 mā 有真濟無仝 ê 見解。其中，上蓋袂當接受 ê 所在就是教育部規定「客語、台語一年級先學漢字、到三年級才學羅馬字(台羅)」。這款規定 m̄但違反教學原理，mā 阻礙台灣囡仔後擺 tī 世界 ê 發展！

這馬學生去學校學華語，一開始就是先學 10 禮拜「首冊」ㄅㄆㄇ，然後才開始學漢字。學生會曉ㄅㄆㄇ了後，就會當用ㄅㄆㄇ寫簡單 ê 句讀，甚至一直到後擺寫文章，有時若袂記得寫漢字 beh 按怎寫，koh 會當提ㄅㄆㄇ來鬥，意思 mā 真完整！這就是先學ㄅㄆㄇ好處佮優點。

仝款 ê 道理，beh 學客語、台語，絕對是先學教育部制定 ê 羅馬字！所以，教育部應該制定本土語言 ê「首冊」羅馬字！學生先學 10 禮拜 ê 羅馬字，koh來才學漢字。

過去 beh 學台灣本土語言，包含台語、客語佮真濟原住民語言，攏是靠羅馬字(白話字) ê 幫贊。現任總統馬英九台語會當學到這款程度，mā 是靠羅馬字，m̄是ㄅㄆㄇ！馬偕牧師、羅慧夫醫生、蘭大衛醫生⋯⋯mā 攏是按呢。

Koh 來，台灣囡仔後擺須要去全世界走 chông (奔走)，佮人盤 nóa (套交情)，做生理、拚經濟；這 ê 時陣，上要緊 ê 代誌就是會曉使用對方 ê 語言。若是細漢就學會曉好好仔利用羅馬字，到時 beh 學別人語言，不管是日語、德語、西班牙語、非洲 ê 足濟無仝語言等等，攏親像桌頂 ni 柑，極其簡單。

這馬真濟去越南 ê 台商，袂曉羅馬字，beh 學越南話真困難，不得已倩(僱用)真濟中國人做管理幹部，mā 發生袂少不幸 ê 代誌。中國人採用漢語拼音，攏是羅馬字，所以 beh 世界語言相對簡單！仝款，越南新娘 beh 學本土語足緊，因為越南 ê 文字全部攏是羅馬字！本人進前 mā 是用 8 點鐘就學會曉布農族醫療用語。ㄅㄆㄇ只有 37 ê 符號，會當表示 ê 音韻過頭少，對學習世界語言無啥物幫贊。

對這馬 ê 人來講，會曉愈濟種語言，表示有愈濟「趁錢 ê 工具」，無人會嫌，所以台灣 ê 教育內面，羅馬字教學愈早開始愈好。

附註：本文載自『民報』《文化》專文，2015-10-07