世界母語日

■ 張復聚

世界母語日（International Mother Language Day），就是每年二月廿一日。

一九九六年，聯合國教科文組織佇巴塞隆納發表世界語言權宣言（Universal Declaration of Linguistic Rights），強調任何語言攏會當成做官方語言。一九九九年閣決定對二千年起訂逐年二月廿一日做世界母語日（ＩＭＬＤ），認為語言m̄若是人類文化財產未當欠缺ê要素，嘛是激發創造力及維持文明多樣性ｅ前題，呼籲世界逐國認真、嚴肅重視母語ê流失及死亡，積極做母語ê研究、保存及發展。二○○一年九一一事件發生了後，十一月二日閣佇巴黎開部長級會議，確認無仝文化中間互相對話是促進世界和平上好ê保證，反駁「無仝文明及文化之間定著會發生衝突」ê悲觀論調，認定文化多樣性是人類共同遺產。文化多樣性及生物多樣性仝款需要、未當欠缺。

人類佇地球活beh二百萬年，幾十萬年前才使用語言，六千年前蘇美人才發明文字；不過，真正開始會曉重視語言卻拖到一九五三年！hit年教科文組織對世界發表一個重要教學原則：兒童ê母語是上有效ê教學媒介。

語言到底有些甚麼重要性，予聯合國這幾十年來一直teh強調語言問題咧？

用生態學ê話來說，上界多樣ê生態系就是上界勇健ê生態系；這句話仝款通適用佇語言學，上界多樣ê語言生態就是上界勇健ê語言生態系，這種生態系上無容易被破害，準講被破害嘛上容易完全復原。

眼前，先進國家攏teh設立語言保護機構。對一九九四年起美國、日本、英國、加拿大等攏有官方及民間單位（像德國ＶＷ汽車廠）陸續成立語言保護機構，提供經費獎勵世界各種語言研究、保存及發展。咱通按呢講，注重母語已經成做現代國家文明程度ê基本指標啦。連咱厝邊馬來西亞ê民主行動黨嘛teh爭取制定世界母語日做in（他們）ê國定節日！

咱民主文明閣現代ê台灣著閣等外久才會有台灣母語日？

（作者為醫師、台灣羅馬字協會會員）

附註：本文轉載自『自由時報』《自由評論網 > 自由投書》, 2006-02-17