無形 Ê 文化資產語上要緊

「文資法」修改建議

張復聚 台灣南社社長 

自來，人類社會對「語言議題」攏總大約有3種看法：就是kā看做是問題(troubles)、人權(rights)、kap資產(assets)。

對1948年聯合國人權宣言到1966年 ê 「人權兩公約」，攏認為語言是人權。但是到1996年世界語言權宣言kap 2001年文化多樣性宣言，開始改變觀點，變做認定語言是資產，而且不管甚物國家、佗一種語言攏是「全世界」共同 ê 資產、資源！

Tī 咱台灣國內，當1950年代聯合國主張「兒童母語是上好 ê 教學語言」時，常任理事國 ê「中華民國」卻 tī中國國民黨威權統治下kā台灣 ê 語言議題看做是「問題」，會妨害「國家統一」，beh消滅這款「問題」！所pái (所以) 開始 tī 台灣各級學校禁止台灣人母語使用，連教會用 ê 各族群母語羅⾺字聖經mā沒收！一直到90年代社會民主化才承認語言權是人權，1999年國民黨政府教育部長楊朝祥「不得已」同意正式 tī學校教台灣母語。按呢攏總耽誤50年！到這馬 mā 猶未 kā 語言看做是資產、資源！致使今 á 日台灣20幾種母語大多數已經滅絕，少數濱臨絕種 ê 語言 mā 真緊就會斷 khùi (氣)！

真歡喜看著立法院已經開始teh審查修正「文化資產保護法」，表示台灣確實beh對「民主」hāⁿ-jı̍p (跨入) 「文明」 ê 國度，這是正確 ê 頭一步！值得咱目睭 peh 金金(張大眼晴)來期待。

「語言是文化 ê 載體」、「語言是文化 ê 基礎」、「語言失、文化絕」，這是全世界攏同意 ê 簡單道理。

報紙講，法案內容按算beh kā 文化資產區分做「有形、無形」兩大系統。有形文化大家好了解，像歷史古蹟等；無形文化資產有包含傳統表演藝術、工藝美術、口語吟唱、民俗技術、知識實踐等。基本tek (基本上) 按呢 ê 方向是正確。不過濱臨滅絕 ê 本土語言卻無得到應該有 ê 重視 kap 支持！咱若拍開聯合國網站：  聯合國教科文組織

真清楚會當看著聯合國UNESCO (教科文組織) ê 無形文化資產 (Intangible Heritage) mā有包含有濱臨危機語言 (Endangered languages)！

管碧玲立委有按呢講，這是文資法實踐35年來上完整 ê 總結，也是前進新時代 ê 理論基礎。若真正是按呢，懇請採用上符合世界文明 ê 聯合國文化觀點，kā濱臨滅絕 ê 本土語言 mā 包含 tī 無形文化資產內面！

參考資料：

《民報》管碧玲：文資法35年來最重大修正 三大新觀念入法
1996年世界語言權宣言
2001年文化多樣性宣言

附註：本文轉載自『民報』《論壇》2016-05-07