台灣歇後語 （Tâi-oàn hioh-āu-gí）

–  賴柏年 –

解說：台灣歇後語就是咧（teh, 在）講一項代誌，其實是間接咧比喻別項的物件。

1. 火燒豬頭 （hóe-sio ti-thâu）
意思：面熟 （bīn-se̍k）
解說：豬頭若用火燒，燒了豬頭面變熟，所以用”火燒豬頭”作比喻：若是遇著一個人，對伊有印象，感覺熟似（se̍k-sāi，認識）。

2. 火燒竹仔林 （hóe-sio tek-á-nâ）
意思：無的確 （bô-tek-khak）
解說：竹仔林若起火燒，燒kah乾乾乾，連竹殼嘛燒去。所以”火燒竹仔林” 來比喻：對作某代誌”無的確 （bô-tek-khak）”，無確定的意思。

3. 火燒甘蔗園 （hóe-sio kam-chià-hn̂g）
意思：無休 （bô-hiu）
解說：甘蔗園起火燒，所有的甘蔗葉燒了了，”無葉”讀起來親像”無歇”，所以用” 火燒甘蔗園”來比喻：作代誌一直作，無歇睏，”無休”。

4. 火燒罟寮 （hóe-sio ko͘-liâu）
意思：無網 （bô-bāng）
解說：罟寮是出產拋漁用的魚網的所在，火燒罟寮，漁網燒了了了。”無網” kah “無望” 仝音，比喻對期待中的代誌無擱寄望，”無網”啦。

5. 火燒雞寮 （hóe-sio ke-liâu）
意思：芳貢貢(phang-kòng-kòng)
解說：雞寮起火燒，雞燒了了，氣味真芳。所以用” 火燒雞寮“來形容”芳貢貢(phang-kòng-kòng)”。

6. 火燒目睭毛 （hóe-sio ba̍k-chiu-mn̂g）
意思：目孔赤（ba̍k-khang-chhiah）
解說：火燒目睭毛，目睭四周圍燒kah紅紅腫腫。所以用” 火燒目睭毛“來形容對別人的成就起怨妒（oàn-tò͘），抑就是”目孔赤（ba̍k-khang-chhiah）”啦。

7. 火燒林投 （hóe-sio nâ-tâu）
意思：袂死心（bōe sí-sim）
解說：林投生長佇倚海的所在，有防風的作用。林投葉長，擱有刺，性命力強，火燒袂死（bē-sí, 不會死），繼續生長。所以用”火燒林投”來比喻：對代誌毋通（m̄-thang，不要）失志、放棄，一定有東山再起的機會。抑就是”袂死心（bōe sí-sim）”啦！