踏話尾

日本話講：「Kaeru no ko, kaeru.」 這句話有二個意思：有hit種水雞母，就會生hit種水雞kiáⁿ。另外ê意思是：Beh轉去ê gín-á，一定會轉去，你kā擋mā擋bē-tiâu。

有真長ê時間，我一直看『教冊仔』看bē起，因為阮爸爸一世人tī國民小學作『散教員仔』作四十五冬，飼六個kiáⁿ，散到強beh hō͘mô͘-sîn-á（鬼仔）掠去。為著beh逃閃阮爸爸ê運命，我出外去流浪，天涯海角，啥物所在攏好，啥物事業攏好，tō是無beh kiu toh台灣作老師。無想到taⁿ tih-beh六十歲，soah越 (oa̍t) 轉身，轉來故鄉ê台灣，tī長榮大學這個庄腳所在，ta̍k日kap我ê gín-á ê年齡仝款ê學生作伙。

細漢ê時beh去學校攏靠二支腳，行tī phōng-phōng-eng (風飛砂真多) ê小路

。Tī東京工作ê時攏駛四輪ê去上班。去美國讀冊工作駛koh khah大隻ê四輪ê美國車，tī高速公路ê頂面sǹg-sǹg-kiò，駛著真iāng 。但是自從轉來長榮以後，我攏騎hit台七百kho͘買ê tōng-lián-chhia (鐵馬)。這台二輪ê鐵馬，hō͘我恢復古早以來戰鬥ê雄風，騎tī頂面，所有大潭、中洲、豬厝、青草埔、牛tiâu埔、韭菜寮攏是我ê勢力範圍，有時甚至達到歸仁、仁德、灣裡海邊等邊疆地區。我若騎上hit台舊鐵馬，心情就親像一位二輪戰士，向著千軍ê萬馬，濛濛ê前程，向前行，啥物攏驚！

Tùi二腳到四輪，koh tùi四輪轉來作二輪戰士，親像一位德國ê牧師bat講：『人生最少需要悔改二次：第一次是對自然人悔改作靈魂人；第二次是對靈魂人悔改作自然人。』mā會使講：人tio̍h tùi一位出生ê小兒，進入社會車拚，然後轉來作gín-á，來完成人生圓滿ê終結。Mā會使講：人tio̍h tùi在地人出世，去遠遠ê天邊旅行，去他鄉討thàn、結婚、飼kiáⁿŽ，最後才轉來伊ê故鄉落土作在地人。我ê人生ê圖案，就是這種典型。

但是我想我ê圖案是beh chhōe著人生ê歸宿。顛倒péng，我轉來chhōe我故鄉ê根，作自然人，轉來作在地人，目的是beh戰鬥，是beh落葉『歸根』，我有一個小小ê夢，就是tī上帝猶hō͘我chhun落來ê年歲中，tī我一個人做會到ê範圍內，我beh創造我心目中美麗ê世界，無beh投降。過去ê人生中，我面對ê任何現實，無時我會滿意，時時beh戰鬥、改變現實、改變環境、改變社會、也改變家己。我是永遠活tī改變中ê人物。

Tī這本冊ê內面，人會發現tī李登輝先生主政ê時代中，我對伊有真無情ê批判。舊年金美齡女士tī全加拿大同鄉會年會ê演講中，亦tī今年伊來長榮大學演講中，mā攏有講著：『當初伊teh呼籲大家支持李總統ê時陣，tō是這位陳牧師起來罵我！』

我相信李總統會瞭解我今á日ê心情，因為伊是一個有血有肉有靈有魂ê存在，伊隨著伊四圍ê環境，改變伊ê想法，調整伊戰鬥ê方向。

我chim-má已經是『李登輝之友會』ê會員。但是我猶原相信，hiàng-tang時á我ê想法絕對無有m̄-tio̍h，親像我今á日ê想法無有m̄-tio̍h仝款。

我講想beh印這本冊ê時，第一位贊成ê人是賴柏年兄kap賴雁玲姊，in二位翁仔某對hin開始tō無暝無日為我拍字、排版、美工。若無in ê『道理不平、氣死閒人』來『拔刀相助』ê氣慨，這本冊是無法度出現啦！

吳景裕醫師（陳雷）kap黃真救先生是我長年tī戰場中ê同志。真多謝in為我寫ê『踏話頭』，對我是真大ê鼓勵。

願咱讀這本冊ê時，是抱著欣賞ê心情來讀，m̄-thang用教條觀點去讀，按呢khah合原作者ê好意。同時mā-tio̍h準備將來咱每一個人攏tio̍h將家己寫ê台語文ê筆跡（pit-jiah）印出來，kap大家台灣人共享。

陳柏壽    拜
台南.長榮大學  2002.12.1