受苦ê記號
＜訪問維也納唯一ê長老教會＞

-陳柏壽 牧師-

Hit日kap寬惠姊兩人約好，去訪問維也納唯一ê長老教會「Die Evangelische Gemeinde H. B. In Wien」ham牧師Johannes Langhoff見面。一踏入禮拜堂，發現親像一個密密bōe過風、無日頭ê地下教會。原來對這間教會ê建築結構，會tàng看著幾百年來，一直到今á日，新教教會ê苦難。

宗教改革以後，整個二百年中間，奧國王公嚴格禁止新教ê設立，一直到十八世紀末期，奧皇Joseph二世才容忍東正教ê存在。Hit時路德宗kap改革宗設法tī巿中心買一間廢棄無用ê修道院，準備beh設立教會。當局雖然講是「容忍」，猶是嚴格禁止設立教會，只准設立「祈禱室」，室外不准有教會式ê建築物，不准設tī大路邊，不准有鐘塔、時鐘等顯目ê物。同時亦不准tī教會內做任何主日學等宗教教育ê活動。

長老教會不得不tī巿內深巷內起一間外囗親像平常ê住宅，有khiā家型ê窗á，但是無大門，只有一個小門出入。Tī牆內，才另外改建教會式ê窗á kap天井。Che就是禮拜堂內黑黑暗暗、無看見日光ê原因，因為是牆內有牆。上起初亦設一個高塔型ê建築物tī厝頂，但是受強迫拆除。目前ê小塔，是一八四五年，小khóa放鬆ê時才改建ê。

一八四五年以前，所有聚會收ê獻金，攏tio̍h向天主教會納稅，稅率真koân，教會chhun ê無chē。一直到一八六一年，教會收ê獻金，才有可能全歸教會。一九六一年奧國頒佈新憲法，tī盟軍強迫之下，才名義上規定新教kap天主教tī法律上有平等ê地位。奧國雖然是天主教國家，因為歷史上受回教徒佔領時期真長，所以今á日維也納市內回教徒人口佔bē少比例，全奧約有卅萬回教徒。憲法規定接納回教是十九世紀初期就有，相對之下，新教tio̍h等到廿世紀末期才受接納。

雖然講長老教會受「接納」，全國只有三間長老教會，阮訪問這間是最大一間，名義上登記ê會員有六千人，全國長老教會會友只有一萬二千人。其他二間長老教會攏是tī莊腳，真細間，禮拜人數無chē。

宗教改革後二百年ê恐怖時代，厝內有聖經是犯著死刑ê大罪，但是hit中間奧國莊腳，尤其是山區，培養一部分「地下信徒」，活tī當局ê「法網」之外，che是今日奧國有一萬二千人長老教會ê「種子」。這二、三年中間，所有beh加入長老教會ê會友，需要接受天主教會派來ê神父來教示「天主教理」kap「多如牛毛」ê聖禮典，經過這段嚴格ê試練以後，考試及格，心內猶koh beh作長老教會信徒ê人，才會放伊去。Hia ê入長老教會ê信徒，大部分心內只有暗記「信仰告白」、「主禱文」、「新的誡命」nā-tiāⁿŽ，就堅持in不變ê信仰。
舊年tī奧國山區觀光地區Kaprum發生觀覽車tī山洞內tio̍h火，有一百外人死亡ê悽慘代誌。Koh khah悽慘ê是這一百外人大部分是新教徒，但是tī這個天主教國家，m̄-niā不准新教牧師去為in作安魂ê禮典，甚至連參加to m̄准，只有強迫用天主教ê彌撒kap聖餐等死者攏m̄知影ê禮典，去作安魂ê儀式，實在是真諷刺ê一段歷史。

奧國人一般是心智開放ê民族，但是因為外在ê宗教教規ê統制，in無容易接觸著自由開放ê新教世界。一直到今á日，大部分人ê宗教心靈猶停留tī封建ê偶像崇拜ê境界。訪問本城唯一ê長老教會以後，心情非常沈重。但是我相信這群有真súi ê文化背景ê人民，若是有一日去接觸著自由ê日頭kap空氣，一定真緊會開花結實。

(本文刊載tī台灣教會公報，2 June 2002)