北美台灣語文夏令會發起經過

-陳柏壽 牧師-

時代teh進展真緊，這句第二屆「北美」台語文「夏令會」tī今á日已經bē通啦；今á日來參會ê百五位ê出席者中，除了台灣來ê語文工作者、牧師、文學家以外，會使講全世界各地、各種族ê人攏有tī chia；歐洲、日本、加拿大，包括夏哇伊「國」來ê鄭良偉教授，攏聚集tī chia，真正是世界性ê台語文大會。另外講伊是「夏令會」mā無適當，因為tī chia發表ê論文，差不多攏是一流一真有深度ê研究成果，會使講是一種學術ê「研討會」，比kan-na休息開講ê「夏令會」嚴肅chē啦 ! 所以阮計畫明年差不多仝這個時陣，beh tī台灣南投埔里ê謝緯紀念營地開會，改名作「第三屆世界台語文研討會」。請列位兄姊準備心，明年更加盛大來參與。

講起初次台語文夏令會發起ê經過，代先咱tio̍h紀念現在已經離開世間回天家安息ê前台獨聯盟主席蔡正隆博士。前年以來為著「台灣公論報」用台語文書寫社論ê問題，小弟就時時tī電話中kap tī各種台灣人ê場合kap正隆兄有密切連絡kap討論。94年三月十二日正隆來衛鄉教會討論台文運動ê問題。三月底我忽然想起，不時teh爭執台文寫社論問題，不如拜託正隆兄出面tī Houston熱天中來辦一次台語文夏令會。電話一khà通，正隆滿口答應。四月初一我連絡美西ê良光兄，正隆連絡美東ê民祥兄kap Houston ê一群有心ê兄姊，東西南北同齊動員起來。結果第一屆ê台語文夏令會tī 九五年七月十二日到十七日非常成功完成，是一個真成功ê開始。

夏令會推動ê主體是「台文通訊」雜誌社。「台文通訊」由「聰美姊紀念基金會」負責發行。「台文通訊」主要ê成員kap負責人大部分亦是聰美基金主要ê理事或幹事。「聰美姊紀念基金會」是「紐約衛鄉台灣教會」屬內ê一個社會運動肢體。

有舊年成功ê開始kap寶貴ê經驗，今年初小弟就kap良光兄早早開始籌備，原來預定tī美東舉行，衛鄉教會每禮拜攏teh計畫，甚至亦tī美國歸正長老教會Warwick營地預約七月底一禮拜份。後來美東、西二方面不斷思考研究ê結果，決定美東部份併入今年美東夏令營執行，美西部份kap教授會合併舉行。所以今年ê美東夏令會中有真大部份ê節目是由本通訊提供ê台文、台灣文化ê節目，其中亦包括真好ê芝加哥台灣歌劇團ê演出。美西因為地點適中，所以今年出席人數真chē，同時得著洛杉磯在地「台文通訊讀者聯誼會」諸位兄姊ê全力支持獻工，kap台文通訊劇團貢獻精彩又感人ê話劇「有耳無嘴」 kap 「厝邊隔壁」。今年ê台文運動真正tī東、西兩岸同時點火，會使講是台文運動ê Olympic。明年搶灘登陸台灣本土，期待必定燎原。

「台文通訊」無屬任何政治或宗教組織，亦是任何組織ê「外圍組織」。咱只有一個堅強、正確又獨立ê原則，就是凡若支持台文、台語運動ê個人或團體，攏是阮ê友軍同志;凡若反對或阻礙台文、台語發展ê個人或團體，難免變作阮ê敵人。今年咱同時得著台灣人教授協會，台灣佛教萬佛會，kap台灣獨立建國聯盟ê支持，作大會共同主辦人，阮非常感謝。

(作者為聰美姊紀念基金會總幹事。
本文刊載tī台灣語文專刊，8-31-1996)