「管家的迷思」

陳柏壽 牧師

「管家」的意思是主人將伊的財產交代這個人，互伊代替主人管理、經營、趁錢的意思。伊是徛佇主人及伊下面的辛勞的人的中間做代誌。

咱台灣最大銀行兆豐銀行，咱chím-má才知蔡友才真正是「管家」的角色。因的頂頭是咱所有的台灣人及台灣政府；因的下面是千千萬萬買因的股票的大眾。伊徛佇中間，用几百億幾千億的金錢，poâ來poâ去，翻來翻去，去得著利益。國民黨幾百億美金的不法黨產，嘛佇因的手內poa̍h-péng。

最近東京都新市長小池就任以後，才發現新起的豐州魚市場猶未使用，地下室竟然是空腹，無填土。對前市長問到下面工友，無人對這項代誌負責任。日本人的管家，及KMT的管家仝款，一下出代誌，攏soan到li–li，無人負責任。

戰後美軍佇巢鴨審判戰犯，hia-ê軍頭，嘛是推來推去，ho-lo-ho-so，大家互相講好，就決定來拍珍珠港，無人欲負責任。既然無人負責任，大家攏做伙掠去執刑。 

管家文化是日本文化中一項特色。「管家」的立場及功能非常複雜。耶穌佇路加福音16章講一個真互人迷思、真oh瞭解的故事。

伊講：有一個管家，趁主人欲給伊辭頭路以前，緊叫hia-ê欠主人錢的人來，「你欠主人偌濟錢？」「欠100桶油！」「緊提筆來，寫做50！」；給另外彼個問，伊講伊欠主人100擔麥仔，管家講：緊提筆來，寫做80。

這段的起頭雖然寫講是一個「不義」的管家，但是故事的煞尾，煞寫主人顛倒「呵咾」這位管家非常「聰明」，真gâu，真smart!  講因為伊是「世間之子」「今世之子」，這位今世之主，比「光明」之子閣較聰明。耶穌閣講：「著借用hia-ê不義的錢財，就是主人kā眾人收括的錢財，用來結交朋友，等到錢財無了了的時，猶有你古早做人情交結的朋友，會轉來伸手幫忙你。」

按呢講這個故事實在有夠屬世，實在有夠臭錢銅味，實在真無純情。但是我想伊實在真合咱生活的現實。 

「管家制度」就是維持羅馬帝國安定的力量，拄好親像國民黨建立濟濟「柱仔腳」，來支持伊的政權仝款。我一個親成對公家機構退休了隨時接做區的調解會主任、農會理事、水利會理事。選舉的時就對國民黨頂面提錢來分。這就是管家的勢力。

中山國校的蕭曉玲老師，為著追究教冊的權利及自由，去予學校退職。對校長開始一直到家長會歸群人親像紅衛兵猴山仔，圍纍打擊。這就是國民黨的一群管家。

佇中國，對都市到小庄腳，大大細細代誌攏是共產黨的「黨委書記」控制。遮的攏是因控制人民的管家。人民真oh反叛。

咱若是認真去追究耶穌的福音，咱toh知，主耶穌講話毋是空嘴pō͘舌，伊的話真實在。小小的猶大國就是有遮爾濟管家，來kā猶太人的頷頸捏死死。

咱若是設想咱就是彼個管家，你想你會做仝款的代誌亦無？若是攏無人khoàiⁿ，若是天不知、人不覺，四周圍靜靜的時陣，親像兆豐的蔡友才，干焦伊一個人，及國民黨的一位頭知影的時陣，指頭仔佇電腦捏幾個，就幾億幾億美金轉無去。你我若是伊，有可能做仝款的代誌亦無？

我去24-hr fitness定定tu̍h著江醫師，我看 伊攏毋捌入去大桶的jiakuzzi浸洗，問伊原因，伊講驚一定有人佇jiakuzzi內面漩尿。醫生人卡注意衛生。確實有影，佇人bo-khoaiⁿ的時，bi̍h佇jiakuzzi內底偷漩尿。

教會本來是欲chhoē上帝的人大家互相分享生命經驗，互相安慰，手牽手做伙行天路的所在。但是目前教會的制度，每一個牧師攏是一個「管家」。有的是住大樓，駛benz，有冷氣；有的帶山內、台東、花蓮的草厝仔。每一個管家攏真驚別個牧師入去伊的管區，非常提防。山地的管家，爭欲入都市，細間的欲爭去大間，大間的爭來外國辦退休。大家講道攏真gâu講話，講到甜but-but，揀袂得失人的所在講。因上gâu講的是福音，Good News，講的人爽快，聽的人嘛爽快。訓練了，經過幾仔年，大家攏變軟腳，袂行路。大家攏思想一致，做伙上天堂。這是咱的教會文化：教會是chia-ê小管家佔的地盤。

主耶穌的福音互咱一個最大的困擾就是咱看伊若準無按牌理出牌。但是這款情形互咱著閣較認真來讀主耶穌的話：譬喻講伊佇馬太8章有一個學生給耶穌講，「阮老爸死啦！互我先轉去埋老爸，才來toè你！」耶穌講，「毋免！toè我就好！」這豈毋是真無hap情理的話？馬太10 章伊嘛講真無情理的話：「恁毋通想講我來這世間是欲帶來地上和平，是欲互地上動刀兵。我來是欲互查埔囝起來反因老爸，欲互查某囝起來反因老母，新婦反ta-ke。」這個話咱bat深深去想無？路加12章主耶穌講：「我來是欲帶火來這世間。世間若是攏互火to̍h起來，就是我所願意的代誌。」主耶穌講的話無定定有Happy ending，無定定是彼個「白雪公主及彼個白馬王子：從此以後就過著幸福快樂的日子…」

主耶穌是欲教咱甚麼？主耶穌的話你若認真去想，就會發現親像咱台灣的風颱雨，給咱chháiⁿ來chháiⁿ去，chháiⁿ到咱家己毋知人。所以咱著用真安靜的心肝去想：主耶穌最根本tek的教示是佇toh位，才會當領受主耶穌的道理。

主耶穌生活佇羅馬時代的猶太人，分做二旁。一旁是及羅馬統治者妥協，為著生存無欲反抗的人，叫做撒都該人及文士。另外一旁人叫做法利賽人、奮銳黨，是反體制的人，隨時想欲反羅馬統治。拄好及咱台灣的現狀，完全仝款。

主耶穌學生中嘛是有這二旁的人：有反體制的雷公仔囝西門彼得，嘛有靠羅馬權勢生活的抽稅人馬太。

主耶穌較常是khia-tī這二派的中央。主耶穌徛佇中間，真歹做人。所以人問伊著納稅的是甚麼人的時，伊只有應講：「該撒的歸該撒，上帝的歸上帝。」有講等於無講。

主耶穌的教示時時摻雜著世俗生活的實際及智慧。伊時時及歹人、娼妓、抽稅的人、啉酒的人做伙。用世間人的眼光來看，耶穌毋是一個完全的好人，嘛毋是一個完全的歹人。伊實在是一個完全的「人」，伊是生活佇全面的人生內面的上帝。咱佇實際人生內面，咱會發現佇主耶穌的教示內面，時時有留一條路予咱行，留一個空間予咱閃。

咱tuh-chia選著咱台灣人做總統，隨時佇Olympic運動會，咱著予人排佇最後尾，giâ一個「世界難民營」的「難民」的旗仔入場。咱當歡喜有新的政府，會當好好來開始的時，咱的政府機器煞哩哩落落。這豈是咱的運命？抑是上帝的變面？

有一項代誌我所知的只有是：咱真咧興旺，真hyper，真滿足的時陣，上帝會給咱踏brake，及伊踏家己的brake，行去耶路撒冷予人釘十字架仝款。咱對每項代誌，毋免感覺奇怪。

咱的人生及咱台灣人的運命仝款，定定踏入去一個兩難的「灰色」地帶，定定拄著想未到的逆境及逆流。

我定去Oceanshore釣魚，定去拄著逆流及痟狗湧。以前我真戇，湧來的時，歸身軀正面及伊沖，定定去互沖倒去，規身軀衫tâm-kô͘-kô͘，毋敢給牧師娘講。今我學卡乖啦，風湧若沖來，我身就彎一邊，互湧閃過。互湧閃過以後，咱就徛會tiâu。

我想這就是主耶穌互咱的生活智慧。今仔日你若無錢就無法度，但是若有存錢，著愛揣一個你認為最值得你支援幫贊的人，去伸手幫助。可能有一日，這個人會伸手來幫贊你。耶穌的金錢倫理嘛適用佇國家，有錢的國家對窮國收割資源，chím-má因嘛應該去援助幫忙窮國，等有一日，人會來幫贊恁。

我想主耶穌的教示，咱著給伊具體化、實際化。若無法度具體化、實際化、無法度及咱的生活一致的福音，是假的福音。

照我做釣魚仔人的經驗，有時感覺今仔日已經無saⁿ希望啦，家私款款咧準備欲轉厝的時，忽然間一尾大尾的走來咬。有時感覺閣互我釣一尾，最後一尾就好，釣起來我就欲轉啦，但是hit尾「最後的一尾」，卡等toh袂出現。

有時感覺我按呢會做這款的管家，人攏講我「不義」，但是啥人知，最後煞得著主的呵咾。

世間代，有真濟所在，毋是照咱想，是照上帝想。上帝有伊的好意及安排。萬事咱著放手互上帝安排，咱只有盡咱的本智及本能，認真追chhoē上帝至好的旨意就好。 

咱對家己、對世間代誌，毋通siūⁿ過頭有信心，毋通siūⁿ固執，毋通siūⁿ教條。咱著知，佇上帝內面，萬事時常會改變，上帝無活佇教條內面。這是我對耶穌基督的福音學習著的自由開放的精神。