數念聰美姊紀念基金會主席黃聲宏醫師

賴柏年

5月18日收著陳柏壽牧師tùi日本發出ê電子批，伊用Bad News作主題，內容簡單明瞭講黃聲宏醫師已經佇前一工佇New York蒙主恩召往生ah。

這个歹消息ê來臨實在太突然，hō͘人太料想bē到啦！會記得2禮拜前才kap伊通過電話。彼陣伊ê聲音有khah弱，但是精神bē bái。佇電話中除了關心「聰美基金台文站」ê進度kap經濟情形以外，伊koh提起已經kā診所收–起-來，拍算beh hioh-khùn專心靜養。想bē到，伊卻按呢緊緊來離開阮chia-ê濟濟為伊ê健康代禱ê親友。阮為伊怨嘆、為伊毋甘、為伊悲傷。

黃醫師長期以來，用伊高超ê醫術kap先進ê設備，醫治濟濟患者ê病，救濟濟患者ê性命，總是卻無法度醫治家己ê病痛。經過長期kap癌症ê抗爭，因為主ê 憐憫kap疼惜，提早召伊去天國，永遠脫離受病痛ê凌治kap拖磨。

佇在世ê時，黃醫師苦勞一世人，救濟病人，用實際行動關心故鄉台灣，kap參與台灣社團ê代誌，但是到路尾卻無機會好好享受退休ê安祥日子。用這款ê方式來對待黃醫師，用咱凡人ê標準，確實無公平啦。尤其是圭如姊，黃醫師娘，所受著ê痛苦、哀傷，絕對是外人無法度體會ê。願主施恩保護、照顧圭如姊kap遺族，節哀、保重；願主恩賜in氣力，勇敢向前行無koh有黃醫師陪伴ê路途。

黃醫師就是咱本基金會所teh紀念ê黃聰美姊ê大漢小弟。1938年佇台南出世，老爸是小兒科醫生，老母是婦產科醫生。因為醫生世家ê薰陶，真自然，kap黃聰美姊仝款，自細漢就立志做醫生。伊ê正規醫生訓練是佇早前ê台北醫學院kap日本北九州的久留米醫科大學。1972年移居New York，開始伊醫生kap家己開診所ê生涯，前後足足40年。伊講伊ê患者有真濟是日本人。

黃醫師是一位虔誠ê基督徒，有疼心kap同情心。佇伊病痛ê期間，每次kap伊佇電話中開講ê時，無親像一般人，伊卻歡喜kap人分享伊本人接受醫療ê過程kap效果，bē輸teh kā人上基本醫術課一樣。伊koh勸人萬事攏ài倚靠主耶穌，不管時to ài讀聖經，祈禱求平安。

1992年，佇New York衛鄉教會，陳柏壽牧師、黃醫師、以及長執共同成立「聰美姊紀念基金會」，主要ê宗旨就是beh參與推廣台灣語文、台灣文化kap 恢復已經hông蹧躂了了ê台灣歷史。自開始黃醫師一直是基金會ê主席，陳牧師擔任總幹事。

1993年11月基金會開始承接「台文通訊」ê發行工作，一直到2006年1月（第25期 – 142期），前後12年。佇這中間，「台文通訊」ê出版工作，黃主席全權交託多倫多ê編輯團隊，從來毋捌干涉。但是所有tī美國kap歐洲ê分發工作，是由伊本人帶領衛鄉教會會友做伙負責。另外伊mā 負責推sak廣告 kap募款ê工作。會使講伊是一個非常盡責ê主席，一位〈校長兼槓鐘〉ê主席。

毋但按呢，伊ê台語文真有研究，無論是全羅抑是漢羅，伊ê文筆攏真好，mā時常寫文章投稿「台文通訊」。

2006年基金會結束「台文通訊」ê發行工作以後，阮ê腳步並無停止，即時決定改換戰場，學習黃聰美姊ê精神，beh用實務參與台灣文化歷史ê保存 – 計畫將已經絕版ê 500本「台灣青年」全部公開佇網路，號名「聰美基金台文網」（http://www.chhongbi.org）。感謝陳牧師ê 走chông，基金會ê構想kap計畫真緊就得著台獨聯盟黃昭堂主席ê同意kap授權，並真緊就將「台灣青年」原版tùi台灣運來加拿大。Che是一項非常冷門ê事工，工程mā真大，真遙遠。但是基金會願意有苦勞無功勞，恬恬á做，一步一步做，相信有完成ê一工。

另外一項khang-khoè，就是chhoē人將比較有台灣歷史價值ê日文原版翻譯作台文。黃醫師本身也參與這項工作。原本伊有計畫beh將林海水ê中篇小說〈烏水溝〉全部翻作台文。雖罔伊病院代誌無閒，加上伊ê健康出問題，但是伊卻勉強完成「台灣青年」第11 & 12 號ê烏水溝台文版。Che更加顯現黃醫師ê盡責精神。

黃醫師，我熟悉你，是因為參與推sak台語文kap承辦「台文通訊」。事實上，我前後mā只有kap你見過一擺面nā-tiāⁿ。參與「聰美姊基金會」ê事工以後，我才慢慢仔了解你ê為人，待人態度。我看出你是一个親切好做堆、慷慨無自私、富同情心、公私分明、做事認真koh盡責ê大好人。你本應該留落來帶領阮繼續為故鄉ê文化、語言、歷史拍拚。Taⁿ，既然主已經將你提早chhoā走，一定有伊ê旨意存在。請你在天國安心過無煩惱、無憂愁、無病痛、自由自在ê生活。Hia-ê猶未完成ê基金會事工，就留hō͘阮這群兄弟姊妹：陳柏壽牧師、賴柏年、黃宮元、黃耀勳、黃主愛，繼續拍拚，一直到達成ê彼日。

願主賜你平安。